ოზურგეთის მერმა, ავთანდილ თალაკვაძემ უკრაინელი ხალხის მიმართ სოლიდარობა გამოხატა და ჰუმანიტარული დახმარების მობილიზებაში შეტანილი წვლილისთვის, მადლობა გადაუხადა თითოეულ თანამშრომელს, თანამოქალაქეებს, ბიზნესისა და სამოქალაქო საზოგადოების წარმომადგენლებს.
„მინდა კიდევ ერთხელ, გამოვხატო მხარდაჭერა და სოლიდარობა უკრაინის და უკრაინელი ხალხის მიმართ. მადლობას ვუხდი ჩვენს თითოეულ თანამშრომელს, ჩვენს თანამოქალაქეებს, ბიზნესის და სამოქალაქო საზოგადოების წარმომადგენლებს ჰუმანიტარული დახმარების მობილიზებაში შეტანილი წვლილისთვის, რომელიც უკრაინისთვის შევაგროვეთ და გავუგზავნეთ.
ეს პროცესი გრძელდება და მინდა კიდევ ერთხელ გამოვაქვეყნო ანგარიში, რომელზეც ყველა მსურველს შეუძლია უკრაინის დასახმარებლად თანხა ჩარიცხოს შემდეგ სახაზინო კოდზე 300 908 800 დანიშნულება-უკრაინისთვის,” – აღნიშნა თალაკვაძემ.
„ყველას გახსოვთ, წინასაარჩევნო პერიოდში, როდესაც გვქონდა შეხვედრები საზოგადოებასთან, ერთ-ერთი პრობლემა რასაც ჩვენი თანამოქალაქეები აყენებდნენ – გახლდათ იმ ბინების საკუთრებაში დაკანონების საკითხი, რომელშიც ადამიანები რამდენიმე ათეული წელია ცხოვრობენ, მაგრამ მათ საკუთრებას არ წარმოადგენს და ვერ ახერხებენ დაკანონებას. ამის გამო ვერ განკარგავენ აღნიშნულ ქონებას სრულფასოვნად, ვერ იყენებენ მას ეკონომიკური მიზნებისთვის და სხვა. ვასრულებთ პირობას და მხარის გუბერნატორთან ერთად, მივიღეთ გადაწყვეტილება დავიწყოთ ამ პრობლემაზე მუშაობა, შევაფასოთ არსებული მდგომარეობა და შევიმუშაოთ სამართლებრივი მექანიზმი, რომლითაც პრობლემას მოვაგვარებთ,” – განაცხადა ოზურგეთის მერმა.
ოზურგეთის მერმა სხდომაზე ყურადღება გაამახვილა მუნიციპალიტეტში მიმდინარე მშენებლობებზე, რომელიც უნებართვოდ ან სტანდარტების დარღვევით განხორციელდა.
„ მეორე საკითხი, რასაც მინდა დღეს შევეხო, გახლავთ ჩვენს მუნიციპალიტეტში მიმდინარე ის მშენებლობები, რომელიც უნებართვოდ ან სტანდარტების დარღვევით განხორციელდა. ამ პროცესმა ბოლო წლებში ერთგვარად ქაოტური სახე მიიღო და ეს დარღვევები, სახელმწიფო აუდიტის ახალ დასკვნაშიც არის ასახული. აუდიტის დასკვნაში ნათქვამია, რომ ზედამხედველობა ახალ მშენებლობებზე არასათანადოდ ხორციელდებოდა, რის შედეგადაც არაერთი ისეთი მშენებლობა მივიღეთ, რომელიც სტანდარტებს არ შეესაბამება და ხშირ შემთხვევაში წინააღმდეგობაში მოდის ჩვენი ქალაქის და სოფლების ინტერესებთან. მერად ჩემი არჩევის შემდეგ, ერთ-ერთი პირველი დავალება რაც გავეცი – იყო ზედამხედველობის პროცესის მოწესრიგება. შესაბამისად, უკვე ამა წლის 15 მარტის მდგომარეობით, მერიის ზედამხედველობის სამსახურის მიერ დაჯარიმდა 28 ობიექტი, რომელიც კანონმდებლობის და სტანდარტების დარღვევით შენდებოდა ან აშენდა. ჯარიმების საერთო ოდენობა 188 000 ლარს შეადგენს, რომელიც ბიუჯეტში ჩაირიცხება. პარალელურად მიმდინარეობს 7 ობიექტზე სავარაუდო სამშენებლო სამართალდარღვევის ფაქტებზე საქმისწარმოება, სადაც საჯარიმო თანხის ოდენობა ჯამში შეადგენს 94 000 ლარს.
