გუშინ იტალიური გამოცემა „Napoli Goal“ ჟურნალისტ პაოლო დელ ჯენიოს ესაუბრა. დე ჯენიომ ხვიჩა კვარაცხელიას შესახებ შემდეგი განაცხადა:
„კვარაცხელიას უცნაური თვისება შევნიშნე – როგორც კი მეტოქის დონე იწევს, ის უკეთესი ხდება. მან ორი შესანიშნავი მატჩი ჩაატარა, როდესაც საქართველოს ნაკრები ძლიერ მეტოქეებს, შვედეთსა და ესპანეთს დაუპირისპირდა და თანაგუნდელების საერთო დონეც აამაღლა. იმედია, „ნაპოლიშიც“ ასევე მოხდება. გამორჩეულ მატჩებში ხვიჩას არანაირი შიში არ აქვს და პირიქით, უფრო ფეთქდება, ეს კი ძალიან მნიშვნელოვანია.“
გუშინვე ხვიჩა კვარაცხელიაზე ყაზანის „რუბინის“ გენერალურმა დირექტორმა, რუსტემ საიმანოვმა ისაუბრა. ყაზანური გუნდის ხელმძღვანელმა განაცხადა, რა შემთხვევაში მიიღებს „რუბინი“ ქართველი ფეხბურთელის ტრანსფერიდან თანხას.
„ფული ხვიჩას სანაცვლოდ? ყველაფერი უეფასა და ფიფას გადაწყვეტილებაზეა დამოკიდებული, მაგრამ ისინი ცბიერები არიან. ვვარაუდობ, რომ ისევ იტყვიან, ფეხბურთელები თავისუფალი აგენტები არიანო. ისინი დღევანდელ ვითარებას გაახანგრძლივებენ და შემდეგ ფეხბურთელთა კონტრაქტები საერთოდ დასრულდება. თუ ვერდიქტი ჩვენთვის სასიკეთო იქნება, ფულს მივიღებთ. ამაზე შეთანხმება გვაქვს დადებული. ვიმედოვნებთ, რომ საღი აზრი გაიმარჯვებს, მაგრამ ყველაზე ცუდისთვის ვემზადებით.“
რამდენიმე დღის წინ ქართველის შესახებ „ნაპოლის“ მთავარმა მწვრთნელმა ლუჩიანო სპალეტიმაც ისაუბრა: – „გენიოსები და ილუზიონისტები უნდა შევინარჩუნოთ, რომლებიც ყველა გუნდში არიან საჭირო. ინსინიე ერთ-ერთი მათგანია და ჩვენი ახალწვეული ხვიჩა კვარაცხელიაც ამ უნარების მქონე მოთამაშეა. იგი უნდა შეეგუოს ისეთ რთულ ჩემპიონატს, როგორიც ჩვენ გვაქვს და გუნდს, რომელიც ჩვენ გვყავს. ყველანი ვნახავთ, შეძლებს თუ არა იგი განსხვავებულ ფეხბურთთან ადაპტაციას“.
გუშინ გამოცემამ „Marca“ „ვალენსიაში“ არსებულ მდგომარეობას სპეციალური წერილი მიუძღვნა და დაწერა რომ მიმდინარე წლის ზაფხულში კლუბი არაერთი ფეხბურთელის გაყიდვას აპირებს.
„ვალენსიას“ ყველა ფეხბურთელის მომავალი კითხვის ნიშნის ქვეშ დგას და ხელშეუხებელი არავინაა. სოლერის წასვლა, რომელიც „სელტასთან“ მატჩის შემდეგ, „მესტალიას“ სტადიონს დაემშვიდობა, მხოლოდ დასაწყისი იქნება. „ვალენსიამ“ ფეხბურთელები უნდა გაყიდოს და თუ წინადადებებს მიიღებს, ახლახან გაფორმებულ ისეთ მოთამაშეებსაც შეელევა, როგორებიც მამარდაშვილი ან უგო დურო არიან. „ვალენსიას“ ფეხბურთელებს ის გუნდი შეიძენს, რომელიც მათ სანაცვლოდ ყველაზე მეტს გადაიხდის“, – წერს ესპანური გამოცემა.
შოთა არველაძის „ჰალ სიტი“ კი უკრაინის მხარდამჭერ კამპანიაში ერთვება და ზაფხულში, დონეცკის „შახტარის“ წინააღმდეგ ამხანაგურ შეხვედრას გამართავს. შეხვედრა სავარაუდოდ, ივლისში გაიმართება და საქველმოქმედო ხასიათი ექნება.
„ჰალ სიტი“ საკუთარ სტადიონზე იასპარეზებს და შეხვედრის მიზანი რუსეთთან ომისგან დაზარალებული უკრაინელების დასახმარებლად თანხის შეგროვება იქნება.
ევროპის ძალოსნობის ფედერაციის მიერ ჩატარებული გამოკითხვის შედეგად, სადაც ხმის მიცემა ელექტრონულად მიმდინარეობდა, კონტინენტის მოსახლეობამ საუკეთესოდ ლაშა ტალახაძე ცნო!
ხმათა უმრავლესობით მსოფლიოს მრავალგზის უძლიერესი ძალოსანი ევროპაშიც საუკეთესოდ დასახელდა.
ლაშა ტალახაძეს ჯილდო ალბანეთში, ევროპის ჩემპიონატის გახსნის საიუბილეო ღონისძიებაზე გადაეცემა!
გუშინ გამოცემამ „Bolognabasket“ გაავრცელა ცნობა, რომ საქართველოს ნაკრებისა და „ვირტუსის“ მოთამაშე თორნიკე შენგელია შესაძლოა, მოედანს დაგეგმილზე ადრე დაუბრუნდეს და უკვე „სერია A“-ს ნახევარფინალური სერიაში ითამაშოს.
„ვირტუსს“ ორდღიანი დასვენება ჰქონდა, გუშინ კი პირველი ვარჯიში ჩაატარა. მასში მონაწილეობა არ მიუღიათ მილოშ ტეოდოსიჩსა და თორნიკე შენგელიას, თუმცა, საქმე უიმედოდ ნამდვილად არაა. ტეოდისიჩი რომ უახლოეს პერიოდში საქმეში იქნება, ეჭვგარეშეა. ელიან, რომ რამდენიმე დღეში დაიწყებს ვარჯიშს შენგელიაც, ამ შემთხვევაში კი, პარასკევს დაგეგმილ შეხვედრაში მონაწილეობის მიღებას ისიც მოახერხებს”.
საქართველოს ნაკრების კაპიტანმა კოჭის ტრავმა 15 მაისს მიიღო. საბედნიეროდ, ტრავმა სერიოზული არ გამოდგა და დიდია ალბათობა, რომ თორნიკე „ტორტონასთან“ ნახევარფინალში საქმეში ვიხილოთ. ნახევარფინალური სერია 27 მაისს დაიწყება და სამ მოგებამდე გაგრძელდება.
ავტორი
