მმართველი გუნდის წარმომადგენელი, კარლო კოპალიანი ,,გურია ნიუსთან“ საუბრისას ადასტურებს, რომ ,,ქართული ოცნება“ პრემიერ-მინისტრის პოსტზე ფინანსთა მინისტრს, მამუკა ბახტაძეს განიხილავს. ამასთან, როგორც კოპალიანი გვეუბნება, მმართველ გუნდში ბახტაძის მიმართ დადებითი განწყობაა და მის მიმართ დიდი მხარდაჭერაც არსებობს.
,,ორივე ხელით მივესალმები მამუკა ბახტაძის გაპრემიერებას , რადგან ის არის ძალიან პერსპექტიული ახალგაზრდა. ამასთანავე, ის რამდენიმე თვეა მინისტრია და უკვე სერიოზული რეფორმების გატარება მოასწრო, რომელიც ჩვენი ქვეყნის უკეთეს მომავალს წაადგება. გარდა ამისა, ბახტაძე სუფთა წარსულის მქონე ადამიანია. რაც შეეხება მმართველი გუნდის განწყობას, ვიცი, რომ ბახტაძის მიმართ გუნდში განწყობა დადებითია იმიტომ, რომ ის არის თავისი საქმის პროფესიონალი. მხარს დავუჭერ და ვიცი, ძალიან ბევრი ჩემი კოლეგაც მხარს დაუჭერს პრემიერ-მინისტრის პოსტზე მის კანდიდატურას “,_გვითხრა კოპალიანმა.
,,გურია ნიუსმა“ მმართველი გუნდის წარმომადგენელს ჰკითხა, პრემიერის პოსტზე თუ განიხილება მთავრობის სხვა წევრების კანდიდატურა? როგორც კოპალიანი გვეუბნება, აქცენტი მამუკა ბახტაძეზე კეთდება.
,,რატომაც არ შეიძლება სხვა კანდიდატურების განხილვაც იყოს, მაგრამ აქცენტი მამუკა ბახტაძეზე გაკეთდება“,_ გვითხრა კოპალიანმა.
ცნობისთვის, გუშინ, საქართველოს პრემიერ-მინისტრმა, გიორგი კვირიკაშვილმა თანამდებობა დატოვა. როგორც კვირიკაშვილმა საგანგებო ბრიფინგზე განაცხადა, პოსტის დატოვების ძირითადი მიზეზი ბიძინა ივანიშვილთან უთანხმოება გახდა.