მადლობას ვუხდი ზედამხედველობის სამსახურს და მის ხელმძღვანელს ჯეროვანი მუშაობისთვის – მათ აქვთ ჩემი მხარდაჭერა, რომ კანონის დაცვით, მკაცრად, მაგრამ სამართლიანად განაგრძონ მუშაობა ამ თემაზე. ამავე დროს, მიღებულია გადაწყვეტილება, რომ მოხდეს ზედამხედველობის სამსახურის რეფორმა და განვითარება და მის ბაზაზე შეიქმნას მუნიციპალური ინსპექცია, რომელიც მობილობის, მომსახურების, დარღვევების იდენტიფიცირების და ადმინისტრირების თვალსაზრისით გაცილებით ეფექტური იქნება. საბოლოო ჯამში, ეს ხელს შეუწყობს სოციალური და ეკონომიკური ინფრასტრუქტურის სწორად განვითარებას, დაზოგავს დროს და დანახარჯებს როგორც სახელმწიფოსთვის, ასევე, კერძო სექტორისთვის“ – განაცხადა ოზურგეთის მერმა.
კიდევ ერთი საკითხი, რაზეც მერმა ყურადღება გაამახვილა არის პარკირების არსებული სისტემა.
„აუდიტის სამსახურმა აქაც სერიოზული დარღვევები გამოავლინა, რაც მიუთითებს, რომ პარკირების სისტემა ოზურგეთში არასწორად იმართებოდა და აუდიტის ანგარიშის მიხედვით, მიღებული შემოსავალი სათანადოდ არ ხმარდებოდა მუნიციპალიტეტს და ჩვენი მოქალაქეების ინტერესებს. მივიღეთ გადაწყვეტილება მოვახდინოთ პარკირების მართვის ცენტრის შერწყმა შპს “მუნიციპალურ ტრანსპორტთან” ერთიანი სატრანსპორტო პოლიტიკის განხორციელების მიზნით. აქვე შეგვიძლია ვთქვათ, რომ თანამდებობიდან განთავისუფლდა შპს “მუნიციპალური ტრანსპორტის” დირექტორი და დაინიშნა ახალი ხელმძღვანელი. პარკირების მიმართულებით არის მთელი რიგი პრობლემები, მათ შორის ტაქსებთან დაკავშირებით და ჩვენ შევეცდებით, ეს საკითხები უფრო სწორად და მოქალაქეებისთვის კომფორტულად დავარეგულიროთ“ – განაცხადა ოზურგეთის მერმა სხდომაზე.
„ზამთრის თოვლიანი ამინდების შემდეგ, ვემზადებით ქალაქში დაზიანებული გზების აღსადგენად.
უკვე დასრულდა ტენდერი და გაფორმდა ხელშეკრულება ქალაქ ოზურგეთში ლესელიძის ქუჩაზე ბეტონის სანიაღვრე არხების მოსაწყობად და ერთ-ერთ მონაკვეთზე ფერდსამაგრი კედლის მშენებლობისთვის. აღნიშნული ქუჩის მოსახლეობას წლების განმავლობაში აწუხებს ეს პრობლემა, რადგან ჭარბი ნალექის დროს ეტბორებოდათ ეზოები.
დასრულდა ანასეულის უბანში, მეცნიერების ქუჩაზე საავტომობილო გზის რეაბილიტაციისთვის გამოცხადებული ტენდერი და უახლოეს პერიოდში გაფორმდება ხელშეკრულება და დაიწყება სამუშაოები.
ასევე, დასრულდა სოფელ დვაბზუში ცენტრიდან მაგისტრალურ გზასთან დამაკავშირებელი გზის რეაბილიტაციისთვის გამოცხადებული ტენდერი, მიმდინარეობს ხელშეკრულების გაფორმების პროცედურები და მალე დაიწყება შესაბამისი სამუშაოები“ – განაცხადა სხდომაზე ოზურგეთის მერმა.
„ წინა მერიის სხდომაზე უკვე გითხარით ახალ საჩოგბურთო კომპლექსზე, რომლის მშენებლობასაც ვიწყებთ. დღეს, მინდა გაცნობოთ, რომ ცვლილებები იქნება საფეხბურთო კლუბის მიმართულებითაც. აქტიურად ვმუშაობთ ბავშვთა ფეხბურთის განვითარებაზე და სოფელ ბახვში საფეხბურთო ინფრასტრუქტურის მოწყობაზე. საფეხბურთო კლუბსაც ეყოლება ახალი ხელმძღვანელი, რომელიც ახალი ენერგიით და დავალებებით შეუდგება საქმიანობას“ – აღნიშნავს თალაკვაძე.
