ლანჩხუთის მუნიციპალიტეტის გამგეობის შიდა აუდიტის სამსახურის გასული წლის ანგარიშის მიხედვით, შემოწმებას დაექვემდებარა ა(ა)იპ ლანჩხუთის მუნიციპალიტეტის საფეხბურთო კლუბ "გურიას" საქმიანობის 2011 წლიდან 2015 წლის პირველ ივლისამდე პერიოდი.
აღნიშნული ანგარიშის მიხედვით, კლუბში, რიგ შემთხვევაში, ადგილი ჰქონდა საბიუჯეტო სახსრების არამიზნობრივ ხარჯვას.
"ბიუჯეტის შესახებ არსებული კანონით, მიმდინარე ბიუჯეტით გათვალისწინებულ შემოსავალს არ შეიძლება აღემატებოდეს მიმდინარე ხარჯები. კერძოდ, შრომითი ხელშეკრულების და შესასყიდი საქონლის და მომსახურების ხელშეკრულებისას საერთო ხარჯის ჯამმა არ უნდა გადააჭარბოს დაგეგმილ შემოსავალს, რაც არ არის გათვალისწინებული აღნიშნულ ორგანიზაციაში _ ეს საბიუჯეტო სახსრების უყაირათო და არამიზნობრივ ხარჯვასა და დაგეგმვას ნიშნავს", _ ნათქვამია აუდიტის სამსახურის ანგარიშში.
შიდა აუდიტის დასკვნის მიხედვით, 2011 წელს კლუბს მუნიციპალიტეტის წერილობითი თანხმობის გარეშე სესხის სახით აღებული აქვს 180 ათასი ლარი; პრემიალური ანაზღაურების სახით კი გაიცა 92 087 ლარი, აქედან _ 54 870 ლარი 2010 წლის პრემიის დავალიანება იყო. 2012 წელს კი პრემიის სახით გაწეულმა ხარჯმა 238 243 ლარი შეადგინა. ამავე წლის ნოემბერში კლუბმა 220 ათასლარიანი სესხიც აიღო.
ამავე ანგარიშის მიხედვით, კლუბის ხელმძღვანელობამ პრემიები მომდევნო 2013 წელსაც გასცა და დარიცხული პრემიების ოდენობამ 254 796 ლარი შეადგინა; აქედან, 142 221 ლარი ანაზღაურდა, ხოლო 112 575 ლარი 2014 წლისთვის ნაშთად დარჩა.
აუდიტის დასკვნაში წერია, რომ "დაურეგულირებელია კლუბის ფეხბურთელების კვების პროდუქტებით და სპორტული ინვენტარით უზრუნველყოფის საკითხი, არ არის რაიმე სახის დოკუმენტი, რის საფუძველზეც უნდა მომხდარიყო ამა თუ იმ სახით პროდუქტის შეძენა, მის შემოსავალში აღება, შემდეგ კი ჩამოწერა. ასევე, არ ხორციელდება სპორტული ინვენტარის შემოსავალში აღების, ფეხბურთელებზე გაცემის და მათი ჩამოწერის დოკუმენტები.
არ არის მუნიციპალიტეტის საკრებულოს მიერ დამტკიცებული კლუბის საშტატო ერთეულები შესაბამისი სახელფასო ფონდებით, პრემიების ფონდი შესაბამისი დებულებით. შესყიდვები ნაწარმოებია შესაბამისი გეგმების გარეშე.
თანამშრომელთა ხელშეკრულებით აყვანა მომხდარია განუსაზღვრელი ოდენობით, შტატის გარდა 80 ერთეულამდე შტატგარეშე თანამშრომელია აყვანილი. მათი მიღება, ხშირ შემთხვევებში, მომხდარია გაურკვეველ პოზიციებზე".
კლუბის მიმართ შენიშვნებია 2014 წლის 2 აპრილს ინდ/მეწარმე სიმონ ღლონტისთვის კვების თანხის (3 000 ლარი) გადარიცხვაზე, რაზეც არ არის წარმოდგენილი სასაქონლო ზედნადები და მიღება-ჩაბარების აქტი.
დასკვნის მიხედვით, კლუბის ფინანსისტ აკაკი დობორჯგინიძის მიერ დანაშაულის ჩადენის ფაქტებს აქვს ადგილი:
"2015 წლის 27 იანვარს, დობორჯგინიძემ 2 000 ლარი გადარიცხა დაუდგენელი პიროვნების ანგარიშზე. მარტში საკუთარ ანგარიშზე მივლინებისთვის და საქვეანგარიშოდ მასვე აქვს 2 261 ლარი ჩარიცხული, რაზეც არ არის წარმოდგენილი შესაბამისი დოკუმენტაცია. ასევე, მის პირად ანგარიშზე 2015 წლის აპრილში ჩარიცხულია გ. ფაცურიას კუთვნილი ხელფასი 1 720 ლარი, გ. ფირცხალაიშვილის _ 650 ლარი, ნ. ხრიკაძის _ 300 ლარი და ე. ჟორდანიას _ 40 ლარი", _ წერია დასკვნაში.
კლუბის მიმართ, ასევე, შენიშვნებია ტენდერებსა და გამარტივებულ შესყიდვებთან დაკავშირებით, სადაც შესყიდვების ელექტრონული სააგენტოს საიტებზე არ არის ატვირთული რამდენიმე ხელშეკრულება, ხოლო ატვირთულ ხელშეკრულებებზე არ არის შესაბამისი დოკუმენტაციები, რითაც დარღვეულია ატვირთვის ათდღიანი ვადა.
შიდა აუდიტის სამსახურისთვის გაურკვეველია, რა მიზეზით არ მოხდა 2015 წლის იანვრიდან პირველ ივლისამდე საშემოსავლოსა და განაცემთა ინფორმაციების შევსება, შესაბამისად, მისი წარდგენა საგადასახადო ორგანოებში. ხოლო საშემოსავლო დეკლარაციის ჩაუბარებლობისთვის, ისედაც მძიმე ფინანსურ მდგომარეობაში მყოფი კლუბის ხელმძღვანელობა დაჯარიმდა 200-200 ლარით.
