მიმდინარე შაბათ-კვირის სპორტული მოვლენების უმთავრესი გმირი, ესპანური „ვალენსიას“ ქართველი კარის დარაჯი გიორგი მამარდაშვილი აღმოჩნდა _ თბილისის „ლოკომოტივის“ ყოფილმა მეკარემ ესპანეთის პირველობის პირველ ტურში შესანიშნავად იასპარეზა და თავისი ამჟამინდელი კლუბის წარმატების ერთ-ერთი მთავარი შემოქმედი გახდა.
თუნდაც ერთი თვის წინ, ვერავინ წარმოიდგენდა რომ საქართველოს პირველობიდან ესპანეთში გადასული კარის მცველი ახალი გუნდის ძირითად შემადგენლობაში ადგილს დაიმკვიდრებდა _ გიორგი მამარდაშვილი „ვალენსიას“ მეოთხე მეკარედ ეგულებოდა. წესითა და რიგით, მიმდინარე სეზონი ამ გუნდის მეორე შემადგენლობაში უნდა გაეტარებინა, მაგრამ საკუთარი შრომისმოყვარეობითა და ჩინებული თამაშით „ვალენსიას“ სამწვრთნელო შემადგენლობას ყველა გეგმა შეუცვალა. ამჟამად ის გუნდის ძირითადი შემადგენლობის მოთამაშედ მოიაზრება და თუ ასე გააგრძელა, მალე სრულიად საფეხბურთო ევროპას აალაპარაკებს.
ორი დღის წინ თურქეთის საფეხბურთო პირველობაზე საბა ლობჟანიძეს ჩინებული დასაწყისი გამოუვიდა. მიმდინარე სეზონის დაწყების წინ საბამ „ანკარაგიუჯიუდან“ „ჰათაისპორს“ მიაშურა. ახალ კლუბში დებიუტი ორი დღის წინ ჰქონდა, როდესაც „ჰათაისპორი“ „კასიმპაშას“ მასპინძლობდა და 0:1 მარცხდებოდა. ლობჟანიძე მინდორზე 64-ე წუთზე გამოჩნდა და 74-ე წუთზე ანგარიში გაათანაბრა.
რამდენიმე დღის წინ, ბათუმის „დინამოს“ პრეზიდენტმა არჩილ ბერიძემ ქართულ მასმედიასთან საუბრისას განაცხადა, რომ მიუხედავად არა ერთი სარფიანი შემოთავაზებისა მიმდინარე სეზონში არ აპირებდა გუნდიდან მარცხენა მცველი ირაკლი აზაროვის გაშვებას.
რამდენიმე დღის წინ რუსულმა „სოვეტსკი სპორტმა“ გაავრცელა ცნობა რომ აზაროვის შეძენით კლუბი „კრასნოდარი“ სერიოზულად არის დაინტერესებული.
ჟურნალისტი ნოელ არუსტამიანის მტკიცებით, რუსული გუნდის ხელმძღვანელობა ბათუმური კლუბის წარმომადგენლებთან აზაროვის თაობაზე ინტენსიურ მოლაპარაკებას აწარმოებს. იმედია „დინამოს“ წარმომადგენლები ამ თემის ირგვლივ უახლოეს დღეებში შესაბამის განცხადებას გააკეთებენ.
ინგლისში პრემიერლიგის პირველი ტური გაიმართა. ჩისკოს მიერ გაწვრთნილმა „უოტფორდმა“ „ასტონ ვილას“ უმასპინძლა და დაძაბულ ბრძოლაში წარმატების მიაღწია – 3:2.
ჩისკო მუნიოსის სახელი ქართველი ფეხბურთის თაყვანისმცემლებისათვის კარგადაა ცნობილი. წლების განმავლობაში თბილისის „დინამოს“ ღირსებას იცავდა, მოგვიანებით მწვრთნელადაც მოგვევლინა და „დინამოს“ ქვეყნის ჩემპიონობაც მოუტანა.
ამ დღეებში გერმანიიდან სამწუხარო ინფორმაცია მოვიდა _ გარდაიცვალა გერდ მიულერი. ამ ლეგენდარული მოთამაშის სახელი წინა საუკუნის 80-იან წლებში ქუხდა. მისი ჯანმრთელობის მდგომარეობა ბოლო ხანებში გაუარესდა და 15 აგვიტოს, დილას, 75 წლის ასაკში დაგვტოვა.
მან მიუნხენის „ბაიერნში“ 605 მატჩში 563 გოლი გაიტანა, ხოლო გერმანიის ნაკრების მაისურით 68 გოლის გატანას მხოლოდ 62 თამაში მოანდომა, მეტსახელიც შემთხვევით არ მიუღია: „ერის ბომბარდირი“.
გერდ მიულერი ევროპისა და მსოფლიოს ჩემპიონია, ასევე, სამჯერ მოიგო ჩემპიონთა თასი, ოთხჯერ კი ბუნდესლიგა. გერმანიის ბუნდესლიგის ისტორიაში გერდი დღემდე ყველა დროის საუკეთესო ბომბარდირია 365 გოლით.
14 აგვისტოს საფრანგეთის პირველობაზე მორიგი შეხვედრა ჩაატარა „პარი სენ-ჟერმენმა“ და „პარკ დე პრენსის“ სტადიონზე „სტრასბურგს“ უმასპინძლა. ყველა მოელოდა რომ მინდორზე ლეო მესის ვიხილავდით, მაგრამ უშედეგოდ. აღმოჩნდა რომ პარიზული გუნდის სამწვრთნელო შემადგენლობამ მესის სპორტულ ფორმაში შესასვლელად გარკვეული დრო მისცა და მისი ოფიციალური დებიუტი აგვისტოს ბოლომდე გადაიდო.
აღსანიშნავია, რომ მესის გარდა „პსჟ“-ს ღირსებას დროებით ვერც სერხიო რამოსი, ნეიმარი და დონარუმაც დაიცავენ. რაც შეეხება კილიან მბაპეს. ჯერ გადაწყვეტილი არ არის, ეს უკანასკნელი კარიერას მადრიდის „რეალში“ გააგრძელებს, თუ მიმდინარე სეზონში ამჟამინდელ გუნდში იასპარეზებს და ესპანეთის დედაქალაქს მხოლოდ მომავალი წლის ზაფხულში მიაშურებს.
[sexy_author_bio]
