“ქართული ოცნების” “თავისუფალი დემოკრატები”

"თავისუფალმა დემოკრატებმა" კოალიცია "ქართული ოცნება" გასული წლის 5 ნოემბერს ოფიციალურად დატოვეს.

პარტიის ლიდერების ეს გადაწყვეტილება წევრების უმრავლესობამ გაიზიარა და მიუხედავად თანამდებობებზე ყოფნისა, პარტიიდან გასვლაზე არ უფიქრიათ.

თუმცა, მათ შორის არ იყო ჩოხატაურის მუნიციპალიტეტის საკრებულოს თავმჯდომარის მოადგილე ვლადიმერ სიხარულიძე.

_ ის ღირებულებები, რომლის ირგვლივაც გაერთიანდა ჩვენი პარტია, კოალიციაში არ შეცვლილა და შესაბამისად, არ ვფიქრობ, რომ კოალიციას დავტოვებ. რაც შეეხება პარტიას, გადაწვეტილებას ყრილობის შემდეგ მივიღებ. ალბათ, დავრჩები პარტიაში, _ ეს განცხადება "გურია ნიუსთან" საუბრისას სიხარულიძემ გასული წლის 6 ნოემბერს გააკეთა.

სიხარულიძემ ყრილობიდან დაბრუნების შემდეგ აღნიშნა, რომ პარტიას გაემიჯნა და რჩებოდა კოალიციის წევრად.

_ მე ვარ ჩოხატაურის საკრებულოს თავმჯდომარის, ზაალ მამალაძის და გამგებლის, ირაკლი კუჭავას გვერდით, _ ასეთი კომენტარი გაუკეთა სიხარულიძემ მის გადაწყვეტილებას.

ამ განცხადებების გაკეთების დროს, სიხარულიძე ჩოხატაურის მუნიციპალიტეტის საკრებულოს ფრაქცია "ქართული ოცნება _ თავისუფალი დემოკრატების" წევრი იყო (აღნიშნული ფრაქციის წევრია მანანა მინდაძე, ხოლო თავმჯდომარე _ ერეკლე უღრელიძე).

მიუხედავად იმისა, რომ "თავისუფალი დემოკრატების" დატოვების შესახებ ოფიციალურად განაცხადა, სიხარულიძეს ფრაქცია არ დაუტოვებია. ოფიციალური ინფორმაციით, იგი ამჟამადაც ფრაქცია  _ "ქართული ოცნება _ თავისუფალი დემოკრატების" წევრია.

_ კი, დავტოვე "თავისუფალი დემოკრატები". მერე რა პრობლემაა?!  _ ამბობს ჩვენთან საუბრისას სიხარულიძე.

_ თუკი პარტიიდან გახვედით, რატომ რჩებით ფრაქციაში?

_ ფრაქცია არის ასეთი სახელწოდებით _ "ქართული ოცნება _ თავისუფალი დემოკრატები". ალბათ, დაიშლება რამდენიმე დღეში. ეს არის "ქართული ოცნების" ფრაქცია და "ქართულ ოცნებაში" "თავისუფალი დემოკრატები" არ არიან.

_ პარტიამ კოალიცია დატოვა, თქვენ კი, როგორც ამბობთ, პარტია დატოვეთ, თუმცა ჩოხატაურის საკრებულოში დღემდე ფუნქციონირებს ფრაქცია "ქართული ოცნება _ თავისუფალი დემოკრატები"… ეს როგორ გავიგოთ?

_ ფრაქციის გაუქმებას მისი წესი აქვს და სამანდატო კომისიამ უნდა გააუქმოს. ამდენ ხანს გაუქმდებოდა იმ შემთხვევაში, თუკი განაცხადები იქნებოდა.

_ თქვენ რატომ არ გააკეთეთ განა­ც­ხადი?

_ მე გავაკეთე განცხადება და ვთქვი, რომ ვრჩებოდი უმრავლესობაში. მე ვარ უმრავლესობაში.

_ ფრაქცია ხომ "თავისუფალი დემოკრატების" მიერ არის შექმნილი?

_ არა. ფრაქციას ჰქვია "ქართული ოცნება _ თავისუფალი დემოკრატები", _ დააზუსტა სიხარულიძემ.

ამ თემაზე კომენტარს არ აკეთებს ფრაქციის წევრი მანანა მინდაძე, რომლის თქმით, უახლოეს ხანში მიიღებენ გადაწყვეტილებას და შესაბამის განცხადებასაც გააკეთებენ:

_ ამაზე იმსჯელებს ფრაქცია და განცხადებას შემდეგ გავაკეთებთ, _ გვითხრა მინდაძემ, რომელიც არ პასუხობს შეკითხვას, რჩება თუ არა "თავისუფალ დემოკრატებში".

