2015 წლის ბოლომდე, საქართველოს ენერგეტიკისა და წყალმომარაგების მარეგულირებელი ეროვნული კომისია ენერგეტიკის სექტორში 16 ტარიფის გადახედვას გეგმავს.
საუბარია "ენერგო პრო ჯორჯიას“ გადაცემის, გენერაციის და სამომხმარებლო ტარიფზე.
ამის შესახებ, სემეკის თავმჯდომარემ, ირინა მილორავამ, დღეს, კომისიის მუშაობის ანგარიშის პრეზენტაციისას განაცხადა.
როგორც მილორავამ განმარტა, სემეკის ამოცანაა, ტარიფები ყოველწლიურად გადაიხედოს.
"საუბარია გადაცემის ტარიფებზე, ენერგო პრო ჯორჯიას“ გენერაციის ტარიფებზე, ასევე, დაგეგმილია, სამომხმარებლო ტარიფის რიგითი გადახედვაც. ჩვენ გვინდა ტარიფები ყოველწლიურად გადაიხედოს, რადგან ვიცოდეთ, რა მდგომარეობაში არიან კომპანიები და როგორ ასრულებენ საინვესტიციო გეგმებს, მასზე დაკისრებულ მოვალეობებს.
როგორც გახსოვთ, "ენერგო პრო ჯორჯიას“ ტარიფი წლის ბოლომდე იყო დადგენილი და ის აუცილებლად უნდა გადახედულიყო. მაშინ ტარიფის ცვლილების აუცილებლობა დოლარის კურსის ცვლილებამ გამოიწვია. ახლა კი, არსებით ცვლილებებს არ ველოდებით, რადგანაც ეს გეგმიური ცვლილებაა. დაახლოებით, კიდევ 6 სხდომაა დანიშნული და 31 დეკემბრამდე ეს ტარიფები უკვე გვეცოდინება.
მიმდინარე წელს მხოლოდ ელექტრო ენერგეტიკულ სექტორში მოხდა ტარიფების ზრდა. გაზის სექტორში არ მომატებულა. რაც შეეხება წყალმომარაგების სექტორს, განხილული ოთხი ტარიფიდან თბილისში იგივე ტარიფი დარჩა, მცხეთის წყალში ოდნავ გაიზარდა გამრიცხველიანებულ სექტორში, რუსთავის წყალში კი, პირიქით, ტარიფი შემცირდა.
მიმდინარე საჯარო ადმინისტრაციული წარმოებები, ძირითადად აქ არის გადაცემის კომპანიების ტარიფები, საქმე ეხება სახელმწიფო ელექტროსისტემას და "ენერგო ტრანსს“; ასევე, "ენერგო პრო ჯორჯიას“ საკუთრებაში არსებულ ტარიფებს და თვითონ "ენერგო პრო ჯორჯიას“ მოხმარების და განაწილების ტარიფსაც“, _ აღნიშნა ჟურნალისტებთან საუბრისას მილორავამ.
მისივე განცხადებით, 2016 წელს, გაზის და წყალმომარაგების სექტორის ტარიფების გადახედვაც იგეგმება.
"მომავალი წლისთვის, ვფიქრობთ, დავიწყებთ ბუნებრივი გაზის სექტორში ტარიფების გადახედვას და ასევე, წყალმომარაგების სექტორში გაერთიანებული წყალმომარაგების კომპანიის ტარიფის გადახედისთვის კონკრეტულ საქმიანობას განვახორციელებთ. ეს არ იქნება მარტივი პროცესი. პირველი და მთავარი ის არის, რომ რეგულირებადი აქტივების ბაზა შემოწმდეს ამ კომპანიებში. ბუნებრივი გაზის სექტორში ეს უკვე განხორციელდა "სოკარის“ კომპანიებთან მიმართებაში და იგივე იქნება წყალმომარაგების კომპანიებთან დაკავშირებითაც“, _ აღნიშნა მილორავამ.
რაც შეეხება ტარიფის მატების წინასწარ პროგნოზს, მილორავა ამბობს, რომ ამის თქმა წარმოუდგენელია.
"წინასწარ ამის შეფასება შეუძლებელია“, _ ამბობს მილორავა.
სემეკის თავმჯდომარემ ანგარიშის წარდგენისას განაცხადა, რომ საქართველოს ენერგეტიკისა და წყალმომარაგების მარეგულირებელი ეროვნული კომისიის საქმიანობაში 2015 წელი მნიშვნელოვანი აქტივობებით გამოირჩეოდა.
"ენერგეტიკისა და წყალმომარაგების სექტორების განვითარებისათვის კომისიამ არაერთი ნორმატიული აქტი შეიმუშავა, განხორციელდა სატარიფო ცვლილებები. გაგრძელდა მომხმარებელთა უფლებების დაცვა, საზოგადოებასთან მჭიდრო კომუნიკაცია, რაც ერთ-ერთი ძირითადი პრიორიტეტია კომისიის საქმიანობაში.
ტარიფის ცვლილების მიზნით მიმდინარე წელს კომისიას მომართეს თბოელექტროსადგურებმა და გამანაწილებელმა კომპანიებმა. მომართვის საფუძვლად დასახელდა აშშ დოლართან მიმართებაში ეროვნული ვალუტის გაცვლითი კურსის მკვეთრი ცვლილება, რომელმაც საგრძნობლად გაზარდა კომპანიების ხარჯები. სატარიფო მეთოდოლოგიის საფუძველზე, რომელიც სრულად ითვალისწინებს საუკეთესო პრაქტიკასა და საერთაშორისო სტანდარტებს, კომისიამ დაიწყო ტარიფების გადახედვა და დაადგინა სამართლიანი ტარიფები.
