ირაკლი ღარიბაშვილმა პრემიერი-მინისტრის პოსტი ისე დატოვა, რომ არ უთქვამს სად მიდის და რატომ მიდის. თქვა მხოლოდ ის, რომ თანამდებობა მარადიული არ არის და ყველა ადამიანს აქვს არჩევანის უფლება. რამ განაპირობა ღარიბაშვილის ეს არჩევანი აწ უკვე ყოფილ პრემიერს არ დაუკონკრეტებია. მას არც მისი შემცვლელი დაუსახელებია:
_ წარმატებას ვუსურვებ მომავალ პრემიერს, _ მხოლოდ ამ სიტყვებით შემოიფარგლა ღარიბაშვილი.
თუ ვინ იქნება მომავალი პრემიერ-მინისტრი ჯერ საბოლოოდ არ გარკვეულა. ჩვენი ინფორმაციით, დიდი ალბათობით ეს საგარეო საქმეთა მინისტრი გიორგი კვირიკაშვილი იქნება. წყაროს მტკიცებით, კვირიკაშვილის გვარი ღარიბაშვილმა დღეს შეგნებულად არ დაასახელა _ გიორგი კვირიკაშვილს დედა გარდაეცვალა და დაკრძალვა ხვალაა.
ამის გამო, როგორც წყარო ამბობს, ღარიბაშვილის გადადგომა პარასკევს უნდა გახმაურებულიყო, თუმცა მოვლენები მას შემდეგ დაჩქარდა, რაც გავრცელდა ინფორმაცია, რომ ღარიბაშვილი მოსამართლე ლევან მურუსიძეს ლობირებს.
აღსანიშნავია, რომ დილით, „გურია ნიუსმა" ამავე წყაროზე დაყრდნობით, ექსკლუზიურად გაავრცელა ინფორმაცია, რომლის თანახმადაც, პრემიერის გადადგომა, წუხელ ბიძინა ივანიშვილთან შეთანხმდა. წყაროს ინფორმაცია დადასტურდა და დიდი ალბათობით პრემიერის პოსტზე კვირიკაშვილს დაასახელებენ, თუმცა ამ პოსტზე სამთავრობო კულუარებში დავით სერგეენკოს და დიმიტრი ქუმსიშვილიც გვარებმაც გაიჟღერა.
იმის გამო რომ ღარიბაშვილის საგანგებო განცხადების გაკეთების დროს მედია არ დაუშვეს, კითხვები ბევრი დარჩა. მათ შორის ისიც, შეეწირა თუ არა ღარიბაშვილი მურუსიძის უვადო მოსამართლეობის სურვილს. ერთადერთი რაც ამ თემასთან დაკავშირებით ცნობილია მურუსიძის და ღარიბაშვილის პირისპირ შეხვედრაა. მურუსიძის მტკიცებით შეხვედრაზე პრემიერს მოსამართლეების თხოვნა გადასცა და მის კანდიდატურაზე საუბარი არ ყოფილა.
სანამ დეტალები გაირკვევა, მანამდე საზოგადოება იმაზე მსჯელობს რა იქნება ხვალ. ჯერჯერობით დაზუსტებით მხოლოდ ისაა ცნობილი, რომ პრემიერთან ერთად უფლებამოსილება სხვა მინისტრებსაც შეეწყდათ.
კონსტიტუციის თანახმად, მთავრობის უფლებამოსილების შეწყვეტის შემთხვევაში, პრეზიდენტი შვიდი დღის ვადაში საპარლამენტო უმრავლესობის მხრიდან შეთავაზებულ პრემიერ-მინისტრობის კანდიდატს წარადგენს. თავის მხრივ, პრემიერ-მინისტრობის კანდიდატი შვიდი დღის ვადაში მინისტრთა კანდიდატურებს შეარჩევს და ნდობის მისაღებად პარლამენტს წარუდგენს. პარლამენტსაც შვიდღიანი ვადა აქვს გადაწყვეტილების მისაღებად.
თუ საპარლამენტო უმრავლესობამ ახალ პრემიერსა და მის გუნდს ნდობა სამჯერ ვერ გამოუცხადა, საქართველოს პრეზიდენტი ვალდებულია პარლამენტი დაითხოვოს და რიგგარეშე არჩევნები დანიშნოს.
აღსანიშნავია ისიც, რომ ჩვენი წყარო რამდენიმე მინისტრის გათავისუფლებასაც აანონსებს _ მათ შორის თამარ სანიკიძის, ნოდარ ხადურის და თეა წულუკიანის. გვითხრეს ისიც, რომ მინისტრებთან ერთად თანამდებობების დატოვება მხარის გუბერნატორებსაც მოუწევთ.
საპარლამენტო უმრავლესობის კულუარებში ამ ინფორმაციებს ადასტურებენ და აღნიშნავენ, რომ პრემიერის კანდიდატურაზე მსჯელობა ხვალიდან დაიწყება.
