საქართველოს ეროვნული გუნდისა და „ნაპოლის“ თავდამსხმელმა ხვიჩა კვარაცხელიამ ქალაქ ნეაპოლში საცხოვრებელი ადგილი შეიცვალა. ქართველი ფეხბურთელი ამიერიდან ნეაპოლის ცენტრში, „ვია ტასოს“ ქუჩაზე იცხოვრებს.
„კვარა“ შესანიშნავი პროფესიონალია, მოედნის გარეთ სერიოზული და თავმდაბალი ბიჭია. რამდენიმე თვის წინ სამწუხარო ფაქტი მოხდა, როდესაც ახალგაზრდა მოთამაშეს მანქანა მოპარეს, ამის შემდეგ ხვიჩა დროებით ნეაპოლში ერთ-ერთ სასტუმროში ცხოვრობდა, თუმცა ჩვენთვის ცნობილი ხდება, რომ ახლა ახალი სახლი აქვს.
კვარაცხელია ნეაპოლის ცენტრში „ვია ტასოს“ ქუჩაზე იცხოვრებს, საცხოვრებელი ადგილი უზრუნველყოფილია 24-საათიანი დაცვითა და პარკინგით“, – დაწერა გუშინ იტალიურმა გამოცემამ „Areanapoli.it“.
იტალიელმა ჟურნალისტმა ჩირო ვენერატომ გაავრცელა ცნობა, რომ მიმდინარე წლის ზაფხულში ციქტორ ოსიმენი ნეაპოლურ გუნდს აუცილებლად დატოვებს.
„აურელიო დე ლაურენტისის მიზანს ზაფხულის სატრანსფერო ფანჯრის პერიოდში ოსიმენის გაყიდვა წარმოადგენს. მისი და რაფაელ ლეოას შეძენა ბევრ გრანდს სურს. ფეხბურთელის თაობაზე „ნაპოლისა“ და „პსჟ“-ის წარმომადგენლებს შორის შეხვედრა შედგა. ნიგერიელით ასევე პრემიერლიგის გრანდები – „ჩელსი“ და „მანჩესტერ იუნაიტედი“ ინტერესდებიან. დე ლაურენტისი ვიქტორის სანაცვლოდ 150 მილიონ ევროს ითხოვს“,– განაცხადა ჩირო ვენერატომ.
იტალიურმა გამოცემამ „Il Mattino“ კი გაავრცელა ცნობა, რომ „ნაპოლის“ მთავარმა მწვრთნელმა ლუჩიანო სპალეტიმ „სერია A“-ს მომდევნო ტურის მატჩისთვის, სადაც მისმა გუნდმა „ატალანტას“ უნდა უმასპინძლოს, გარკვეული ცვლილებები დაგეგმა.
შესაძლოა, ხვიჩა კვარაცხელიამ დაისვენოს და მის ნაცვლად ძირითადში ელიფ ელმასი ვიხილოთ, ტანგი ნდომბელემ ძამბო ანგისა ჩაანაცვლოს, მესამე იდეა კი ირვინგ ლოზანოს ნაცვლად მატეო პოლიტანოს დაყენებაა.
აშშ-ის NBA-ს რეგულარულ ჩემპიონატში ქართველი კალათბურთელების გუნდებმა მორიგი მატჩები გამართეს. გოგა ბითაძის „ორლანდომ“ შინ „პორტლენდი“ მიიღო, ხოლო სანდრო მამუკელაშვილის „სან ანტონიო“ სტუმრად „ჰიუსტონს“ დაუპირიპისპირდა.
„ორლანდოს“ რიგებში მესამე შეხვედრა ჩაატარა გოგა ბითაძემ. ქართველმა ცენტრმა „პორტლენდთან“ საშინაო შეხვედრაში სათადარიგოთა სკამიდან, 6:12 წუთი ითამაშა, რა დროშიც 4 ქულა და 2 მოხსნა მიითვალა. შეხვედრა სტუმარი კლუბის გამარჯვებით დასრულდა – 119:122.
„სან ანტონიო“ „ჰიუსტონს“ ზედიზედ მეორედ, ამჯერად სტუმრად დაუპირისპირდა და ისევ დამარცხდა – 142:110.
სანდრო მამუკელაშვილმა კი, რომელიც „სან ანტონიოს“ სულ ახლახან შეუერთდა, გრეგ პოპოვიჩის გუნდში მეორედ ითამაშა.
სანდრო თამაშში სათადარიგოთა სკამიდან ჩაერთო, მოედანზე კი 17:17 წუთი გაატარა, რა დროშიც 6 ქულა, 4 მოხსნა და 1 ჩაჭრა მიითვალა.
ცნობილი გახდა, რომ საქართველოს პირველი ჩოგანი ნიკოლოზ ბასილაშვილი „ინდიან უელსის“ მასტერსზე პირდაპირ ძირითად ბადეში იქნება. ამის მიზეზი კი ისაა, რომ მსოფლიო რეიტინგის პირველ ნომერ ნოვაკ ჯოკოვიჩს აშშ-ში შესვლის უფლება არავაქცინირებულობის გამო არ მისცეს.
გუშინ „ინდიან უელსის“ ტურნირის ოფიციალურ სოციალურ გვერდზე გამოქვეყნდა ინფორმაცია, სადაც ნათქვამია, რომ სერბს ძირითად ბადეში სწორედ ქართველი ჩაანაცვლებს.
2021 წელს ბასილაშვილმა ამ მასტერსზე ფინალში ითამაშა, სადაც ბრიტანელ კამერონ ნორისთან დამარცხდა, 2022 წელს პირველ რაუნდში მისმა მეტოქე ფაბიო ფონინიმ კორტზე გამოსვლაზე უარი თქვა, მეორე წრეში კი ჩვენებურმა სწორედ ზემოთ ნახსენებ ნორისთან წააგო, რის გამოც რეიტინგში საგრძნობი ვარდნა განიცადა.
ბასილაშვილი ახლა მსოფლიოს 118-ე ჩოგანია. მას ასეთი ცუდი შედეგი 2016 წლის მერე არ ჰქონია.
ტურნირის საპრიზო ფონდი 10,143,750 დოლარს -ს შეადგენს. ძირითადი ეტაპის შეხვედრები 8 მარტს დაიწყება. ბასილაშვილის მეტოქე მოგვიანებით გახდება ცნობილი.