„ წინსაარჩევნოდ მოსახლეობას დავპირდით და უკვე დასრულდა პროექტირება შემდეგი სოფელებისთვის – გოგიეთი, დვაბზუს ნასაკირალი, ჯუმათი, იანეთი, ბოგილი, ძირიჯუმათი, მთისპირი, ოქროსქედი, ვანისქედი, უკანავა, რომლის მიხედვითაც მოხდება გაზის ქსელის მშენებლობა და გაზის მიწოდება დამატებით 800 – მდე ოჯახისთვის. ამ პროექტების განხორციელების შემდეგ სრულად დასრულდება ოზურგეთის მუნიციპალიტეტის გაზიფიცირება“ – აღნიშნა ავთანდილ თალაკვაძემ დღეს გამართულ ოზურგეთის მერიის სხდომაზე.
„ პრემიერ მინისტრის და მთავრობის ინიციატივით, ოზურგეთშიც ვიწყებთ სოციალურად დაუცველთა დასაქმების მასშტაბურ პროგრამას, რომელიც გულისხმობს საზოგადოებრივ სამუშაოებზე სოციალურად დაუცველი ნებისმიერი კვალიფიკაციის მქონე პირის დასაქმებას. ამ პროგრამით დასაქმება ნიშნავს დამატებით შემოსავალს სოციალურად დაუცველი ოჯახებისთვის და არამც და არამც არ გულისხმობს დასაქმების შემთხვევაში, მათთვის სოციალური დახმარების შეწყვეტას, პირიქით მომდევნო 4 წლის განმავლობაში ეს ოჯახები არ დაექვემდებარებიან გადამოწმებას და გარანტირებულად შეუნარჩუნდებათ დანიშნული ფულადი და არაფულადი სიკეთეები. მინდა ჩემს მოადგილეებს ვთხოვო, მაქსიმალურად უზრუნველყონ მოქალაქეებისთვის ამ ინფორმაციის მიწოდება და მათი ჩართვა პროგრამაში“ – განაცხადა ავთანდილ თალაკვაძემ მერიის სხდომაზე.
„დავიწყეთ ფარმაცევტულ კომპანიებთან მოლაპარაკება, რომ მუნიციპალური სოციალური პროგრამებით მოსარგებლე მოქალაქეებმა საჭირო მედიკამენტები შეიძინონ კვირის ნებისიერ დღეს, ფასდაკლების დღეებში არსებული ფასებით. მოგეხსენებათ, რომ მედიკამენტების გაიაფება ჩვენი ხელისუფლების ერთ-ერთი პრიორიტეტია, რისთვისაც მთავრობამ მნიშვნელოვანი ნაბიჯები უკვე გადადგა. ამასთან დაკავშირებით, დამატებით ინფორმაციას უახლოეს მომავალში კიდევ მოგაწვდით,“ – განაცხადა, ოზურგეთის მერმა სხდომაზე.
„ წინა მერიის სხდომაზე უკვე გითხარით ახალ საჩოგბურთო კომპლექსზე, რომლის მშენებლობასაც ვიწყებთ. დღეს, მინდა გაცნობოთ, რომ ცვლილებები იქნება საფეხბურთო კლუბის მიმართულებითაც. აქტიურად ვმუშაობთ ბავშვთა ფეხბურთის განვითარებაზე და სოფელ ბახვში საფეხბურთო ინფრასტრუქტურის მოწყობაზე. საფეხბურთო კლუბსაც ეყოლება ახალი ხელმძღვანელი, რომელიც ახალი ენერგიით და დავალებებით შეუდგება საქმიანობას“ – აღნიშნავს თალაკვაძე.
„აქტიურ ფაზაში გადავდივართ სოფლის მხარდაჭერის წლევანდელი პროგრამების განხორციელებისთვის – მუნიციპალიტეტის ტერიტორიულ ერთეულებში ჩემს წარმომადგენლებს უკვე შევხვდი და მათ აქვთ დავალება, რომ საკრებულოს წევრებთან და ადგილობრივ მოსახლეობასთან, მოქალაქეებთან ერთად, განიხილონ, დაამუშაონ და დაფინანსდეს ის პროექტები, რომელიც სოფლებში საზოგადოებას ყველაზე მეტად სჭირდება, რომელიც ყველაზე პრიორიტეტული და ხარჯთეფექტურია. უნდა მოგვარდეს ისეთი პრობლემები, რომელიც სოფლად ცხოვრების ხარისხს რეალურად გააუმჯობესებს. მზად ვარ ამ შეხვედრებში მეც პირადად ჩავერთო, რამდენადაც ამის საშუალება მექნება. ვთხოვ ჩვენს თანამოქალაქეებსაც იაქტიურონ და ჩაერთონ პროექტების განხილვაში“ – განაცხადა ოზურგეთის მერმა, ავთანდილ თალაკვაძემ მერიის დღვანდელ სხდომაზე.