ფრაქციის ხელმძღვანელი ერეკლე უღრელიძე "გურია ნიუსთან" საუბრისას ამბობს, რომ "ქართული ოცნების" ჩამოცილების საჭიროება არ დამდგარა:

_ რა ვიცი, ასე ერქვა და ჰქვია ფრაქციას. არ დამდგარა "ქართული ოცნების" ჩამოცილების საკითხი, _ აღნიშნა უღრელიძემ ჩვენთან საუბრისას.

ფრაქციის თავმჯდომარე ამბობს, რომ წევრებს პარტიიდან და შესაბამისად, ფრაქციიდან გასვლის შესახებ მისთვის არ უცნობებიათ:

_ ჩემთან, როგორც ფრაქციის თავმჯდომარესთან, არანაირი განცხადება არ შემოსულა. მე, პირადად, ვრჩები "თავისუფალ დემოკრატებში" და არსად წასვლას არ ვაპირებ, _ თქვა უღრელიძემ.

საკრებულოს სამანდატო, საპროცედურო და ეთიკის საკითხთა კომისიის თავმჯდომარე მარინა ბერაძე ამბობს, რომ ფრაქციის არც ერთ წევრს მისთვის განცხადებით არ მიუმართავს, შესაბამისად, ფრაქციის გაუქმების საკითხს ვერ დააყენებდა:

_ მე მაქვს არაოფიციალური ინფორმაცია, რომ ბატონმა ვლადიმერმა დატოვა ფრაქცია. ველოდები, კომისიაში განცხადებას როდის შემოიტანენ. ამ დრომდე მსგავსი განცხადება არც კომისიაში შემოსულა და არც საკრებულოზე გაუკეთებიათ განცხადება. თუკი კომისიას არ მომართეს, შემდეგ მოვიკითხავთ ჩვენ, _ აღნიშნა ჩვენთან საუბრისას ბერაძემ.

ახალგაზრდა იურისტთა ასოციაციის ოზურგეთის ოფისის ხელმძღვანელის თამაზ ტრაპაიძის თქმით, ეს ძალიან საინტერესო თემაა:

_ უნდა ინახოს, დაწერა თუ არა განცხადება წერილობით სიხარულიძემ და ჩააბარა თუ არა პარტიის ოფისს. ამ შემთხვევაში, უნდა დაიშალოს ფრაქცია.  თუკი პარტია რეალურად აქვს დატოვებული და ფრაქცია არსებობს, ძალიან საინტერესო თემაა. თუ არ დაუტოვებია და ატყუებს პარტიასაც, ეგ მისი საქმეა. თუმცა, თუ დატოვებული აქვს, გამოდის, რომ ბიუჯეტს ატყუებს. ორი ვარიანტია _ ან საზოგადოებას ატყუებს, ან ბიუჯეტს, ან ორივეს ერთად, _ გვითხრა ტრაპაიძემ.

როგორც გავარკვიეთ, ვლადიმერ სიხარულიძეს "თავისუფალი დემოკრატების" ცენტრალური ოფისისთვის პარტიიდან გასვლის თაობაზე არ მიუმართავს. მსგავსი განცხადება არც პარტიის რაიონულ ორგანიზაციაშია შესული.

ჩოხატაურის მუნიციპალიტეტის საკრებულოს თავმჯდომარე ზაალ მამალაძე ამბობს, რომ ამ საკითხს იურიდიული კომისია უახლოეს დღეებში განიხილავს:

_ ბატონო ზაალ, 5 თვეა რაც "თავისუფალმა დემოკრატებმა" კოალიცია დატოვეს, თუმცა, ჩოხატაურის საკრებულოში დღემდე რჩება ფრაქცია "ქართული ოცნება _ თავისუფალი დემოკრატები". ამ ხუთი თვის განმავლობაში რა აქტივობები განახორციელა ფრაქციამ?

_ ფრაქციის საკითხს უახლოეს დღეებში განიხილავს იურიდიული კომისია. რაც შეეხება აქტივობებს, ამ ფრაქციის  ყველა საკითხის განხილვაში აქტიურად მონაწილეობდნენ, წერდნენ თავიანთ დასკვნებს. ფრაქცია ბიუჯეტის განხილვის დროსაც აქტიურობდა და ხმაც მისცა, _ გვითხრა მამალაძემ.

ჩოხატაურის მუნიციპალიტეტის გამგეობის საფინასო სამსახურის უფროსის გელა ლომინეიშვილის ინფორმაციით, 2014 წლის ნოემბრიდან დღემდე, ჯამში, ფრაქცია "ქართული ოცნება _ თავისუფალი დემოკრატების" თავმჯდომარეს ერეკლე უღრელიძეს ხელფასის სახით, ხელზე აღებული აქვს 5 640 ლარი, ფრაქციას მიღებული აქვს 870 ლარის ღირებულების საწვავი და 160 ლარი დახარჯულია ტელეფონისა და ინტერნეტის მოდემისთვის.