გუშინ პეკინში, ზამთრის XXIV ოლიმპიურ თამაშებზე საქართველოს სახელით მოციგურავე ანასტასია გუბანოვა ერთეულებში მოკლე პროგრამით წარდგა და 30 მონაწილეს შორის მე-10 ადგილი დაიკავა. ქართველმა სპორტსმენმა 65.4 ქულა დაიმსახურა. ანასტასია 24 მონაწილეს შორის იქნება და თავისუფალ პროგრამაშიც იასპარეზებს.
გავაგრძელოთ ფიგურული სრიალის თემა. გუშინ ერთი საინტერესო ინფორმაცია გავრცელდა. რამდენიმე დღის წინ 15 წლის რუს მოციგურავე კამილა ვალიევას ტესტირების გავლის შემდეგ აკრძალული ნივთიერება ტრიმეტაზიდინი აღმოაჩნდა. სპორტსმენს თავდაპირველად დისკვალიფიკაცია მიესაჯა, მოგვიანებით კი დროებით შეიწყალეს, თუმცა ამ დოპინგ სკანდალის გამოძიება კიდევ გრძელდება.
საქმის გარჩევის მიმდინარეობისას ვალიევას მხარემ სენსაციური განცხადება გააკეთა. მისმა დედამ, ალსუმ და ადვოკატმა ანა კოზმენკომ განაცხადეს, რომ კამილას ბაბუამ იმავე ჭიქიდან დალია, რომლიდანაც თვითონ კამილა სვამდა ხოლმე და სწორედ ასე აღმოჩნდა ვალიევას ორგანიზმში ხსენებული ტრიმეტაზიდინი, რომელსაც ბაბუა იღებდა. აღსანიშნავია რომ ვალიევას ბაბუა მოსკოვში, შვილიშვილის სახლიდან 40 კილომეტრში ცხოვრობს, მას დაჰყავს კამილა ვარჯიშებზე და ზრუნავს, როცა მშობლები არ არიან. თუმცა, ეს ძალიან საეჭვო და უცნაური მიზეზია.
ესპანური „ვალენსიას“ მთავარი მწვრთნელის თანაშემწე პატრისიო მორენომ კი გიორგი მამარდაშვილის შესახებ კომენტარი გააკეთა, რომელიც ბოლო სამი მატჩია გუნდის ძირითად მეკარედ მოგვევლინა.
„გიორგი იმიტომ ავარჩიეთ, რომ კარგ ფორმაში იმყოფება, თუმცა, ეს ბევრს არაფერს ნიშნავს, რადგანაც სხვებიც ბევრს მუშაობენ“, – აღნიშნა მორენომ.
გიორგი მამარდაშვილი სასტარტო შემადგენლობაში იყო „სოსიედადთან“, ბილბაოს „ატლეტიკთან“ და „ალავესთან“ მატჩებში. „ვალენსიამ“ ვერცერთი თამაში ვერ მოიგო, თუმცა, მარცხი მხოლოდ „ალავესთან“ შეემთხვა და ქართველ მეკარეს სერიოზული შეცდომა არ დაუშვია.
ნიკოლოზ ბასილაშვილმა ბოლოსა და ბოლოს ნავსი გატეხა და რამდენიმეთვიანი უიღბლო სერია დაასრულა. 29 წლის ჩოგბურთელმა 10-მატჩიანი მარცხიანი სერია შეწყვიტა.
ბასილაშვილი და ესპანელი ალეხანდრო დავიდოვიჩ ფოკინა „Qatar ExxonMobil Open“-ის წყვილთა გათამაშების მერვედფინალში ფინელ ემილ რუუსუვუორისა და შვედ ელიას იმერს გაეჯიბრნენ და 6:1, 7:5 იმარჯვეს.
წყვილთა ტურნირის მეოთხედფინალში ბასილაშვილისა და დავიდოვიჩ ფოკინას მოწინააღმდეგეთა ვინაობა დღეს გაირკვევა. ასევე დღეს შეიტყობს თუ ვის დაუპირისპირდება ერთეულთა ბადეში, სადაც ქართველი მესამე ნომრადაა განთესილი.
უკრაინასა და რუსეთს შორის არსებული დაძაბული ვითარების გამო უახლოეს დღეებში უეფა-მ შეიძლება ერთი გადაწყვეტილება მიიღოს. ჩემპიონთა ლიგის ფინალს მიმდინარე წლის 28 მაისს შეიძლება სანქტ-პეტერბურგმა არ უმასპინძლოს.
გამოცემა „Football London“-ის მტკიცებით, თუ რუსეთი უკრაინაში შეიჭრება, უეფა ჩემპიონთა ლიგის ფინალს სხვა ქალაქში გამართავს.
ბრიტანული მასმედიის მტკიცებით, რუსეთ-უკრაინის შესაძლო სამხედრო დაპირისპირებამ მეტალურგიული და სამთომომპოვებელი კომპანია „Evraz“-ის აქციები, რომლის პაკეტსაც რომან აბრამოვიჩი ფლობს, ლონდონის საფონდო ბირჟაზე 29%-ით გაუფასურა. არსებული დაძაბულობის ფონზე, ინვესტორები რუსული კომპანიის წინააღმდეგ შესაძლო სანქციებს მოელიან, შედეგად კი, რუსმა ბიზნესმენმა სულ რაღაც ერთ დღეში 580 მილიონი ფუნტი სტერლინგი იზარალა.
რუსმა ოლიგარქმა ლონდონური კლუბი 2003 წელს შეიძინა და მისი მმართველობის ეპოქაში „ჩელსიმ“ ყველა შესაძლო ტიტული მოიგო – ოთხჯერ ინგლისის ჩემპიონი გახდა, ორ-ორჯერ ჩემპიონთა ლიგასა და ევროპალიგაში გაიმარჯვა. ასევე მოიგო უეფას სუპერთასი, ინგლისის თასი (5-ჯერ), ინგლისის ლიგის თასი (3-ჯერ) და ინგლისის სუპერთასი (2-ჯერ).
ბრიტანული მედიის თვალთახედვის არეში ინგლისის ეროვნული ნაკრებისა და „ევერტონის“ მეკარე ჯორდან პიკფორდიც მოექცა და ამის მიზეზი ნიუკასლის გარეუბანში მდებარე ერთ-ერთ პაბში მომხდარი მასობრივი ჩხუბია.
პაბში, მეგობრების საზოგადოებაში მყოფი პიკფორდი ძალიან გააბრაზა დაწესებულების სხვა სტუმრების ხუმრობამ, რომლებმაც მეკარეს „პატარა ხელების“ გამო დასცინეს. ჩხუბის შედეგად პაბში მყოფ ერთ-ერთ პირს ცხვირი გაუტეხეს, სხვას კი ტელეფონი დაუმტვრიეს. ჯორდან პიკფორდმა და მისმა მეგობრებმა პაბი პოლიციის მოსვლამდე დატოვეს.
სამართალდამცველები შემთხვევას სწავლობენ და მოწმეებს კითხავენ. მიაყენა თუ არა ვინმეს ზიანი პირადად ჯორდანმა, ამის შესახებ ცნობილი არაა. „ევერტონში“ უარი თქვეს კომენტარის გაკეთებაზე ინციდენტთან დაკავშირებით, რომელშიც მათი ფეხბურთელი მონაწილეობდა.
გუშინ ჩემპიონთა ლიგის მერვედფინალური სტადიის ორი შეხვედრა გაიმართა.
„სპორტინგი“ – „მანჩესტერ სიტი“ 0:5
„პსჟ“ – „რეალი“ (მადრიდი) 1:0
[sexy_author_bio]
