ახალგაზრდა ფინანსისტთა და ბიზნესმენთა ასოციაცია ფარმაცევტული ბაზრის კვლევას იწყებს, ამის შესახებ აფბას ვიცე-პრეზიდენტმა გიორგი კაპანაძემ, დღეს გამართულ პრესკონფერენციაზე განაცხადა და აღნიშნა, რომ ხელისუფლებამ მედიკამენტებისა და სამედიცინო მომსახურების მოსალოდნელ გაძვირებას ყურადღება უნდა მიაქციოს.
აფბას კვლევის ძირითადი მიმართულებებია: მედიკამენტებისა და სამედიცინო სერვისების ხარისხი და ფასწარმოქმნა, მედიკამენტებზე მოსახლეობის ხელმისაწვდომობა.
"კვლევის პირველსავე ეტაპზე გამოიკვეთა შემაშფოთებელი ტენდენცია. კერძოდ, დოლარისა და ევროს მიმართ ლარის დევალვაციის გამო იზრდება სოციალურად დაუცველი ადამიანების რიცხვი, რომელთათვისაც სულ უფრო ძნელი ხდება საჭირო მედიკამენტებისა და სამედიცინო მომსახურებების მიღება. ამდენად, ფასების მოსალოდნელი მატება კიდევ უფრო ამძიმებს მოსახლეობის სოციალურ ყოფას და სახელმწიფომ ყველა ღონე უნდა იხმაროს მდგომარეობის შესამსუბუქებლად," _ განაცხადა გიორგი კაპანაძემ.
ახალგაზრდა ფინანსისტების შეფასებით, გასათვალისწინებელია ის ფაქტი, რომ მთავრობას არ გააჩნია რეალური ბერკეტები, რათა წინ აღუდგეს ლოკალურად ამ დარგში ფასების მატებას.
"აუცილებელია კომპლექსური მიდგომა და ხარჯეფექტიანობის ინოვაციური მეთოდების დანერგვა, რათა დარეგულირდეს პრობლემები, როცა უბრალო ადამიანი აფთიაქში, ხოლო სახელმწიფო სამედიცინო მომსახურებაში იხდის 3-4-ჯერ მეტს, ვიდრე ეს სხვა ქვეყნებშია. აღნიშნული ტენდენცია საფრთხეს უქმნის არამხოლოდ საყოველთაო ჯანდაცვის სისტემაში, ბოლო წლების განმავლობაში, მიღწეულ დადებით შედეგს, არამედ ქვეყნის სტაბილურობასაც. ჯანდაცვის ხელმისაწვდომობა, განსაკუთრებით კი მედიკამენტებზე ოპტიმალური ფასები ის საკითხია, რომლის მოუგვარებლობამაც, შესაძლოა სოციალური აფეთქების პროვოცირებაც კი მოახდინოს", _ განაცხადა კაპანაძემ.
ახალგაზრდა ფინანსისტთა და ბიზნესმენთა ასოციაცია მოუწოდებს ხელისუფლებას, დააჩქაროს მედიკამენტების ბაზრისა და სამედიცინო მომსახურების ისეთ სისტემაზე გადასვლა, რომელიც მოიტანს ევროპულ ხარისხს და ხელმისაწვდომ ფასებს.
კაპანაძის განცხადებით აუცილებელია მოხერხდეს ხარჯეფექტიანობის ოპტიმალური სისტემის შემუშავება ქვეყნის ჯანდაცვის სისტემაში არსებულ ყველა სერვისსა და მომსახურებაზე. მისივე პოზიციით, აუცილებლად უნდა მოხდეს მედიკამენტებზე ფასწარმოქმნის გამჭვირვალობის უზრუნვეყოფა, რათა ყველა დაინტერესებულ პირს ჰქონდეს წვდომა და სრული ინფორმაცია მედიკამენტების ფასწარმოქმნის პროცესთან დაკავშირებით.
"აუცილებელია შემუშავდეს შესაბამისი საკანონმდებლო ინიციატივა და მოხდეს კერძო და სახელმწიფო საკუთრებაში არსებული სამედიცინო ცენტრების, ასევე პირველადი ჯანდაცვის დაწესებულებების ანგარიშვალდებულობის გამჭვირვალობის გაზრდა. საამისოდ მნიშვნელოვანია საუკეთესო საერთაშორისო გამოცდილების გაზიარება და მისი ქართულ სინამდვილეში დროული ადაპტაცია," _ განაცხადა აფბას ვიცე-პრეზიდენტმა.
