„მკაფიოდ გვინდა დავაფიქსიროთ ჩვენი პოზიცია, რომ საქართველოში არ იოპერირებს არცერთი კომპანია და არცერთი ხომალდი, რომელიც იქნება სანქცირებული, რაც შეეხება არასანქცირებულ ავიაკომპანიებს და ხომალდებს, მათ, რა თქმა უნდა, არ ექნებათ შეზღუდვა განახორციელონ პირდაპირი საჰაერო მიმოსვლა საქართველოს ტერიტორიაზე“, – განაცხადა ეკონომიკისა და მდგრადი განვითარების მინისტრის მოადგილემ, მარიამ ქვრივიშვილმა.
რუსეთის ფედერაციის პრეზიდენტის, ვლადიმერ პუტინის განკარგულების მიხედვით, რუსეთი საქართველოსთან უვიზო მიმოსვლას აუქმებს. ასევე, ვლადიმერ პუტინმა რუსული ავიაკომპანიებისთვის საქართველოში პირდაპირი ფრენის აკრძალვაც მოხსნა.
„ამ ეტაპისთვის არანაირი ნებართვა არ არის საქართველოს მხრიდან გეცმული, რადგან ამ ეტაპისთვის ჩვენ არ გვაქვს მომართვა არცერთი ავიაკომპანიის მხრიდან, მათ შორის არც სახელმწიფოს მხრიდან, მომართვის შემთხვევაში ყველა კომპანია, რომელიც იქნება არასანქცირებული და ის ბორტები, რომლებიც არ იქნებიან სანქცირებულები ისინი შეძლებენ საქართველოში პირდაპირი რეისების შესრულებას, ისევე, როგორც ისინი ოპერირებენ მაგალითად ისრაელში, თურქეთში, აზერბაიჯანში, სომხეთსა და გაერთაინებულ საემიროებში“, – განაცხადა ქვრივიშვილმა.
რუსეთის მიერ საქართველოსთან სავიზო რეჟიმი ვლადიმერ პუტინის გადაწყვეტილებით, 15 მაისიდან გაუქმდება. საქართველოს მოქალაქეებს ვიზის გარეშე რუსეთის ტერიტორიაზე ყოფნის უფლება 90 დღემდე ვადით შეეძლებათ.
რაც შეეხება რუსული ავიაკომპანიებისთვის საქართველოში ფრენაზე აკრძალვის მოხსნას, უკვე გამოქვეყნდა ვლადიმერ პუტინის შესაბამისი ბრძანება, რომლის მიხედვითაც, პრეზიდენტის 2019 წლის 21 ივნისის ბრძანება საქართველოში ფრენის აკრძალვის შესახებ ძალადაკარგულად გამოცხადდა.
