“თქვენ დედებს შევ..ი ეხლაც და მერეც” _ ახალი თანამშრომლები მომსახურების ცენტრში

ოზურგეთის მუნიციპალიტეტის მერიაში არსებული ა(ა)იპ-ების რეორგანიზაცია უკვე დასრულდა.

ყველაზე დიდი ა(ა)იპ “ოზურგეთის მუნიციპალიტეტის მომსახურების ცენტრია”, რომელშიც, უფროსის თენგიზ ქუტიძის თქმით, 217 თანამშრომელია.

ანალოგიურ ა(ა)იპ-ს ქალაქ ოზურგეთში, სადაც 158 თანამშრომელი იყო _ ვლადიმერ სალუქვაძე, ხოლო თემთა გაერთიანებაში, სადაც 117 თანამშრომელი იყო  _ შალვა კონჯარია ხელმძღვანელობდნენ. შალვა კონჯარიამ თანამდებობა მალე დატოვა და დღეს ის “გაერთიანებული წყალმომარაგების კომპანიის სერვისცენტრის” უფროსია, ხოლო ვლადიმერ სალუქვაძე თანამდებობიდან ახლახან გათავისუფლდა. სალუქვაძეს, ჩვენი წყაროს ინფორმაციით, ქალაქის კოორდინატორის თანამდებობა შესთავაზეს, თუმცა, მან უარი განაცხადა.

“გურია ნიუსი” დაინტერესდა, თუ რა მდგომარეობაა დღეს “ოზურგეთის მომსახურების ცენტრში”.

როგორც გავარკვიეთ, ყოფილი თემთა გაერთიანების მომსახურების ცენტრიდან მხოლოდ ერთი თანამშრომელი დაითხოვეს, თუმცა, მისი აღდგენა უკვე მოხდა. ჩამოქვეითდნენ თანამდებობის პირები და ისინი განყოფილებების უფროსების თანაშემწეებად დაინიშნენ.

რაც შეეხება ქალაქის ყოფილი მომსახურების ცენტრს, რომელშიც 158 თანამშრომელი იყო, 58 თანამშრომელი გაათავისუფლეს _ თითქმის ყველა ის პირი, რომლებიც, ჩვენი წყაროს ინფორმაციით, წინა საარჩევნოდ იყვნენ დასაქმებულები და რეალურად სამსახურში არავის უნახავს.

გაერთიანებულ “ოზურგეთის მომსახურების ცენტრს” თენგიზ ქუტიძე ხელმძღვანელობს, რომელიც ბოლოს “ქართუ ჯგუფის” ურეკის ავტოფარეხის უფროსი იყო, მანამდე კი ოზურგეთის ცენტრალური  ავტოსადგურის დირექტორად მუშაობდა წლების განმავლობაში. ქუტიძის მოადგილე დავით ქურიძეა _ იგი წლების განმავლობაში ოზურგეთის რკინიგზის სადგურს ხელმძღვანელობდა და საპარლამენტო არჩევნებზე პოლიტიკური შეხედულებების გამო დაითხოვეს სამსახურიდან.

ახალი კადრი, რომელიც “ოზურგეთის მომსახურების ცენტრში” თანამდებობაზე დაინიშნა, ნატანებელი ტიტე ბაქანიძეა _ ის თვითმმართველობის არჩევნებზე აქტიურად უჭერდა მხარს ოზურგეთის მუნიციპალიტეტის ახლანდელ მერს კონსტანტინე შარაშენიძეს, რაც “დაუფასდა” კიდეც.

კიდევ ერთი ახალი კადრი, რომელსაც დასუფთავების განყოფილება ჩააბარეს, ყოფილი პოლიციელი სიმონ სადრაძეა _ არჩევნებზე ისიც გამოირჩეოდა აქტიურობით და ყოფილი მერობის კანდიდატის ბეგლარ სიორიძის მხარდამჭერებს ემუქრებოდა კიდეც: “არ მინდოდა დამეწერა, მაგრამ მაიძულეთ _ დღეს სოფელ შემოქმედში შეხვედრებს აწარმოებდა მერობის კანდიდატი კ. შარაშენიძე და ვიღაც გარეწარმა ვიღაც გარეწრის დავალებით 7 საათის შემდეგ წითელმთიდან დაწყებული გომით დამთავრებული, ჩამოგლიჯეს კ. შარაშენიძის პლაკატები. მინდა გითხრათ, თქვენ დედა მოტ….ბო.. ცხენს ვერ მოერიეთ და უნაგირს ერჩით??

