ბაკურიანი ვიზიტორების რაოდენობას არ უჩივის, თუმცა იქ დასაქმებული ადამიანები მაინც შემოსავლების ნაკლებობაზე საუბრობენ. რაც შეხება დამსვენებლებს, გასართობი ადგილების სიმცირის და მაღალი ფასების მიუხედავად, ზამთარში დასვენებას მაინც ბაკურიანში ამჯობინებენ.
"ხალხს ფული არ აქვს და ეს ეტყობა ყველაფერს. თუ ადრე სასტუმროს ნომერს დღეში ვაქირავებდი 50-100 ლარად, ახლა ვაქირავებ 50-70 ლარად. იმის გადახდაც უჭირთ. ლარის კურსის ვარდნა დაეტყო ადამიანების ჯიბეებსაც. თან ბაკურიანში საერთოდ არაფერი გაკეთებულა ინფრასტრუქტურის მოწესრიგების მხრივ.
ხალხს უნდა სილამაზე. პირველ რიგში, გზები უნდა იყოს ყველგან. მარტო პატარებისთვისაა გასართობი. დიდებმა რა დააშავეს? კაფეები უნდა იყოს, რესტორნები. ივანიშვილს ჰქონდა პროექტი. პარკი და გასართობი ცენტრი უნდა გაეკეთებინა, "დისნეილენდის" მსგავსი, მაგრამ სადაა? ძვრა არ არის ამ პროექტის.
სასტუმროები ცდილობენ მაქსიმალური კომფორტი შეუქმნან დამსვენებელს. ყველა ცდილობს, კარგი კვება, გათბობა ჰქონდეს და კარგად მოემსახურონ დამსვენებლებს. თოვლი არაა, თუმცა ბაკურიანი ისეთი ადგილია, აქ ჰაერის გულისთვის ამოდის ადამიანი. ხელოვნური გათოვლიანება რომ გააკეთეს, ესეც კარგია. თოვლი რომც არ იყოს, თხილამურებით სრიალი მაინც შესაძლებელია, მაგრამ ახალი წელი ახალ წელს უნდა ჰგავდეს, განათება უნდა იყოს ქალაქში. იმდენად მოუწესრიგებელია ეს ყველაფერი, უცხოელი იშვიათად მოდის დღესასწაულების აქ გასატარებლად.
მაინც ქართველ დამსვენებლებზე ვართ დაყრდნობილი. თუ ქართველს ფული არ ექნება, ჩავარდება ეს ბიზნესი", _ ამბობს შ.პ.ს "ედელვაისის" დამფუძნებელი მანანა ოკუჯავა.
ინფრასტრუქტურის მოუწესრიგებლობა და გასართობი ადგილების ნაკლებობა, ბაკურიანში მართლაც იგრძნობა, თუმცა არის თხილამურების გაქირავების, ცხენებით, ბურანით, კვადროციკლებით გასეირნების სერვისები.
დიდველის სათხილამურო ტრასაზე შესაძლებელია ღამის 10 საათამდე სრიალი. გაკეთებულია ხელოვნური გათოვლიანება, რასაც ბუნებრივიც ემატება. ფუნქციონირებს საბაგირო, თუმცა როგორც ბაკურიანში ამბობენ, მცირე ქარის პირობებშიც კი იხურება, რადგან ადგილი არასწორად არის შერჩეული. საბაგიროს ქარის დროს მუშაობა არ შეუძლია. ქარი კი დიდველზე ხშირად ქრის.
თხილამურების ქირაობა ბაკურიანში, ერთი საათით, 5 ლარიდან იწყება. მთელი დღით დაქირავება 20 ლარის ფარგლებშია შესაძლებელი. რაც შეეხება საბაგიროებს, ერთი ასვლა 4 ლარი ღირს. თუ მთელი დღის აბონიმენტის აღება უნდა დამსვენებელს, ბავშვებისთვის 20 ლარია, დიდებისთვის – 30 ლარი. ღამის აბონიმენტი, 5-დან 10 საათამდე, 10 ლარია. ასევე შესაძლებელია თხილამურებზე სრიალის შესასწავლად ინსტრუქტორების აყვანა. მათი მომსახურება საათში 20-25 ლარს აღწევს.
