1 სექტემბერს „ბლექსი არენაზე“, შეკვეთილში, უამრავმა მაყურებელმა ქართველი ხალხის უსაყვარლეს ანსამბლ „ივერიის“ მიერ განახლებული „ჩხიკვთა ქორწილი“ იხილა.
საქართველოს ყვეელა კუთხიდან მოსული, „ივერიაზე“ უსაზღვროდ შეყვარებული მაყურებელი კიდევ ერთხელ დარჩა აღფრთოვანებული, ამჯერად განახლებული “ჩხიკვთა ქორწილით“ და ძველი და ახალი თაობის მსახიობთა და ხელოვანთა გააზრებული, ძალიან ნიჭიერი თანამონაწილეობით.
ცნობილი მეფე-არწივი, თეიმურაზ წიკლაური მაყურებლით გადაჭედილ დარბაზს საქორწილო რიხით მიესალმა: „მოგესალმებით ჩიტებო, გვრიტებო, მარგალიტებო!“, რაც მიუზიკლის გმირი ფრინველების მისამართით ნათქვამზე უფრო, კონტექსტში, დარბაზში მსხდომთა ლამაზად, მორგებულად გამოხატულ სიყვარულს უფრო გულისხმობდა.
„ტყის მუსიკოსები“, ტრადიციულად, ჩვეული სიმაღლიდან წარუდგნენ მაყურებელს.
_ „ანსამბლ „ტყის მუსიკოსების“ ორ თაობას გთავაზობთ: უფროსები და ბარტყები… ყველა თაობა კარგია, უთავობაა ცუდი“ _ მეფე-ფრინველის პოზიციიდან, კვლავ სიბრძნისა და მუსიკალური ხელოვნების სინთეზი მიიტანა მაყურებელთან თემურ წიკლაურმა.
ცეცხლოვანი ნომრებით მამები და შვილები, კუდალაშვილები და ბაღაშვილები ჩვეული ოსტატობითა და არტისტიზმით მიეახლნენ მაყურებელს.
ხოლო, ვახტანგ ტატიშვილის უბადლო იუმორმა და მიმიკური გამოხატვის მაღალი კლასით შესრულებულმა სიმღერამ „ოკუპანტ ჩიტებზე“ _ „ ღამე დავეხეტები… მავთულხლართებს ვედები, მენატრება ოკუპანტთა დედები“ … _ მაყურებელის ოვაცია კულმინაციამდე მიიყვანა. ასევე, ტრადიციულად, ტაში და ოვაცია დაიმსახურა „ბუს“ თუ „ყვავის“ _ ტატიშვილისა და კვაშალის აღსარებებმა…
მაყურებელმა, ასევე, ხანგრძლივი ტაშით და ფეხზე წამოდგომით მიაგო პატივი „ივერიის“ დიდი მაესტროს ალექსანდრე ბასილაიას ვიდეოფრაგმენტს და ამიტ გამოხატა თავისი მოწიწება დიდი ხელოვანის მიმართ.
მიუზიკლის სიუჟეტი განსაკუთრებული ოსტატობით იყო შეკრული, რაშიც კიდევ ერთხელ დაინახა მაყურებელმა განახლებული ფორმატი, „ივერიელების“ ამოუწყავი შესაძლებლობის სახით. ცუდ თუ კარგ განვითარებაში მყოფი სინამდვილის ზუსტად გადმოცემის ხელოვნება შემოქმედებაში, რაც ოდითგან უზადოდ გააჩნდათ „ივერიელბს“, კარგად გამოჩნდა უწყინარი იუმორით გამოფენილ ლოზუნგებში: „თავისუფლება ყვანჩალას“, „მოტაცების ლეგალიზაცია“, „შავების დეკრიმინალიზაცია“, „ყვავი აგვაყვავებს“ „შავი ხმაური“, „STOR ყვავოფობია“, `VYRANTAL liberation!“…
მიუზიკლის დასასრული ორიგინლური აღმოჩნდა _ „ჩხიკვთა ქორწილი“ ნამდვილი ნიშნობით დასრულდა _ ჯგუფის ახალგაზრდა შეყვარებულმა მსახიობებმა, ირაკლი მნათობიშვილმა და შორენა ჯაფარიძემ ერთმანეთს საჯაროდ შეჰფიცეს სიყვარული _ ირაკლიმ აუდიტორიის წინაშე მიართვა ბეჭედი და უზარმაზარი თაიგული თავის რჩეულს.
„გურია ნიუსი“ უერთდება ამ დიდ სიხარულს და უსაზღვრო ბედნიერებას ვუსურვებთ შორენასა და ირაკლის.
