სახელმწიფო აუდიტის სამსახურმა საქართველოს პარლამენტის აპარატის ფინანსური აუდიტის ანგარიში გამოაქვეყნა, რომელიც რომელიც 2014 წლის 1 იანვრიდან 2014 წლის 31 დეკემბრის პერიოდს მოიცავს.
დოკუმენტის თანახმად, საქართველოს პარლამენტის აპარატში 2014 წლის განმავლობაში შრომის ანაზღაურების მუხლით სულ გაცემულია 23745.8 ათასი ლარი. მათ შორის: თანამდებობრივი სარგო 9,366.147; დანამატი 10,861.480; პრემია 2,148.139; კომპენსაცია 1,370.020.
საქართველოს 2014 წლის სახელმწიფო ბიუჯეტის შესახებ კანონის მიხედვით საქართველოს პარლამენტის აპარატის მომუშავეთა რაოდენობა განისაზღვრა 840 მუშაკის ოდენობით.
დამტკიცებული საშტატო განრიგის მიხედვით 2014 წლის 1 იანვრის მდგომარეობით პარლამენტის აპარატის საშტატო ოდენობამ შეადგინა 603 თანამშრომელი. ხოლო 2014 წლის 31 დეკემბრისათვის 617 თანამშრომელი.
ფაქტიურად დასაქმებულთა რაოდენობამ კი პარლამენტარების ჩათვლით შეადგინა 706 თანამშრომელი.
2014 წლის განმავლობაში შტატგარეშე მომუშავე 269 თანამშრომელზე გაცემულია 4,322.5 ათასი ლარი.
დებიტორული დავალიანება
2015 წლის 1 იანვრის მდგომარეობით დებიტორული დავალიანება შეადგენს 225.8 ათას ლარს, აქედან 75.6 ათასი ლარის ოდენობის დებიტორული დავალიანება წარმოადგენს 1996- 2005 წლებში წარმოშობილ დავალიანებებს, რომელთა ამოღების მიზნით 2008 წლის შემდგომ პერიოდში გატარებული ღონისძიებების შესახებ დოკუმენტები წარმოდგენილი ვერ იქნა.
კრედიტორული დავალიანება
2015 წლის 1 იანვრის მდგომარეობით პარლამენტის ბალანსზე ირიცხება 3,808.5 ათასი ლარის კრედიტორული დავალიანება, მათ შორის 1996-2007 წლებში წარმოშობილი კრედიტორული დავალიანებები შეადგენს 3,807.3 ათასი ლარს3 . საიდანაც 2,776.3 ათასი ლარი წარმოადგენს სხვადასხვა ორგანიზაციებზე მომსახურეობითა და მოწოდებით წარმოშობილ დავალიანებას.
დებიტორ-კრედიტორულ დავალიანებების ინვენტარიზაცია საანგარიშო პერიოდში არ ჩატარებულა, რითაც დარღვეულია საქართველოს ფინანსთა მინისტრის 2010 წლის 23 ივლისის N605 ბრძანების მე-4 მუხლის პირველი პუნქტის „კ“ ქვეპუნქტის მოთხოვნები ფინანსური მოთხოვნებისა და ვალდებულებების ინვენტარიზაციის შესახებ.
ძირითადი საშუალებების აღრიცხვა
საპარლამენტო საქმიანობის აღდგენის მიზნით საქართველოს პარლამენტის აპარატის მიერ 2013 წლის 21 ოქტომბერს და 2013 წლის 24 დეკემბერს ,,SONY PROFESSIONAL SOLUTIONS MEA FZ LLC”-თან და JSG ,,Ares Line”-თან გამარტივებული შესყიდვის ფორმით გაფორმებული ხელშეკრულებების5 ( N 1013 და N 24/12/10) შესაბამისად, 2014 წლის იანვარიდან 2014 წლის აგვისტომდე პერიოდში მოწოდებული იქნა სულ 11,509.5 ათასი ლარის ღირებულების სხვადასხვა სახის მატერიალური ფასეულობა.
კერძოდ შესყიდულია 11,110.0 ათასი ლარის ღირებულების, პარლამენტის სხდომების პირდაპირი ტელერადიო-ტრანსლაციისათვის, სხდომათა დარბაზის, ბიუროს ოთახების, საკომიტეტო მოსმენებისა და სასერვერო და საკომუნიკაციო ოთახების აღჭურვა-მოწყობისათვის საჭირო შესაბამისი ტექნიკური მოწყობილობები და 398.5 ათასი ლარის ღირებულების სავარძლები.
აღნიშნული მატერიალური ფასეულობების ღირებულება ბუღალტრულად მიკუთვნებულია და აღრიცხულია ბალანსის შენობა ნაგებობების მუხლში და ცვეთის სახით დარიცხულია 115.1 ათასი ლარი (ღირებულების 1%), მაშინ როცა აღნიშნული მატერიალური ფასეულობების ძირითადი ნაწილი თავისი ფუნქციური დანიშნულებისა და მომსახურების ვადებიდან გამომდინარე არ წარმოადგენენ პარლამენტის შენობა- ნაგებობების განუყოფელ ნაწილს და მათთან დაკავშირებული ეკონომიკური სარგებლის მიღება ხდება სხვადასხვა დროს.