თოვლის მოტოციკლით, ბურანით ერთი წრის შემოვლა 5 ლარიდან იწყება, ასევეა ცხენის ქირაობის სერვისი. კვადროციკლების ქირაობა ნახევარი საათი დაახლოებით 60 ლარი ღირს, თუმცა როგორც ბურანზე მომუშავე ალექსი ყაულაშვილი, რომელიც ბორჯომიდანაა სამუშაოდ ბაკურიანში ჩასული, ამბობს, რომ ყველაფერი მოლაპარაკებაზეა დამოკიდებული:
"გაქირავება მოლაპარაკების საგანია. არის წრიული ტარიფი, არის წუთობრივი. შეთანხმების ამბავია. წუთი 3 და 2 ლარიც ღირს. ერთი წრე 5 ლარი და ა.შ. წინა წელს კარგი იყო. რაც შეეხება წელს მუშაობას, არადამაკმაყოფილებლად შევაფასებდი, ხალხი ცოტაა, უმუშევარი კი ბევრი", _ გვეუბნება ალექსი ყაულაშვილი.
ბაკურიანში ადგილობრივი მოსახლეობა, ძირითადად, ფართს აქირავებს, ან სასტუმროები აქვს. სამუშაოდ კი ზამთრის კურორტზე საქართველოს თითქმის ყველა კუთხიდან ჩამოდიან. აქ შეხვდებით ქუთაისელს, რომელიც ტირის სროლაზე მუშაობს. თხილამურების გასაქირავებლად ადამიანები გურიიდან, ასევე ცხენების გასაქირავებლად, აბაშიდან არიან ჩამოსულები. ისინი ჩვენთან საუბარში აღნიშნავენ რომ მუშაობით კმაყოფილები არ არიან, დამსვენებლები ეცოტავებათ.
რაც შეეხება თავად დამსვენებელს, ბაკურიანი ადგილის და ჰავის გამო ძალიან მოსწონთ, გართობას კი საკუთარი ძალებით ცდილობენ.
"თბილისიდან ჩამოვედი. სადღაც 5 დღეა, აქ ვარ. ამინდი მომწონს. თან თბილა, თან სრიალიც შეგვიძლია. ახალი წლის შესახვედრად ხალხი მოვაგროვეთ და გასართობი პროგრამა შევიმუშავეთ. ორგანიზატორი მე ვიყავი. ახალ სასტუმროში ვარ და პირობები ძალიან მომწონს. აქ რაც არ მომწონს, ეს არის მარკეტები. ისეთი სიტუაციაა, ვერ შეხვალ. გააფართოვონ ან რამე ქნან", _ ამბობს დამსვენებელი ანანო გაგნიძე.
იგივე პრობლემას ასახელებს ბაკურიანში მარიამ ბერიძეც:
"ბაკურიანი ძალიან მომწონს. აქ ძალიან ხშირად ვისვენებ. კარგი იქნება, თოვლიც რომ ბევრი იყოს. ერთადერთი დიდი მარკეტები გვინდა. სასტუმროში ყველაფერი კარგად გვაქვს. ტურისტებისთვის კარგი სიტუაციაა. ჩემს მეგობრებსაც, რომლებიც საზღვარგარეთიდან ჩამოდიან, ძალიან მოსწონთ აქაურობა. ძალიან კარგი, საყვარელი ბაკურიანი გვაქვს", _ გვითხრა ბერიძემ.
მზიანმა დღეებმა ბაკურიანში თოვლი თითქმის დაადნო. თუმცა იქ სუფთა ჰაერზე დასვენება და სათხილამურო ტრასებზე სრიალი, ზამთრის სეზონზე, ყოველთვის შესაძლებელია.
