შემოქმედელი მიტროპოლიტი იოსების საშობაო მილოცვა

შემოქმედელმა მიტროპოლიტმა იოსებმა მორწმუნეებს ქრისტეს შობის დღესასწაულის დადგომა ახარა და საშობაო მილოცვა გამოაქვეყნა. მილოცვაში მიტროპოლიტმა ძირითადი აქცენტი გაჭირვებულთა დახმარების აუცილებლობასა და საეკლესიო პირების მისამართით კრიტიკის საკითხებზე გააკეთა. „მოდით ერთი დღე სრულიად საქართველომ განკითხვის გარეშე გავატაროთ“ – ყველას მოუწოდებს მეუფე იოსები თავის მილოცვაში.
მილოცვის სრულ ტექსტს აქვე უცვლელად გთავაზობთ:
„ჩემო საყვარელო სულიერო შვილებო გილოცავთ შობას უფლისა ღვთისა მაცხოვრისა ჩვუენისა იესო ქრისტესი.
სამყარო ღმერთმა შექმნა და ღმერთზეა დაყრდნობილი, თვით სიტყვა სამყარო პირდაპირ მიგვანიშნებს ამას.[სამიმყარი ანუ მამა ძე და სული წმინდა რომელზეც დამყარებულია სოფელი ესე].უფალი მოგვიწოდებს,რომ ვეძიოთ იგი,ვიპოვოთ იგი და ყოველი ადამიანი რომელიც ეძებს ღმერთს აუცილებლად იპოვის მას.ვინც რასაც ეძებს იმას იპოვის.ამიტომ ვეძებოთ სიკეთე, ვიცხოვროთ სხვისთვის,დავეხმაროთ ადამიანებს, შევიწყალოთ ცოდვილი.არ განვიკითხოთ ერთმანეთი.მივიდეთ სავადმყოფოებში, ნუგეში მივაგოთ ავადმყოფებს,აგრეთვე პატიმრებს თუ სხვა გაჭირვებულთ,ყველას და ვინც ამას აკეთებს მის გულში შობილა ღმერთი იესო ქრისტე.
ხოლო ვინც ღმერთს არ ეძებს, არ ეხმარება გაჭირვებულთ და ცხოვრობს საკუთარი თავისთვის, არ ეზიარება ქრისტეს სისხლსა და ხორცს განიკითხავს ღმერთს და მის მღვდელს. ის ღვთის მოწყალების გარეშე დარჩება.
სამწუხაროდ დღეს ბევრი განიკითხავს სამღვდელოებას, კარგი და ცუდი ყველგან არის, ამიტომ ჯობს ჩვენი თავი განვიკითხოთ ვიდრე სხვა,თორემ ღმერთი იმ განკითხვით განგვიკითხავს როგორც ჩვენ განვიკითხავთ სხვას.
[უფალი ბრძანებს არ განიკითხოთ და არც მე განგიკითხავთ].
ყველაზე ცუდი მღვდელიც კი მორწმუნე ადამიანების შესაწირით ცხოვრობს, მას ხელფასი არა აქვს არც ეკლესიიდან და არც სახელმწიფოდან და ის რომ თითქოს სამღვდელოება და ეპისკოპოსები ხალხის ფულით ცხოვრობენ ეს მტკნარი სიცრუეა,ეს ცილისწამებაა,ცილისმწამებელი კი ეშმაკია. ეშმაკი ცილს წამებს ღმერთს და ადამიანს.
მოდით ერთი დღე სრულიად საქართველომ განკითხვის გარეშე გავატაროთ.
მე ვთხოვ ყველას ვინც განკითხვის ცოდვაშია, მოიდრიკოს გული და ენა თვისი და შეინანოს, თორემ შერცხვება განკითხვის დღეს სამყაროს წინაშე.
გთხოვთ ყველას შემინდოთ ეს კადნიერი სიტყვები,მაგრამ მიყვარხართ და ამიტომ გეუბნებით. რასაც მე ღმერთი მათქმევინებს.
წყალობა ღვთისა, მადლი უფლისა. სიყვარული ღვთისა და მოყვასისა იყავ თქვენ თანა აწ და მარადის და უკუნითი უკუნისამდე ამინ.
იოსები მიტროპოლიტი შემოქმედელი „.