რამდენიმე დღის წინ დასრულდა შავი ზღვის საფეხბურთო ფესტივალი, რომელიც საპილოტე სახით გაიმართა და მას ბათუმთან, ფოთთან, ურეკსა და ქობულეთთან ერთად ლანჩხუთმაც უმასპინძლა.
ლანჩხუთში მატჩები ევგრაფი შევარდნაძის სახელობის სტადიონზე ჩატარდა ორ ასაკში _ 2009-10 და 2011-12 წლებში დაბადებულ ბავშვებს შორის. შეჯიბრში ჩართული იყო აღმოსავლეთის 23 და დასავლეთის 20 გუნდი, ჯამში 43 გუნდი 700-მდე ნორჩ ფეხბურთელს აერთიანებდა. ვინაიდან არსებულ ასაკებში წყვეტაა აღმოსავლეთ და დასავლეთ გუნდებს შორის, ფესტივალი მშვენიერი საშუალება გამოდგა _ შეხვდნენ ერთმანეთს, გაიცნეს, ითამაშეს, დამეგობრდნენ…
ჯგუფური თამაშები ჩატარდა შერჩევითი პრინციპით: აღმოსავლეთის გუნდები შეხვდნენ დასავლეთის გუნდებს, სადაც ქულები არ იწერებოდა, ამით ორგანიზატორებმა ჭაბუკებს აარიდეს სპორტულ შედეგებზე ორიენტირებული თამაშები, რაც დღევანდელ რეალობაში უმეტესად იწვევს ნეგატიურ ემოციებს და ხელს უშლის ბავშვების განვითარებას.
ფინალები ზემოაღნიშნულ ზღვისპირა ქალაქებში ჩატარდა და გათამაშდა ყველა ამ ქალაქის სახელობითი თასები, მათ შორის ლანჩხუთის თასიც. ფინალებში გუნდების დაწყვილება ასევე შერჩევითი პრინციპით მოხდა.
ლანჩხუთის საფეხბურთო სკოლის (დირექტორი გოგი ფაცურია) ორივე გუნდმა დიდი მოწონება დაიმსახურა – ჩვენმა ჭაბუკებმა ლამაზი შეხვედრები ჩაატარეს და სპეციალისტების მოწონებაც დაიმსახურეს.
ორივემ ფინალი ფრედ დაასრულა – უფროსებმა 3:3 და უმცროსებმა 1:1, მხოლოდ პენალტების სერია დათმეს და ვიცე-ჩემპიონები გახდნენ.
აი, ისინიც:
უფროსი ასაკი (11-12 წლის) _ ლუკა კიკვაძე, თორნიკე კუკულაძე, ლუკა ორმოცაძე, ილია ვადაჭკორია, ნიკოლოზ გოგოლაძე, ილია ღლონტი, დავით ჩხაიძე, ოთარ ჩხეტია, საბა ფაცურია, გელა გუჯაბიძე, ლუკა შანიძე, ანდრია ბურძგლა, დავით (ჯიმი) ჩხაიძე, გიორგი ფიფაიშვილი და მათე ჟღენტი. მწვრთნელები: კახაბერ გუჯაბიძე, გიგა კვერენჩხილაძე
უმცროსი ასაკი (9-10 წლის) _ დავით სანაძე, იოსებ ჩერქეზია, დავით პატარაია, დავით ორმოცაძე, ლაშა-გიორგი რუსიეშვილი, საბა ხურცილავა, გიორგი ურუშაძე, უსუპი ბზეკალავა, საბა ცანავა, ანდრია სარჯველაძე, გაბრიელ ჩხაიძე, ალექსანდრე მოქია, მათე ესაიაშვილი, მარკოზ ქიქავა, ნიკოლოზ ტუღუში, სანდრო ტუღუში. მწვრთნელები: მიხეილ ჩხაიძე, ოლეგ იმნაძე
ფესტივალზე მოწვეული იყო საფეხბურთო კლუბ „რომას“ ასაკობრივი გუნდის მწვრთნელი და იტალიის მწვრთნელთა ასოციაციის წევრი ზურაბ მჭედლიძე, რომელიც აკვირდებოდა ფესტივალის ორგანიზებას და მასში მონაწილე გუნდებს, რათა სამომავლოდ შევძლოთ ქართულ-იტალიური ურთიერთობების ჩამოყალიბება და განვითარება.
სამომავლოდ იგეგმება ფესტივალების სისტემატიურ რეჟიმში ჩატარება, ორგანიზაციული საკითხების დახვეწა, განვითარება, უფრო მეტი გუნდების თუ ბავშვების ჩართვა, სპონსორების მოზიდვა და დაინტერესება, სხვადასხვა ქვეყნებიდან გუნდების ჩამოყვანა.
ავტორი: სოფო წილოსანი
