რამდენიმე წუთის წინ რუსთავი2-ის გადამღებ ჯგუფს ბათუმის ვიცე-მერმა ოფიციალური წერილი გადასცა.
ტელეკომპანიის ცნობით, ბათუმის მერია კომპანიას ანბანის კოშკთან კონცერტის გამართვაზე უარს ეუბნება.
ვიცე-მერმა უარის შესახებ განმარტებები გააკეთა და განაცხადა, რომ დაახლოებით 1 თვის წინ დაიგეგმა ფესტივალი, რომელიც ქალაქის სხვადახვა წერტილში უნდა გაიმართოს, მათ შორის ანბანის კოშკთანაც, სადაც რუსთავი2-ის კონცერტი იგეგმება.
კორესპონდენტის კითხვაზე, არის თუ არა შესაძლებელი სხვა ტერიტორიაზე კონცერტის გამართვა, ვივე-მერი აცხადებს, რომ ამ ეტაპზე რუსთავი2-თვის ყველა ადგილი დაკავებულია.
თუმცა, კურიერმა მოიპოვა პროგრამა, სადაც განრიგია გაწერილი. ნუსხაში ანბანის კოშკის ტერიტორიაზე, სადაც რუსთავი2-ის კონცერტი იგეგმება, არანაირი ღონისძიება დაგეგმილი არ არის.
რუსთავი2-ს სურდა, უარის მიზეზების შესახებ ბათუმის მერისგან მიეღო განმარტებები. თუმცა, მერიაში განაცხადეს, რომ გიორგი ერმაკოვი ადგილზე არ იმყოფებოდა. როგორც მოგვიანებით გაირკვა, მერი ადგილზე იყო და მის კაბინეტთან კი დაცვის პოლიცია იყო მობილიზებული.
_ "თავისუფლად სუნთქვის" სეზონი ოფიციალურად დახურულად გამოცხადდა. ქუთაისის და ფოთის შემდეგ, ბათუმის მერიამაც უარი გვითხრა კონცერტის ჩატარებაზე. არა მარტო ანბანის კოშკთან – ყველგან. ყველგან კონცერტიაო. ალბათ ყველგან შუფუტინსკი მღერის.
პოლიტიკური მიზნები რომ მქონდეს, ზუსტად ის მაწყობს, რასაც აკეთებთ. მაგრამ მარკეტინგული მიზნები მაქვს და ხალხის გართობა მინდა. ამიტომაც ვზარალდებით ჩვენც და ხალხიც.
ნუ თქვენს დაზარალებაზე ლაპარაკი აღარც ღირს უკვე, _ ასე ეხმაურება სოციალურ ქსელში ბათუმის მერიის გადაწყვეტილებას "რუსთავი 2"-ის გენერალური დირექტორი ნიკა გვარამია.
