2 ბინა, 2 მიწის ნაკვეთი, 2 საცხოვრებელი სახლი, ავტომანქანა, ავტოფარეხი და რამდენიმე მილიონი საბანკო ანგარიშებზე, _ ეს სპორტისა და ახალგაზრდულ საქმეთა მინისტრის ტარიელ ხეჩიკაშვილის ოჯახის ქონებაა.
უძრავი ქონება
ქონებრივი დეკლარაციის მიხედვით, ხეჩიკაშვილების მრავალსულიანი ოჯახი (მინისტრს 7 შვილი ჰყავს) ორ ბინას, ორ საცხოვრებელ სახლს, ორ მიწის ნაკვეთსა და ერთ ავტოფარეხს ფლობს. უძრავი ქონების მფლობელი, ავტოფარეხის გარდა, ხეჩიკაშვილის მეუღლე ეკატერინე ინასარიძეა.
კონკრეტულად, დეკლარაციის მიხედვით, ეკატერინე ინსარიძე ფლობს თბილისში, შავი ზღვის ქუჩაზე 63.21 კვ.მ–ის ფართობის ბინას, დიღმის სასწავლო საცდელი მეურნეობის ტერიტორიაზე, გრიგოლ რობაქიძის 7 ნომერში, 142.81 კვ.მ–ის ფართობის ბინას;
დიღმის სასწავლო საცდელი მეურნეობის ტერიტორიაზე, 1177.51 კვ.მ–ის ფართობისა და ამავე ტერიტორიაზე მეორე, 800.00 კვ.მ-ის ფართობის საცხოვრებელ სახლს;
მცხეთაში, სოფელ საგურამოში 1200.00 კვ.მ-ის ფართობის მიწის ნაკვეთს და თბილისში, დიღმის სასწავლო საცდელი მეურნეობის ტერიტორიაზე, 1000.00 კვ.მ-ის ფართობის მიწის ნაკვეთს;
დეკლარაციის მიხედვით, ტარიელ ხეჩიკაშვილი ერთადერთი უძრავი ქონების, თბილისში, რობაქიძის 7 ნომერში მდებარე 18.00 კვ.მ-ის ფართობის ავტოფარეხის მფლობელია.
ეკატერინე ინასარიძე ფლობს მსუბუქი ავტომანქანა volkswagen ტიგუანს, რომელიც 2011 წელს არის გამოშვებული.
შემოსავლები
ქონებრივი დეკლარაციის მიხედვით, ტარიელ ხეჩიკაშვილმა გასული წლის განმავლობაში საქართველოს სპორტისა და ახალგაზრდობის საქმეთა მინისტრის პოსტიდან 50 000 ლარის შემოსავალი მიიღო, შპს "იბერია ბიზნეს ჯგუფის" პრეზიდენტის თანამდებობიდან 87816.06 ლარის შემოსავალი, ხოლო შპს "ავტო ლიზინგ ჯორჯიას" ბიზნეს კონსულტანტის პოსტიდან – 6883.75 ლარი.
გარდა ამისა, დეკლარაციაში აღნიშნულია, რომ ტარიელ ხეჩიკაშვილმა შპს იბერია ავტო ცენტრიდან, საწარმოს საქმიანობიდან ერთი წლის განმავლობაში 2 647 368 ლარის შემოსავალი აქვს მიღებული; ხოლო შპს "კია მოტორს ჯორჯიადან", რომლის პარტნიორიცაა – 5 606 250 ლარი;
ჯამში კი, მინისტრის შემოსავალმა 8 398 317.81 ლარი მიიღო.
არღვევს თუ არა ტარიელ ხეჩიკაშვილი კანონს, როცა მინისტრის პოსტის პარალელურად სხვა თანამდებობებიც უჭირავს და შემოსავალსაც იღებს, ამ საკითხზე "გურია ნიუსი" კიდევ ერთ მასალას, მოგვიანებით შემოგთავაზებთ.
