თუ თოვლი არ არის და კარგი ამინდია, თებერვლიდან ღია გრუნტში შესაძლებელია დავთესოთ სხვადასხვა მწვანილეული და ბოსტნეული. მაგალითად: ოხრახუში, ნიახური, პრასი, თვის ბოლოკი, ცერცვი, სტაფილო. ამ ბოსტნეულ კულტურებს ღია გრუნტში თოვლი, ყინვა და სიცივე ვერ აზიანებს, ოღონდ ვეგეტაციის პერიოდი გახანგრძლივდება და დღის ხანგრძლივობის და ჰაერის სითბოს მატებასთან ერთად, მოხდება მცენარის ზრდაც.
შეგვიძლია, ამ ბოსტნეულის შერეული თესვაც მოვახდინოთ. მოვამზადოთ მოზრდილი კვალი _ ბაზო, სიგრძივად გავანოყიეროთ ნაკელით, წინასწარ მომზადებული კომპოსტით, მერე მოვაყაროთ მიწის თხელი ფენა და თანმიმდევრულად დავთესოთ მითითებული ბოსტნეული. ყველა ეს მწვანილეული თავის ირგვლივ ქმნის ერთგვარ ქიმიურ გარემოს, რომელიც კარგად მოქმედებს გვერდით მდებარე მეორე მცენარეზე. პრასი არ დავთესოთ ნიახურის გვერდით. გვერდი-გვერდ დათესვა ან დარგვა უფრო ნაყოფის მომცემ ბოსტნეულ კულტურებს _ პომიდორს, კარტოფილს, ლობიოს და ბარდას არ უყვარს. ნიორს განსაკუთრებით "სძულს" პომიდორი. კიტრი კარტოფილის სიახლოვეს არ გააჭაჭანოთ. დანარჩენი ბოსტნეული, მეტ-ნაკლებად, დათესილ-დარგული, ნაკლებად უშლიან ხელს ერთმანეთს. გაითვალისწინეთ ის გარემოება, რომ ვისაც დახურულ კვალ-სათბურებში გაქვთ აღნიშნული ბოსტნეული დათესილი, ეს იმას არ ნიშნავს, რომ ღია გრუნტში არ უნდა დათესოთ. დახურულად დათესილი ადრე ამოვა და ვეგეტაციასაც ადრე დაასრულებს. ღია გრუნტში დათესილი კი ისეთ დროს მოგისწრებთ, როცა ახალი მწვანილი გჭირდებათ.