მე თქვენ დედებს შევ…ი ეხლაც და 22 ოქტომბერს მერეც _ თუ წაგიჭირეთ, ნატურში შეგისრულებთ… დამალეთ, დედები, თქვე ბოზებო… მაპატიოს საზოგადოებამ ასეთი სტატიისთვის მაგრამ ამათ სხვაგვარად ვერ მივმართავ _ შემსრულებლებს და ზაკაზჩიკებს………..” (სტილი დაცულია. რედ.), _ წერდა სადრაძე გასული წლის 12 ოქტომბერს, წინასაარჩევნოდ.

ჩვენი წყაროს ინფორმაციით, სიმონ სადრაძეს პირობითი სასჯელი აქვს _ მის მიმართ სისხლის სამართლის კოდექსის 338 მუხლით იყო აღძრული საქმე, რაც უფლებამოსილების გადამეტებას გულისხმობს. როგორც წყარო ამბობს, სადრაძეს მის სოფელში მცხოვრებ ერთ-ერთი მოქალაქისთვის ხელყუმბარა უჩუქებია. ისიც ადგა და ნივთი პოლიციაში ჩააბარა. აღნიშნულთან დაკავშირებით საქმის შესწავლა გენერალურმა ინსპექციამ დაიწყო და სიმონ სადრაძეც პოლიციიდან დაითხოვეს, 5 000-ლარიანი ჯარიმა და 5-წლიანი პირობითი მიესაჯა, რასაც დღემდე იხდის.

ის, რომ პირობითი სასჯელი აქვს, ადასტურებს სიმონ სადრაძე და აღნიშნავს, რომ ის საჯარო მოხელე არ არის და  კანონი არ უზღუდავს, რომ იმუშაოს ა(ა)იპ-ში:

_ შეგიძლიათ მოიკითხოთ _ ეს საჯარო სამსახური არ არის. რას ვშვებოდი არჩევნებზე? ამაზე სალაპარაკოდ ახლა არ მცალია, ისეთ ადგილზე ვარ. როცა გნახავთ, მერე ვისაუბროთ, _ გვითხრა სადრაძემ.

ა(ა)იპ ოზურგეთის მომსახურების ცენტრის დირექტორის თენგიზ ქუტიძის თქმით,  აღნიშნულ ა(ა)იპ-ში მხოლოდ 5 ახალი თანამშრომელია.

_ ვლადიმერ სალუქვაძემ უარი თქვა ქალაქ ოზურგეთის კოორდინატორობაზე, ამიტომ ეს თანამდებობა გაუქმდება, _ ამბობს ქუტიძე.

რაც შეეხება განყოფილებებს, ჩვენს მიერ მოპოვებული ინფორმაციით, “მომსახურების ცენტრში” სულ 12 განყოფილებაა. ტრანსპორტისა და მექანიზაციის განყოფილებას ჯერ არ ჰყავს ხელმძღვანელი, საფინანსო განყოფილებას ნუგზარ ჩხარტიშვილი უხელმძღვანელებს, მატერიალურ-ტექნიკური განყოფილებას _ არჩილ ჯაფარიძე, დასუფთავების _ სიმონ სადრაძე, გამწვანების _ შალვა მჟავანაძე, კეთილმოწყობის _ ტიტე ჟღენტი, ცხოველების იზოლაციის _ გიორგი მაღლაფერიძე, განათების _ თემურ მესხია, სასაფლაოს მომსახურების _ ზვიად ჭანუყვაძე, მობილჯგუფს _ კახაბერ მალაზონია, მონიტორინგის ჯგუფს _ ჯერჯერობით, თანაშემწე მაია ბელიქანიძე.

როგორც თენგიზ ქუტიძე “გურია ნიუსთან” ამბობს, თანამშრომელი, რომელიც სამსახურში არ ივლის, დატოვებს დაკავებულ თანამდებობას.

_ “შიდა სამზარეულოც” დასალაგებელია. ყველაზე რთულად საქმე ტრანსპორტისა და მექანიზაციის განყოფილებაშია _ ტრანსპორტის გამართულობა, საწვავის აღრიცხვა, გაცემა-ჩამოწერა _ ეს საკითხები სასწრაფოდაა მოსაგვარებელი. ცალკე სტრუქტურა ჩამოვაყალიბეთ, სადაც ერთად იქნება თავმოყრილი ყველა ტექნიკა, რომელიც ახლა მიმოფანტულია.

რაც შეეხება შინაურ ცხოველებს, რომლებიც ქუჩებში გამოჩნდებიან, მათ პატრონებს აუცილებლად დავაჯარიმებთ _ სხვა გამოსავალი ვერ დავინახეთ, _ ამბობს ქუტიძე.