კომისიის მიზანია, რომ მისი საქმიანობა იყოს გამჭვირვალე და თითოეულ საკითხზე მოხდეს საზოგადოების სრული ინფორმირებულობა. შესაბამისად, ტარიფების გაანგარიშების პროცესში მოხდა საზოგადოების მაქსიმალური ჩართულობა. გაიმართა საჯარო შეხვედრები, სს "თელასის“ ტარიფების დადგენასთან დაკავშირებით თითოეულ კომპონენტზე ცალ-ცალკე მოეწყო საჯარო მოსმენები. დოკუმენტაცია სრულად განთავსდა კომისიის ვებ-გვერდზე. აღმოიფხვრა ყველა პრობლემა, რომელიც ამ მიმართულებით ინფორმაციის ხელმისაწვდომობას ართულებდა“, _ აღნიშნა მილორავამ.
მისივე თქმით, წლის განმავლობაში მოიმატა მოქალაქეთა მომართვიანობამ ხანდაზმულ დავალიანებებთან, უსაფუძვლოდ დარიცხულ თანხებთან დაკავშირებით.
"მონაცემების შესაბამისად, საჯარო სხდომებზე კომისიის მომხმარებელთა საჩივრების დეპარტამენტისა და ენერგოომბუდსმენის ოფისის მიერ წარმოდგენილი დავების შესახებ კომისიის მიერ მიღებული გადაწყვეტილებების საფუძველზე, მომხმარებლებს ჯამში 2 მილიონ ლარზე მეტი ჩამოეწერათ.
საყოფაცხოვრებო მომხმარებლებისათვის გაუქმდა სასმელი წყლის მრიცხველის 100 ლარიანი გადასახადი. წყალმომარაგების კომპანია ვალდებულია საყოფაცხოვრებო მომხმარებელს, რომელიც სასმელ წყალს იყენებს საყოფაცხოვრებო მიზნებისათვის, უფასოდ დაუმონტაჟოს მრიცხველი. "სასმელი წყლის მიწოდებისა და მოხმარების“ წესებით განისაზღვრა ახალი მომხმარებლის წყალმომარაგების ქსელზე მიერთების ვადები, პროცედურები და შესაბამისი მომსახურების ღირებულება.
კომისია მუშაობს წყალმომარაგების სექტორში მომსახურების კომერციული ხარისხის წესებზე, რომლის საფუძველზეც მინიმუმამდე შემცირდება არაგეგმიური გათიშვები, განისაზღვრება მოქალაქის ზარზე ქოლ-ცენტრის პასუხის ოპერატიულობის დრო, კომპანიის მხრიდან წესებით განსაზღვრული სტანდარტების დარღვევის შემთხვევაში ამოქმედდება კომპენსირების მეთოდი“, _ განმარტა მილორავამ.
მისივე ინფორმაციით, ელექტროენერგეტიკის სექტორში შემუშავდა და დამტკიცდა ელექტროენერგიის "ქსელის წესები“.
"ელექტროენერგიის ნორმატიული დანაკარგების გაანგარიშების ახალი წესის შესაბამისად, რომელიც ასევე ითვალისწინებს საუკეთესო საერთაშორისო პრაქტიკას, გაანგარიშდა სს "თელასის“ ნორმატიული დანაკარგები და იგი 12.4%-იდან 5.34%-მდე შემცირდა.
დამტკიცდა "ბუნებრივი გაზის გამანაწილებელ ქსელში ნორმატიული დანაკარგების წესი“, რომელიც ითვალისწინებს ნორმატიული დანაკარგების სამიზნე მაჩველებლების დადგენით, გამანაწილებელ ქსელზე ფაქტობრივი დანაკარგების შემცირების სტიმულირებას.
წარმატებით გრძელდება ბუნებრივი გაზის ქსელზე ახალი მომხმარებლის მიერთების 400 ლარიანი პაკეტით სარგებლობა. წელს, სრულად გაზიფიცირებული დასახლებული პუნქტების ჩამონათვალს 58 სოფელი დაემატა და დღეისათვის, 627 დასახლებულ პუნქტშია შესაძლებელი 400 ლარიანი პაკეტით სარგებლობა.
ბუნებრივი გაზის სექტორში მნიშვნელოვანი პროცესი დასრულდა, მოხდა სს "საჩხერეგაზის“, სს "საქორგგაზის“, შპს "სოკარ ჯორჯია გაზის“ ბუნებრივი გაზის განაწილების სამოქმედო არეალების გაფართოვება. ეს პროცესი ხელს შეუწყობს რეგიონების სრულად გაზიფიცირებას, სადაც ყველა მომხმარებელს შეეძლება ქსელზე მიერთების 400 ლარიანი პაკეტით სარგებლობა“, _ განმარტა მილორავამ და დასძინა, რომ მოქმედი კანონმდებლობის მიხედვით, სემეკის ვრცელი ანგარიშის წარდგენა მომავალი წლისთვის არის დაგეგმილი.
ანგარიშის წარდგენის შემდეგ, სემეკის თავმჯდომარემ მედია კლუბის წარმომადგენლები სერთიფიკატებით დააჯილდოვა და სიმბოლური საჩუქრები გადასცა.