მუნიციპალიტეტის მერმა, ოზურგეთის მერიის სხდომაზე ორგანიზაცია „ალტ-ინფოსთვის“არსებული ფართის გადაცემასთან დაკავშირებითაც ისაუბრა.
„ გასულ კვირას „ნაციონალური მოძრაობა“ ოზურგეთში ამ მნიშვნელოვანი საკითხებიდან ყურადღების გადატანას სხვაგან ცდილობდა, რადგან არ აწყობთ იმ პრობლემებზე საუბარი, რომელიც აუდიტის დასკვნაშია – არ აწყობთ, რადგან არჩევნების პერიოდში ისინი პირდაპირ და აქტიურად უჭერდნენ წინა მერს მხარს. შესაბამისად, ამ ყველაფერზე პოლიტიკურ პასუხისმგებლობას ისინიც იზიარებენ. ამისათვის მოიგონეს სიცრუის და დეზინფორმაციის მორიგი კამპანია, თითქოს მერიამ თავის საკუთრებაში არსებული ფართი გადასცა ორგანიზაცია „ალტ-ინფოს“. ჩვენ გამოვაქვეყნეთ სრული, დოკუმენტურად დადასტურებული ინფორმაცია, სადაც ჩანს, რომ ეს სიცრუეა და არავითარი ფართის გადაცემა მერიის მხრიდან არ მომხდარა. არავის მივცემთ უფლებას, შეცდომაში შეიყვანოს ჩვენი საზოგადოება. მომავალშიც, სიცრუეს ყოველთვის გაეცემა პასუხი“ – განაცხადა თალაკვაძემ.
სახელმწიფო აუდიტის დასკვნა 2019-2020 წლების პერიოდს ეხება, რომელშიც სერიოზული დარღვევები და გადაცდომებია აღმოჩენილი
„მინდა, გამოვეხმაურო სახელმწიფო აუდიტის დასკვნას, რომელიც 4 მარტს გამოქვეყნდა აუდიტის სამსახურის ვებ-გვერდზე. შემოწმების შესახებ დასკვნა ოზურგეთის მერიის საქმიანობის 2019-2020 წლების პერიოდს ეხება და მასში სერიოზულ დარღევებსა და გადაცდომებზეა მითითებული.
ჩვენმა მოქალაქეებმა უნდა იცოდნენ რა ხარვეზები იყო ბიუჯეტის მართვაში, ხარჯების გაწევასა და ინფრასტრუქტურული პროექტების განხორციელებაში, როგორ მართავდა მერია სახელმწიფო ქონებას და როგორ აკომპლექტებდა მერიის სამსახურებს.
ეს ის საკითხებია, რაზეც ჩვენ არჩევნების წინ ვსაუბრობდით და აღმოჩნდა, რომ სამართლიანად – აუდიტის შემოწმებამ სერიოზული დარღვევები გამოავლინა, რაც მოსაგვარებელია. ამ საკითხებით ოზურგეთის საკრებულოც დაინტერესდება. ჩვენ უკვე ვმუშაობთ აუდიტის სამსახურის რეკომენდაციებზე, რომელზეც ცალკე გეგმას წარვადგენთ“, – განაცხადა მერმა.
ოზურგეთის მუნიციპალიტეტის მერიის სხდომის ბოლოს, ავთანდილ თალაკვაძემ კიდევ ერთ საკითხზე გაამახვილა ყურადღება.
„მინდა მოვუწოდო მოსახლეობას, რომ არ დატოვონ უმეთვალყურეოდ თავიანთი საქონელი/ცხენები – უკვე იძულებული ვიქნებით გავატაროთ შესაბამისი ღონისძიებები, რაც კანონით არის გათვალისწინებული, ვინაიდან ნადგურდება ქალაქში მწვანე ნარგავები, სკვერები და პრობლემა ექმნება სატრანსპორტო მოძრაობას,”- განაცხადა ავთანდილ თალაკვაძემ.
(R)
