მიმდინარე წლის 11 ნოემბერს, ბათუმში, საქართველოს ნაკრები მსოფლიო ჩემპიონატის ბოლო შესარჩევ მატჩში შვედეთს უმასპინძლებს, რომლის რიგებშიც კვლავ იასპარეზებს 40 წლის ზლატან იბრაჰიმოვიჩი. საქართველოში გამომგზავრების წინ შვედმა ვარსკვლავმა პრესკონფერენცია ჩაატარა და რამდენიმე საყურადღებო განცხადება გააკეთა:
„აქ ვარ, რადგან გუნდის ერთ-ერთი ნაწილი ვარ. თუ მწვრთნელი ჩათვლის, რომ საქართველოსთან და ესპანეთთან უნდა ვითამაშო, აუცილებლად ორივე შეხვედრაში მივიღებ მონაწილეობას. გამოტოვებულმა მატჩებმა გული დამწყვიტა, მაგრამ ახლა აქ ყოფნით ძალიან ბედნიერი ვარ. მიხარია, რომ ჩემი ქვეყნის ნაკრების დახმარება შემიძლია. ჩემთვის ევრო 2020-ის სახლიდან ყურება ძალიან მძიმე იყო. ამ ყველაფერს მოუთმენლად ველოდებოდი. ცხოვრება და ფეხბურთი ასეთია. ხანდახან იმას ვერ მიიღებ, რაც ასე ძალიან გსურს.”
იბრაჰიმოვიჩი დიდებული ფეხბურთელია, მაგრამ სამწუხაროდ არც თუ ისე კარგი პიროვნება. გუშინ საქართველოს ნაკრებისა და ბელგიური „სერენის“ თავდამსხმელი გიორგი მიქაუტაძე გამოცემას „Eleven Sports“ ესაუბრა და სხვა თემებთან ერთად ზლატან იბრაჰიმოვიჩის „საკითხზეც“ ილაპარაკა.
მიქაუტაძემ საქართველოს ნაკრების რიგებში თავისი პირველი მატჩი გაიხსენა, რომელიც სტუმრად შვედეთთან შედგა, რომლის რიგებშიც მაშინ ზლატანიც თამაშობდა. ის შეხვედრა მასპინძლებმა 1:0 მოიგეს, ხოლო ვეტერანმა ვარსკვლავმა საგოლე გადაცემა შეასრულა.
„ზლატანი ჩვენს მცველებს შეურაცხყოფას აყენებდა, ძალიან ბევრს ლაპარაკობდა. დიდი ზლატანი სულ სხვანაირი მეჩვენა, თუმცა, რა თქმა უნდა, მას ძალიან დიდი საფეხბურთო კლასი აქვს”, – აცხადებს „ცნობილი შვედის“ საქციელით იმედგაცრუებული მიქაუტაძე.
ესპანეთში კი „ვალენსიას“ კარის დარაჯმა გიორგი მამარდაშვილმა შეიძლება კლუბის ძირითად შემადგენლობაში მეორე შანსი მიიღოს.
ესპანეთის პირველობის ბოლო ტურებში „ვალენსია“ ბევრ გოლებს უშვებს. ამ საკითხზე კლუბის მთავარმა მწვრთნელმა ხოსე ბორდალასმა სპეციალური განცხადებაც კი გააკეთა:
„ჩვენ უკვე 20 გოლი მივიღეთ და ეს არის შემაშფოთებელი. ხშირად პირველები ვუშვებთ და მერე გვიხდება რეაგირება. ამ მხრივ ნამდვილად არ ვარ ბედნიერი. ეს ტენდენცია უნდა შევცვალოთ სანაკრებო პაუზის შემდეგ. ყველამ ერთად უნდა მოვახდინოთ რეაგირება”, – განაცხადა ბორდალასმა.
ესპანური სპორტული მასმედიის მტკიცებით ბორდალასი უახლოეს მომავალში ქართველ კარის დარაჯს მეორე შანს აუცილებლად მისცემს.
სანდრო მამუკელაშვილი კი აშშ-ის პრეზიდენტ ჯო ბაიდენს შეხვდა…
ქართველის ამჟამინდელი კლუბი „მილუოკი ბაქსი“ ბოლო 5 წლის განმავლობაში NBA-ს პირველი ჩემპიონი გახდა, რომელიც საგანგებო მიღებაზე თეთრ სახლში გამოცხადდა და ქართველი კალათბურთელიც გუნდთან ერთად იყო. რასაკვირველია მას საჩემპიონო ბეჭედი არ ერგებოდა, თუმცა კი, აშშ-ს პრეზიდენტთან სტუმრობის პატივით მანაც ისარგებლა
„მილუოკიმ“ თეთრ სახლში მისვლისთვის NBA-ს ორ მატჩს შორის პაუზა შეარჩია. მამუკელაშვილის გუნდმა 8 ნოემბერს „ვაშინგტონთან“ ითამაშა, 10-ში კი „ფილადელფიასთან“ შეხვედრა ელის. მამუკელაშვილს მიმდინარე სეზონში 7 მატჩი აქვს ჩატარებული და საშუალოდ 2.7 ქულა და 1.3 მოხსნა გააჩნია.