საბანკო ანგარიშები
დეკლარაციის შევსების მომენტში, მინისტრის ოჯახს ოთხ ბანკში 17 ანგარიში ჰქონდა გახსნილი. საერთო ჯამში ანგარიშებზე 1 045 359.36 დოლარი და 3471.98 ლარი იყო.
კერძოდ, ტარიელ ხეჩიკაშვილის მიმდინარე ანგარიშზე საქართველოს ბანკში 8689.52 დოლარი და ამავე ბანკის მიმდინარე ანგარიშზე 2563.48 ლარი იყო; კიდევ ერთ მიმდინარე ანგარიშზე საქართველოს ბანკში 3479.02 დოლარი ერიცხებოდა. საქართველოს ბანკის საკრედიტო ანგარიშზე კი 411166.40 დოლარი (დებეტი(-); თი–ბი–სი ბანკის მიმდინარე ანგარიშზე 44602.28 დოლარი; ამავე ბანკის საკრედიტო ანგარიშზე 44215.40 დოლარი (დებეტი(-); კიდევ ერთ საკრედიტო ანგარიშზე 277760.00 დოლარი (დებეტი(-) იყო.
ხეჩიკაშვილის მეუღლეს, ეკატერინე ინასარიძეს კი, საქართველოს ბანკის ვიზა ინფინიტის ანგარიშზე 22.97 ლარი და 80.80 დოლარი; ხოლო ვი–თი–ბი ბანკის მიმდინარე ანგარიშზე 90450.00 დოლარი ჰქონდა. ამავე ბანკში ინასარიძეს 4 ანაბარი აქვს გახსნილი სადაც დარიცხული თანხების ჯამური ოდენობა 150 000 დოლარი იყო;
რესპუბლიკა ბანკის საკრედიტო ანგარიშზე ინასარიძეს 14235.46 დოლარი ჰქონდა; ამავე ბანკის მიმდინარე ანგარიშზე 885.53 ლარი და 680.90 დოლარი ერიცხებოდა.
ფასიანი ქაღალდები
დეკლარაციის მიხედვით, ტარიელ ხეჩიკაშვილი 358 269 ლარის ფასიან ქაღალდებსაც ფლობს (ს/ს ვივი, აქცია, რაოდენობა – 23340; ერთი აქციის ფასი 15.35 ლარი).
სამეწარმეო საქმიანობა და წილები
სპორტისა და ახალგაზრდულ საქმეთა მინისტრი 18 შპს-ს პარტნიორი და ერთი შპს-ს აქციონერია, მისი მეუღლე კი, 9 საწარმოს პარტნიორია.
კერძოდ, შპს ავტო სერვის კავკასია, შპს ავტოსტილი, შპს კავკასუს მოტორსი, შპს იბერია ავტო, შპს იბერია ავტო ცენტრი, შპს იბერია ავტო ჰაუსი, შპს იბერია ავტო ლენდი, შპს იბერია სერვისი, შპს სენა ავტო, შპს კია მოტორს ჯორჯია, შპს იბერია ბიზნეს ჯგუფი, შპს სითი სპორტი, შპს ფეხბურთის საერთაშორისო საკონსულტაციო ჯგუფი; შპს იბერია კაპიტალ ინვესტი, შპს იბერია ინვესტი; შპს იტა სერვისი; შპს სპორტული კლუბი ოლიმპი, შპს სპორტ ინვესტი, ს/ს ვივი, საქართველო; შპს კავკასიის ავტო ცენტრი.
ხოლო ხეჩიკაშვილის მეუღლე 7 შპს-ს პარტნიორია – შპს კრეს ავტო ჰაუსი; შპს იბერია სითი; შპს ტარო, შპს იბერმობილი, შპს იბერია სერვისი,შპს იბერია ტექ ავტომოტივი, შპს სპორტ სალერ ცენტრი.
