გუშინ იტალიური კლუბი „ვირტუს ბოლონიას“ გენერალურმა დირექტორმა ლუკა ბარალდიმ განაცხადა რომ მას შემდეგ რაც გუნდმა ევროლიგის საგზური მოიპოვა, თორნიკე შენგელიას ბოლონიურ გუნდში დარჩენის შანსი გაიზარდა.
„ევროლიგის საგზურის მოპოვებით კარგ პოზიციაში ვართ, რომ შენგელია კლუბში დარჩენაში დავარწმუნოთ და კონკურენცია ისეთ გუნდს გავუწიოთ, როგორიც „ბარსელონაა“. თორნიკე გუნდს კარგად შეეწყო, ოჯახი ბოლონიაში გადმოიყვანა. მასთან თანამშრომლობის გახანგრძლივების წინაპირობებს ვხედავთ“.
გერმანული გამოცემა „Sport1.de“-ს მტკიცებით, პოლონეთის ნაკრების თავდამსხმელი რობერტ ლევანდოვსკი მიუნხენის „ბაიერნთან“ ახალ კონტრაქტს აღარ გააფორმებს. ამის გამო მიუნხენელებმა, შესაძლოა, ზაფხულის სატრანსფერო ფანჯრის დროს პოლონელის გაყიდვაზეც იფიქრონ.
გაირკვა რომ „ბაიერნის“ ხელმძღვანელებისა და 33 წლის შემტევის აგენტ პინი ზაჰავის შორის დაწყებული მოლაპარაკებები უშედეგოდ დასრულდა. ამასთან ერთად, რამდენიმე თვის წინ ლევანდოვსკიმ ამჟამინდელი კლუბის შეცვლის გადაწყვეტილება მიიღო.
მიმდინარე სეზონში პოლონელმა „ბაიერნის“ მაისურით 45 შეხვედრაში 49 გოლი გაიტანა. გერმანულ კლუბთან მის კონტრაქტს ვადა 2023 წლის 30 ივნისს გასდის.
ლეო მესისა და ხერარდ პიკეს შორის მოულოდნელად განხეთქილება ჩამოვარდა. ყველაფერი 12 მაისს დაიწყო, როდესაც პიკემ მასმედიასთან საუბრისას მესის „ბარსელონადან“ წასვლა გაიხსენა და აღნიშნა, რომ იმ დროს იგი ტიროდა და გუნდში დარჩენა უნდოდა.
„მესი „ბარსელონაში“ ყველაზე მნიშვნელოვანი ფეხბურთელი იყო. მე ყოველთვის ვამბობდი, რომ მესი საჭიროა ტიტულების მოსაგებად. როცა მესიმ „ბარსა“ დატოვა, ვტიროდი. მის გამო ვტიროდი. იმის გამო, რომ მისი კარიერა აქ იყო. კარგი იქნება, თუ ის კლუბში კარიერის ბოლომდე დარჩებოდა“.
პიკეს ამ კომენტარს გამოხმაურება გულშემატკივრებში მალევე მოჰყვა, თუმცა გუშინ ხერარდს მესის ოჯახის მეგობარი ინსტაგრამიდან გამოეხმაურა და მას ყალბი უწოდა:
„პიკე შენ ისეთი ყალბი და საშინელი ხარ, რომ არა მხოლოდ არ გიტირია, როცა მესი წავიდა, არამედ ლაპორტას უთხარი, რომ თუ მას გამარჯვებული გუნდის აშენება სურდა, მესი უნდა გაეყიდა. იგივე მესი, რომელმაც „სარაგოსადან“ გიხსნა, მაშინ, როცა არავის უნდოდი, რადგან შენ ღვარძლიანი იყავი, შურიანი და ცუდი გუნდელი“.
საინტერესოა თავის დროზე რატომ აერიათ ურთიერთობა პიკესა და მესის?
არგენტინელსა და პიკეს შორის არც ისე კარგი ურთიერთობა ჩამოყალიბდა, მას შემდეგ, რაც ხერარდმა ხელფასის შემცირებაზე უარი თქვა, რამაც ლეო მესის გუნდში დარჩენა გაართულა. საბოლოოდ, რამდენიმე მოთამაშის მხრიდან მსგავსი უარის მიღების შემდეგ, „ბარსაში“ არგენტინელის დარჩენა ფინანსურად შეუძლებელი გახდა. ეს ყველაფერი გუნდის იმდროინდელი პრეზიდენტი ბართომეუს ფინანსური მაქინაციები დაემატა და „ბარსელონასთვის“ მესის შენარჩუნება არარეალური გახდა.
გუშინ გამოცემა „Mundo Deportivo“ კატალონიური გრანდის თემას შეეხო და გაავრცელა ინფორმაცია რომ „ბარსელონა“ მიმდინარე წლის ზაფხულში შემადგენლობის სერიოზულად გადახალისებას გეგმავს.
გუნდის თავკაცი ჩავი 7-8 ახალი ფეხბურთელის დამატებას ითხოვს. ფრანკ კესისა და ანდრეას კრისტენსენის გადაბირების შემდეგ, კატალონიელები კიდევ 6 მოთამაშის გადაბირებას აპირებენ.
ჩავის სურს მარჯვენა მცველის, მარცხენა მცველის, ცენტრალური მცველის, ფორვარდისა და გარემარბის დამატება.
გამოცემა „Goal“-ის მტკიცებით, „ბარსელონაში“ მხოლოდ ხუთი-ექვსი ფეხბურთელია ხელშეუხებელი, რომელთა შორის ერიკ გარსია, რონალდ არაუხო, პედრი, გავი, ფერან ტორესი და ანსუ ფატი არიან. წამსვლელთა სიას რაც შეეხება, კატალონიელთა აზრით, ყველაზე ძვირად ფრენკი დე იონგი გაიყიდება.
ავტორი