გერმანიის საფეხბურთო ნაკრებში კორონავირუსი გამეფდა და ეროვნული გუნდის ერთდროულად ხუთი ფეხბურთელი კარანტინში მოხვდა. ამისი მიზეზი ერთ-ერთი მოთამაშის კორონავირუსით დაინფიცირება გახდა.
ბუნდესნაკრების პრესსამსახურის ცნობით, ინფიცირებულ ფეხბურთელს ვაქცინაციის სრული ციკლი ჩატარებული აქვს და დაავადების სიმპტომები არ აღენიშნება. მასთან ერთად იზოლაციაში იმყოფება კიდევ 4 ფეხბურთელი, რომლებსაც ახლო კონტაქტი ჰქონდათ ინფიცირებულთან, მაგრამ ტესტირებაზე პასუხი უარყოფითი მიიღეს. კორონავირუსით ინფიცირებული ფეხბურთელი მიუნჰენის „ბაიერნის“ მცველი ნიკლას ზიულეა.
გერმანიის ნაკრების დანარჩენი ფეხბურთელები და სამწვრთნელო შტაბის წევრები მომავალი შეხვედრებისთვის მზადებას ჩვეულებრივ რეჟიმში აგრძელებენ. გუნდს ნოემბერში მსოფლიოს 2022 წლის ჩემპიონატის შესარჩევი ციკლის ორი მატჩის ჩატარება უწევს. 11 ნოემბერს შინ ლიხტენშტაინს მიიღებს, 14-ში კი სტუმრად სომხეთს ეთამაშება.
კატალონიის დედაქალაქში „ბარსელონას“ ახალი მთავარი მწვრთნელი ჩავი ერნანდესის ოფიციალური წარდგენის ცერემონიალი გაიმართა. ესპანელმა „კამპ ნოუზე“ პირველი კომენტარიც გააკეთა.
„დიდი მადლობა, ძალიან აღელვებული ვარ. ჩვენ მსოფლიოში საუკეთესო კლუბი ვართ. წარმატების მისაღწევად ბევრს ვიმუშავებთ. „ბარსასთვის“ დაუშვებელია ფრე და წაგება, მოედანზე ყველა თამაშში მოსაგებად უნდა გავიდეთ. ვფიქრობ, მზად ვარ ამ სამუშაოსთვის. ჩემი დაბრუნება სწრაფად მოხდა, ცხოვრება სამ-ოთხ დღეში შეიცვალა. ყველაფერს გავაკეთებ, რომ გუნდს დავეხმარო, ვეცდები, ფეხბურთელებს ჩემი გამოცდილება გადავცე, რათა ტიტულები მოვიგოთ. მზად ვარ და გამოწვევები მიყვარს. მადლობა გულშემატკივრებს სიყვარულისთვის და იმედი მაქვს, სამაგიეროს ტიტულებით გადავუხდი.
ბუსკეტსს, პიკეს, ალბას და ტერ შტეგენს კარგად ვიცნობ, მათი თანაგუნდელი ვიყავი. ჩემი დნმ არ შეცვლილა. ჩემი საფეხბურთო ფილოსოფიაა ბურთის ფლობა, საგოლე მომენტების შექმნა და ინტენსიური ფეხბურთის თამაში. კლუბს რომ ვიცნობ, ეს უპირატესობაა, ერთიანები უნდა ვიყოთ და ყველამ ერთი მიმართულებით ვიაროთ. „ბარსელონა“ ტიტულებს უნდა იგებდეს”, – განაცხადა ჩავიმ.
ჩავი ერნანდესი კატალონიურ გუნდში 1998-2015 წლებში თამაშობდა და 767 მატჩში 85 გოლი გაიტანა. მან საფეხბურთო კარიერა ყატარულ „ალ-სადში“ დაასრულა, სადაც 2019 წელს სამწვრთნელო კარიერა დაიწყო.
თავად „ბარსელონა“ მიმდინარე სეზონში ცუდად თამაშობს და ესპანეთის პირველობაზე 12 მატჩის შემდეგ 17 ქულით მხოლოდ მე-9 ადგილზეა, ხოლო ჩემპიონთა ლიგაზე ოთხ ტურში 6 ქულა მოიპოვა და ჯგუფში მე-2 პოზიციას იკავებს.
[sexy_author_bio]
