ესპანურმა „ვალენსიამ“ სეზონისწინა მოსამზადებელ ეტაპზე მორიგი ამხანაგური მატჩი ჩაატარა, საკუთარ საწვრთნელ ბაზაზე“ლა ლიგაში“ აღზევებულ „ალავესს“ უმასპინძლა და დაამარცხა – 2:0.
ესპანურ გუნდში მიმდინარე სეზონში პირველად იასპარეზა გიორგი მამარდაშვილმა – ქართველმა მეორე ტაიმი ითამაშა. აღსანიშნავია, რომ მამარდაშვილმა „ვალენსიას“ შესვენების შემდეგ უკაპიტნა კიდეც.
მატჩს გიორგის აგენტი, ლევან სეთურიძეც ესწრებოდა. ქართველი კარის დარაჯის ტრანსფერზე აქტიურად საუბრობენ, მაგრამ ჯერჯერობით, ვალენსიელთა რიგებში რჩება.
გიორგი მამარდაშვილს მიუნჰენის „ბაიერნს“ უკავშირებდნენ, მაგრამ გუშინ ცნობილი გახდა რომ გერმანულმა კლუბმა ქართველის ყიდვა საბოლოოდ გადაიფიქრა.
ცნობილმა იტალიელმა ჟურნალისტმა ფაბრიციო რომანომ დაწერა, რომ გერმანელებმა გადაწყვეტილება უკვე მიიღეს „ბრენტფორდის“ ესპანელ მეკარე დავიდ რაიას შეიძენენ. მიუნჰენელებმა რაიას შეძენა 100%-ით გადაწყვიტეს და შემდეგი კვირის ბოლომდე ამ ტრანსფერის განხორციელებას გეგმავენ. ეს კი ნიშნავს იმას, რომ გიორგი მამარდაშვილის გერმანულ გრანდში ტრანსფერი გამოირიცხა.
36 წლის ურუგვაელი ედინსონ კავანი კი ახალი სეზონიდან „ვალენსიას“ ღირსებას აღარ დაიცავს. მან კლუბი თავისუფალი აგენტის სტატუსით დატოვა და კარიერას სამხრეთ ამერიკაში გააგრძელებს. კავანი არგენტინაში წავიდა, სადაც „ბოკა ხუნიორსის“ მაისური უნდა მოირგოს.
ხვიჩა კვარაცხელიას „ნაპოლიმ“ წინასასეზონო მზადების მესამე მატჩი ითამაშა. კასტელ დი სანგროში თურქული „ჰატაისპორი“ დიდი ანგარიშით დაამარცხა – 4:0.
ამ შეხვედრაში სასტარტოში ერთბაშად სამმა ფეხბურთელმა ითამაშა გიორგი აბურჯანიამ და საბა ლობჟანიძემ თურქული კლუბის შემადგენლობაში და ხვიჩა კვარაცხელიამ – იტალიურ კლუბში. ხვიჩამ რუდი გარსიას ხელმძღვანელობით მეორედ ითამაშა და პირველად სასტარტოში.
ამ შეხვედრაში ორი გოლი ვიქტორ ოსიმენმა გაიტანა, ორიც მის მაგივრად შესულმა ჯოვანი სიმეონემ. მე-2 გოლი 27-ე წუთზე ნიგერიელმა ქართველის გადაცემით გაიტანა. მეორე ტაიმის მე-8 წუთზე კვარაცხელიას გატანა მართებდა, თუმცა მარჯვენა ფეხით ოდნავ ააცილა ბურთი მეტოქის კარს და ხელსაყრელი მომენტი ხელიდან გაუშვა. მალევე რუდი გარსიამ მთელი შემადგენლობა შეცვალა.
იტალიური მედია ყურადღებას რუდი გარსიას გუნდში ხვიჩა კვარაცხელიას შეცვლილ როლზე ამახვილებს. გამოცემა „Gazzetta dello Sport“ წერს, რომ ლუჩანო სპალეტისგან განსხვავებით, ფრანგი სპეციალისტი 22 წლის ქართველისგან იერიშების განხორციელებას ფლანგიდან უფრო შიგნით, ცენტრალური მხრიდან მოითხოვს.
„სპალეტის ხელში ხვიჩა კვარაცხელიამ თავისი თავი ფრთაზე იპოვა. ის მოშორებით, ლამის აუტის ხაზთან მოქმედებდა, ბურთს კი უკვე კარის წინ იღებდა და მაშინვე ურტყამდა. მას ჰქონდა სრული თავისუფლება, შეეძლო შეცდომების დაშვებაც, რათა ნებისმიერ მომენტში მოეფიქრებინა რამე და გაემწვავებინა თამაში.
ეს ის არის, რასაც წელს გარსიაც მოითხოვს მისგან, თუმცა, განსხვავება ბურთის მიღების წერტილში იქნება. გარსიას ვერტიკალურად შეტევა და მეტოქის დაცვის ცენტრალური კედლის გარღვევა უყვარს. შესაბამისად, მწვრთნელის იდეა კვარას წინ წაწევა, მისი მეტოქის კართან მიახლოებაა, რათა კარში უფრო ხშირად ურტყას. ის ოსიმენთან უფრო ახლოს უნდა იყოს და მეტოქის დაცვაში არეულობა შეჰქონდეს“, – დაწერა იტალიურმა გამოცემამ.
ცნობილი გახდა, რომ კილიან მბაპეს უარის შემდეგ საუდის არაბეთის კლუბი „ალ-ჰილალი“ „ნაპოლის“ ნიგერიელი თავდამსხმელის, ვიქტორ ოსიმენის გადაბირებას ცდილობს.
გამოცემა „Il Mattino“-ს ცნობით, საუდელები „ნაპოლის“ პრეზიდენტს, აურელიო დე ლაურენტისს უკვე დაუკავშირდნენ და 24 წლის ფორვარდის სანაცვლოდ 130 მილიონი ევრო შესთავაზეს. გავრცელებული ინფორმაციის თანახმად, ცნობილია იტალიის მოქმედი ჩემპიონების პოზიციაც – მათ ოსიმენის შენარჩუნება სურთ და კონტრაქტის გახანგრძლივებაზეც მუშაობენ, ნიგერიელის გამოსასყიდი თანხა კი მინიმუმ 200 მილიონი ევროა.
ორკვირიანი უქმობის შემდეგ გიორგი კვერნაძე მოედანზე დაბრუნდა. „ფროზინონეს“ ქართველმა ფეხბურთელმა „სალერნიტანასთან“ ამხანაგურ მატჩში ითამაშა.
ის მოედანზე მე-60 წუთზე გამოჩნდა და საგოლე შეტევაში მიიღო მონაწილეობა. 78-ე წუთზე მან კარგი პასი გაუკეთა თანაგუნდელს, რომელმაც უკვე საგოლე გადაცემით მოამარაგა ფრანჩესკო ჯელი, რომელმაც ანგარიში გახსნა. საბოლოოდ, თამაში ფრედ, 1:1 დასრულდა.
კვერნაძემ „ფროზინონეში“ პირველივე მატჩში გოლი გაიტანა, მაგრამ ტრავმა მიიღო, რის გამოც მომდევნო ორი ამხანაგური შეხვედრა გამოტოვა და მოედანს მხოლოდ ახლა დაუბრუნდა.
„ფროზინონე“ მომდევნო ამხანაგურ თამაშს 5 აგვისტოს „კოზენცასთან“ ჩაატარებს, ხოლო „სერია A“-ს პირველ ტურში 19 აგვისტოს, ხვიჩა კვარაცხელიას „ნაპოლის“ უმასპინძლებს.
ავტორი
