რომაული აბანოების და ვაშნარის არქეოლოგიური ექსპედიციის ჩატარების სამუშაოების დრო ჯერ კიდევ უცნობია.
2016 წელს, ქალაქ ოზურგეთში რომაული აბანოს და ოზურგეთის მუნიციპალიტეტის სოფელ გურიანთის ვაშნარის ციხე-ქალაქში გათხრები უნდა გაგრძელდეს და არქეოლოგიური ექსპედიცია მოეწყოს. ეს ინფორმაცია, "გურია ნიუსმა" ჯერ კიდევ 2016 წლის თებერვალში გააჟღერა, როდესაც კულტურის მინისტრი, მიხეილ გიორგაძე ოზურგეთში იმყოფებოდა.
კულტურისა და ძეგლთა დაცვის მინისტრის მოადგილემ, ლევან ხარატიშვილმა ოზურგეთში გამართულ შეხვედრაზე თქვა, რომ აბანოების გათხრა და არქეოლოგიური შესწავლა 2016 წელს არის დაგეგმილი.
"კულტურული მემკვიდრეობის დაცვის ეროვნულ სააგენტოს 2016 წელს ბიუჯეტში აქვს გათვალისწინებული აბანოს გათხრების გაგრძელება და არქეოლოგიური ექსპედიციის მოწყობა. ასევე, ამავე სააგენტოს წელს დაგეგმილი აქვს ვაშნარის ციხე-ქალაქში სამუშაოების ჩატარება. დაგეგმილია აგრეთვე ლიხაურის ეკლესიის რეაბილიტაციის პროექტის მომზადება", _ თქვა მინისტრის მოადგილემ.
"გურია ნიუსი" ამ საკითხით დაინტერესდა. კულტურის სამინისტროს პრესსამსახურში გვითხრეს, რომ კარგი იქნებოდა საქართველოს კულტურული მემკვიდრეობის დაცვის ეროვნული სააგენტოსთვის მიგვემართა და ისინი უფრო კონკრეტულად გვეტყოდნენ, თუ როდის დაიწყება მუშაობა.
ამ თემაზე "გურია ნიუსი" კულტურის მინისტრს მიხეილ გიორგაძეს ესაუბრა:
"რომ არ გამომივიდეს ტყუილი და ზუსტი ინფორმაცია მიიღოთ, შეგიძლიათ, მიმართოთ კულტურული მემკვიდრეობის დაცვის ეროვნულ სააგენტოს და ისინი დეტალურად გეტყვიან ყველაფერს. ჩემი ინფორმაციით, სააგენტო გეგმავს სამუშაოების დაწყებას. სიმართლე გითხრათ, ბოლო დროს არ გადამიმოწმებია ეს საკითხი. შეგიძლიათ, ჩვენ მოგვმართოთ ან სააგენტოს დაუკავშირდეთ და ინფორმაციის მოწოდებასთან დაკავშირებით არანაირი პრობლემა არ გექნებათ", _ გვითხრა 5 ივლისს, ქალაქ ოზურგეთში მყოფმა კულტურის მინისტრმა მიხეილ გიორგაძემ.
კულტურული მემკვიდრეობის დაცვის ეროვნული სააგენტოს არქეოლოგიის სამსახურის უფროსი კონსტანტინე ფიცხელაური ჩვენთან სატელეფონო საუბრის დროს ამბობს, რომ სამუშაოები აუცილებლად ჩატარდება, მაგრამ ზუსტად როდის, ამასთან დაკავშირებით ამ ეტაპზე ინფორმაცია არ აქვს:
"ზუსტ თარიღს ვერ გეტყვით. უფრო ეს საქმე აგვისტოში დაიწყება, პროგრამაში ნამდვილად გვაქვს ამ საქმის დაწყება და აუცილებლად გაკეთდება. სხვა რეგიონებშიც მიმდინარეობს სამუშაოები და აქედან გამომდინარე, ვერ გეუბნებით ზუსტ თარიღს. თუმცა, გეტყვით, რომ ვაშნარს და აბანოებს აუცილებლად მივხედავთ", _ გვითხრა კონსტანტინე ფიცხელაურმა.