როგორც ზემოთ აღვნიშნეთ, ტარიელ ხეჩიკაშვილს იბერია ბიზნეს ჯგუფის პრეზიდენტის თანამდებობა მინისტრის პოსტის პარალელურად უჭირავს და 87816.06 ლარის შემოსავალიც აქვს მიღებული; გარდა ამისა, შპს ავტო ლიზინგ ჯორჯიას ბიზნეს კონსულტანტის თანამდებობიდან გასულ წელს 6883.75 ლარის შემოსავალი მიიღო. რაც შეეხება საწარმოებიდან მიღებულ დივიდენდებს, შპს კია მოტორს ჯორჯიადან, რომლის პარტნიორიცაა – 5 606 250 ლარი; ხოლო შპს იბერია ავტო ცენტრიდან 2647368 ლარი მიიღო.
სასესხო ხელშეკრულებები
დეკლარაციის მიხედვით, ტარიელ ხეჩიკაშვილის ოჯახს 9 სასესხო ხელშეკრულება აქვს დადებული. ჯამში სესხის ოდენობა 2 250 250 ლარი და 1 077 000 დოლარია.
სესხების პროცენტების დასაფარად კი, გასული წლის განმავლობაში ოჯახს 2 633 164 ლარი და 85 372.81 დოლარი აქვს გადახდილი.
ნასყიდობის ხელშეკრულებები
დეკლარაციაში ასევე აღნიშნულია, რომ ტარიელ ხეჩიკაშვილს რამდენიმე ნასყიდობის ხელშეკრულებაც აქვს გაფორმებული. კერძოდ, 838500.00-ლარიანი წილის ნასყიდობის ხელშეკრულება შპს კავკასიის ავტოცენტირს კაპიტალიდან (სპორტ ინვესტი) 2015 წელს გაუფორმებია. დეკლარაციაში არ არის მითითებული ხეჩიკაშვილმა წილი გაასხვისა თუ შეიძინა. შესაბამისად, არ ფიქსირდება შემოსავალ-გასავლის თანხაც.
2015 წლის 23 მაისს, იმავე დღეს, როცა ხეჩიკაშვილმა შპს "კავკასიის ავტოცენტირს კაპიტალთან" დადო ნასყიდობის ხელშეკრულება, მეორე, 50000.00-ლარიანი ხელშეკრულება დადებული აქვს შპს "იბერია ავტოს კაპიტალში".
მანამდე კი, 2015 წლის 23 მარტს, ხეჩიკაშვილმა 450000.00-ლარიანი ნასყიდობის ხელშეკრულება შპს "იბერია სერვისის კაპიტალში" დადო; ამავე შპს-სთან ამავე დღეს ხეჩიკაშვილის მეუღლემ მეორე, 450000-ლარიანი ხელშეკრულება გააფორმა. ხოლო ეკატერინე ინასარიძემ ამავე დღეს კიდევ ერთი, 225000.00-ლარიანი ნასყიდობის ხელშეკრულება გააფორმა შპს "იბერმობილის კაპიტალთან" და 374775.04-ლარიანი ხელშეკრულება შპს "იბერია ტექ ავტო მოტივის კაპიტალთან".
გარდა ამისა, ტარიელ ხეჩიკაშვილის სამი შეთანხმება აქვს დადებული ვალდებულების გადაკისრებასა და ერთიერთი მოთხოვნის გაქვითვასთან დაკავშირებით. კერძოდ, 2015 წლის 23 მარტს 1049775.04-ლარიანი ასეთი ხელშეკრულება აქვს დადებული; ამავე დღეს ხეჩიკაშვილმა 125400.00 ლარიანი და 152720.96-ლარიანი ხელშეკრულებები დადო;
ქველმოქმედება და ქონების გადასახადი
სპორტის მინისტრის ქონებრივ დეკლარაციაში ასევე აღნიშნულია, რომ ტარიელ ხეჩიკაშვილს 95 000 ლარი ქველმოქმედებაში აქვს გადახდილი; 7120.00 ლარით კი, ქონების გადასახადი დაფარა.
ამავე თემაზე:
21 შპს-ს პარტნიორი მინისტრი – რა ქონებას ფლობს ტარიელ ხეჩიკაშვილი
