ცნობილი ამერიკელი კინომსახიობები ბრედ პიტი და ჯორჯ კლუნი დიდი ხნის მეგობრები არიან. სამწუხაროდ მათი იდეალური ურთიერთობა ალბათ უკვე დასრულებულია.
გუშინ რუსულმა ვებ-გვერდმა "gorod.lv" ამერიკულ მას-მედიაზე დაყრდნობით გაავრცელა ცნობა, რომ კლუნი-პიტის "ძმაკაცობა" უკვე წარსულში დარჩა.
რამდენიმე დღის წინ 53 წლის კლუნი ოფიციალურად დაქორწინდა. მისი რჩეული 36 წლის ბრიტანელი ვექილი ამალ ალამუდინი გახლავთ. ლიბანური ფესვების მქონე ქალბატონი და ამერიკელი მსახიობი 27 სექტემბერს, ქალაქ ვენეციაში შეუღლდნენ.
ამ საზეიმო ღონისძიებაზე კლუნის მეჯვარე ბრედ პიტი უნდა ყოფილიყო. ბედნიერი „ნეფე" ძმაკაცს ბოლო წუთამდე ელოდა, მაგრამ პირმშვენიერი ანჯელინა ჯოლის მეუღლე ჯვრისწერაზე არ გამოცხადდა.
საინტერესოა, რომ 27 სექტემბერს ვენეციაში, კლუნის მეორე ახლო მეგობარიც – მსახიობი ბენ აფლეკიც არ იმყოფებოდა. ბენს ამისი მიზეზი ნამდვილად ჰქონდა. იმ დღეებში ნიუ-იორკში ტრადიციული 52-ე კინოფესტივალი იმართებოდა და აფლეკმაც იტალიაში ჩასვლა ვერ მოახერხა.
ამერიკულ მას-მედიაში გაიჟღერა ვერსიამ, რომ პიტმა კლუნის სამაგიერო გადაუხადა. თურმე თავის დროზე ბატონი ჯორჯი, ბრედისა და ანჯელინას გაბედნიერების ოფიციალურ ცერემონიალს არ დასწრებია.
რასაკვირველია ჩვენი ამერიკელი კოლეგები ბრედ პიტს უკვე დაუკავშირდნენ, მაგრამ ამ უკანასკნელმა ამ თემაზე საუბარი კატეგორიულად არ მოისურვა. სამაგიეროდ ცნობილი გახდა რომ უახლოეს მომავალში ჯოლის მეუღლე პოლიტიკური კარიერის დაწყებას აპირებს.
ამერიკული მას-მედიის ინფორმაციით, ცოტა ხნის წინ ლუიზიანის უნივერსიტეტის ერთ-ერთმა ყველაზე გავლენიანმა პროფესორმა, ვინმე თომას ბაერმა, ბრედ პიტი ქალაქ ახალი ორლეანის მერობის კანდიდატად დაასახელა.
ეს პიროვნება დარწმუნებულია, რომ პიტი საუკეთესო კანდიდატია ქალაქის თავის თანამდებობაზე. მან ათამდე მიზეზიც კი ჩამოთვალა, რის გამოც მსახიობი უბრალოდ ვალდებულია გახდეს ახალი ორლეანის მომდევნო მერი.
ამ მიზეზებში ასეთიც არის: "თუ ჩვენ მერად ბრედ პიტს ავირჩევთ, ახალი ორლეანის პირველი ლედი ანჯელინა ჯოლი გახდება."
პროფესორმა კიდევ ერთი მიზეზიც მოიყვანა: "ჟურნალისტები და რეკლამის მსურველნი თვითონ დაუწყებენ დევნას ჩვენს მერს, და არა პირიქით, როგორც წინათ ხდებოდა. ეს კი ნამდვილად სასიკეთოდ წაადგება ქალაქს."
ჯერჯერობით ცნობილი არ არის ბრედ პიტის პასუხი ამ შემოთავაზებაზე. როგორც ამერიკულ პრესას მსახიობის ერთ-ერთმა ახლობელმა აცნობა, პიტი ამ წინადადებით სერიოზულად დაინტერესდა და არ არის გამორიცხული, რომ უფროსი კოლეგა არნოლდ შვარცენეგერის გზა გაიმეოროს და დიდ პოლიტიკაში შეაბიჯოს.
http://www.gorod.lv/novosti/244299-pochemu-pitt-propustil-svadbu-kluni
