2016 წლის “საუკეთესო არქიტექტორის” წოდება ოზურგეთელ საყვალა სალუქვაძეს მიენიჭა

ახლახან, საქართველოს ეკონომიკის და მდგრადი განვითარების მინისტრის ბრძანებით, ოზურგეთელ არქიტექტორს საყვალა სალუქვაძეს საქართველოს დამსახურებული არქიტექტორის წოდება მიენიჭა და 2016 წლის  საქართველოს რვა საუკეთესო არქიტექტორს შორის  დასახელდა.

_ ეს არის დაფასება იმ შრომისა, რასაც ჩვენ ამ სფეროში ვეწევით გურიის მხარეში. ვხედავ დაფასებას და  ასეთი დამოკიდებულება მეტ განწყობას გვმატებს.  სასიხარულოა და მადლიერი ვარ, _  თქვა „გურია ნიუსთან“ საყვალა სალუქვაძემ.

საქართველოს დამსახურებული არქიტექტორი საყვალა სალუქვაძე  1979-1981 წლებში ოზურგეთის რაიონის მთავარი არქიტექტორი იყო.  1995-2006 წლებში კი  საქართველოს ურბანიზაციის  და მშენებლობის სამინისტროს გურიის მხარის ურბანიზაციის და მშენებლობის დეპარტამენტს ხელმძღვანელობდა.  იმავდროულად,  იყო  გურიის მხარის არქიტექტორიც.  დღეისთვის  საყვალა სალუქვაძე მშობლიურ რაიონში განაგრძობს პროფესიულ მოღვაწეობას.