აღნიშნულიდან გამომდინარე ასეთი სახის მატერიალური ფასეულობები ექვემდებარებოდა ბალანსის მანქანა-დანადგარებისა და ინვენტარის მუხლში აღრიცხვას და ცვეთის დარიცხვის განსხვავებული ნორმების გამოყენებას. კერძოდ 209.7 ათასი ლარის ღირებულების გორგოლაჭებიან სავარძელზე ცვეთის სახით დარიცხულია (1%) 2.1 ათასი ლარი, ფაქტიურად კი ცვეთის არსებული ნორმიდან გამომდინარე (10%) დარიცხვას ექვემდებარებოდა 21.0 ათასი ლარი.
დარღვეულია ,,ბიუჯეტის დაფინანსებაზე მყოფი ორგანიზაციების ბუღალტრული აღრიცხვის შესახებ“ ფინანსთა მინისტრის 2007 წლის 28 დეკემბრის N1321 ბრძანებით დამტკიცებული ინსტრუქციის 24-ე მუხლის მე-4 პუნქტისა და ,,ბიუჯეტის დაფინანსებაზე მყოფი ორგანიზაციების ძირითადი აქტივების ფიზიკური ცვეთის ნორმებისა და მათი ბუღალტრულ აღრიცხვაში ასახვის შესახებ“ ფინანსთა მინისტრის 2002 წლის 31 დეკემბრის N 439 ბრანებით დამტკიცებული ინსტრუქციის პირველი მუხლის მე-4 პუნქტის მოთხოვნები.
სატრანსპორტო საშუალებებზე გაწეული საწვავის ხარჯი
პარლამენტის არაფინანსური აქტივების ანალიზური აღრიცხვის ინფორმაციის შესაბამისად (ბალანსის დანართი ფორმა 6) 2014 წელს სატრანსპორტო საშუალებებზე გაწეული საწვავის ფაქტიური და საკასო ხარჯი შეადგენს 770.8 ათას ლარს.
საწვავის მომწოდებელი კომპანიების მიერ (შპს,,ლუკოილ ჯორჯია“ და შპს,,რომპეტროლ საქართველო“) მოწოდებული ანგარიშფაქტურებისა და აუდიტის პერიოდში აპარატის ავტოტრანსპორტით უზრუნველყოფის განყოფილების მიერ წარმოდგენილი ცნობის მიხედვით კი 2014 წელს სატრანსპორტო საშუალებებზე გაწეული საწვავის ფაქტიურმა 7 ხარჯმა შეადგინა 760.8 ათასი ლარი.
შესაბამისად საწვავის ფაქტიური ხარჯი წარმოდგენილია 10.0 ათასი ლარით მეტი.
პარლამენტის თბომომარაგება
აუდიტით დადგენილ იქნა, რომ საქართველოს პარლამენტის ადმინისტრაციული შენობის თბომომარაგება ხორციელდება ქ.თბილისში ნიაღვრის ქუჩაზე მდებარე შენობაში განთავსებული საქვაბიდან. აღნიშნულ მისამართზე მდებარე მიწა და მასზედ განთავსებული შენობა ბუღალტრულად პარლამენტის ბალანსზე აღრიცხული არ არის. (ბუღალტრულად აღრიცხულია მხოლოდ შენობაში განთავსებული საქვაბე დანადგარი).
აღნიშნულ ფართთან დაკავშირებით ირკვევა, რომ ქ. თბილისის მუნიციპალიტეტის კაბინეტის 1997 წლის 18 დეკემბრის N 25.09.1285 დადგენილების შესაბამისად საქართველოს პარლამენტის ადმინისტრაციული შენობის დამოუკიდებელი თბომომარაგების წყაროს შექმნის მიზნით პარლამენტს იჯარით გადაეცა N 9 თბოსადგურის ნაწილი, კერძოდ კი არსებული შენობის მარცხენა მხარის 170 კვ.მ. და ერთი საკვამლე მილი.
აღნიშნული ფართის პარლამენტისათვის იჯარით გადმოცემისა (საიჯარო ხელშეკრულება, მიღება- ჩაბრების აქტი) და საიჯარო ქირის გადახდის დამადასტურებელი დოკუმენტები წარმოდგენილი ვერ იქნა. ქ.თბილისის მერიის ქონების მართვის სააგენტოს ელ.რუკის მიხედვით აღნიშნულ მისამართზე არსებულ 309.57 კვ.მ. მიწის ნაკვეთს მინიჭებული აქვს საკადასტრო კოდი N 01.15.05.059.011. თუმცა, აღნიშნული კოდით საჯარო რეესტრის ამონაწერი არ იძებნება და შესაბამისად დაუდგენელია დღეის მდგომარეობით აღნიშნული მიწის მესაკუთრე.
საჩუქრების სახით მიღებული მატერიალური ფასეულობა
წარმოდგენილი ცნობის მიხედვით პარლამენტის აპარატში 2015 წლის 1 იანვრის მდგომარეობით რაოდენობრივად ირიცხება 299 დასახელების სხვადასხვა წლებში საჩუქრების სახით მიღებული მატერიალური ფასეულობა.
აღნიშნული მატერიალური ფასეულობა შეფასებული და ბუღალტრულად ბალანსზე აღრიცხული არ არის.
