უახლოეს მომავალში რუსი ფეხბურთის მოყვარულები საფრანგეთისა და ინგლისის პრემიერლიგის შეხვედრებს ვერ იხილავენ. გუშინ ცნობილი გახდა რომ შეიძლება მათ ქვეყანაში ჩემპიონთა ლიგის მატჩების ტელეტრანსლაციებიც აიკრძალოს. ეს ინფორმაცია „Матч ТВ“-ის ჟურნალისტმა ალექსეი ანდრონოვმა გაავრცელა.
„უეფა-ში ჩემპიონთა ლიგაზე მიდის კონსულტაციები. სავსებით შესაძლებელია, უეფა-მ რუსეთში მატჩების ჩვენება აკრძალოს. შემდეგ კი დომინოს პრინციპით წავა. დარჩება ბელარუსის ჩემპიონატი, რომელსაც ყველანი 2 წლის წინ ვუცქერდით“, – დაწერა ანდრონოვმა თავის ტელეგრამ-არხზე.
რამდენიმე დღის წინ იტალიის ფეხბურთის ასოციაციის პრეზიდენტმა გაბრიელე გრავინამ უკრაინელებს შესთავაზა, რომ ადგილობრივი „პრემიერ ლიგის“ დარჩენილი ტურები მათ მოედნებზე გაიმართოს.
გრავინამ აღნიშნა, რომ იტალია მზადაა, როგორც უკრაინელი ლტოლვილების მიღებაში, ასევე მათი საფეხბურთო მატჩების ორგანიზებაში.
უკრაინის საფეხბურთო პირველობის დასრულებამდე 12 ტურია დარჩენილი. ამ ჩემპიონატში ქართველები – გიორგი წიტაიშვილი, საბა კვირკველია, ბექა ვაჩიბერაძე და ნიკა სიჭინავა ასპარეზობენ.
გუშინ უკრაინელმა ჩოგბურთელმა სერგეი სტახოვსკიმ, რომელიც ამჟამად უკრაინის შეიარაღებული ძალების რიგებში საკუთარ ქვეყანას იცავს სერბ ვარსკვლავ ნოვაკ ჯოკოვიჩთან ახალი მიმოწერა გამოაქვეყნა. მსოფლიოს ერთ-ერთმა საუკეთესო ჩოგბურთელმა უკრაინელი კოლეგის დახმარების სურვილი გამოთქვა.
„სტაკო, როგორ ხარ მეგობარო? ფრონტზე იმყოფები? შენზე ვფიქრობ. იმედი მაქვს, ყველაფერი მალე დაწყნარდება. გამაგებინე, როგორ შეიძლება დახმარება გაგიწიო. გინდა ფინანსური და გინდა სხვა რამ“. სტახოვსკიმ ჯოკოვიჩის მიმართ საკუთარი პასუხიც გამოაქვეყნა, – „ნოლე, დიდ მადლობას გიხდი. კიევში ვარ და ახლა, სიმშვიდეა“
სტახოვსკიმ რამდენიმე დღის წინ აღნიშნა, რომ ნოვაკ ჯოკოვიჩი მისი მდგომარეობით დაინტერესდა, როჯერ ფედერერი და რაფაელ ნადალი კი საერთოდ არ გამოჩენილან.
36 წლის სტახოვსკიმ 19-წლიანი საჩოგბურთო კარიერა წლევანდელი ავსტრალიის ღია პირველობაზე წაგების შემდეგ დაასრულა. მას კარიერაში 4 ტიტული აქვს მოგებული.
მთელი მსოფლიოს სპორტული სამყარო უკრაინას გვერდში უდგას. მათ შორის არაერთი რუსი ათლეტიცაა. ამის მიუხედავად პუტინის მხარდამჭერად სპორტულ სამყაროში ცნობილი არაერთი რუსი პიროვნება რჩება.
გუშინ, რუსეთში მოღვაწე წარმოშობით ქართველმა ჟურნალისტმა თინა კანდელაკმა სოციალურ ქსელში შემდეგი განცხადება გამოაქვეყნა:
„ამ რთულ პერიოდში მინდა, რომ რუს სპორტსმენებს სოლიდარობა გამოვუცხადო. „სპორტი პოლიტიკიდან გასულია“ – ამ მოწოდებას საერთაშორისო ოლიმპიურმა კომიტეტმა უღალატა. უკვე 6 წელია რაც სპორტულ არხს ვხელმძღვანელობ, ამიტომ ამ ყველაფერს მშვიდად ვერ ვუყურებ. ოდესმე ყველაფერი დაწყნარდება და სპორტი ისევ დაიწყებს გაერთიანებას. გარე სამყაროსთან ინტეგრირებას სწორედ სპორტსმენები დაიწყებენ. მჯერა, რომ ისინი უფრო მეტნი იქნებიან, ვიდრე უბრალოდ სპორტმენები“, – დაწერა თინა კანდელაკმა.
კანდელაკს მხარი ფიგურულ სრიალში ორგზის ოლიმპიურმა ჩემპიონმა ევგენი პლიუშჩენკომ აუბა. მან რუსებს ღიად მოუწოდა, რომ ამაყად იარონ და არსად მოერიდოთ, რომ რუსები არიან.
„მე ანდრეი პლიუშჩენკო ვარ, დავიბადე დიად რუსეთში, ხაბაროვსკის მხარეში და ვამაყობ, რომ რუსი ვარ. რუსებო, მთელ მსოფლიოში ამაყად, თავაწეულებმა იარეთ,” – ამ სახის მოწოდება გაავრცელა ორგზის ოლიმპიურმა ჩემპიონმა.
[sexy_author_bio]
