„ეს სეზონი მამარდაშვილის მომავლისთვის გადამწყვეტია“

გუშინ, ესპანურმა გამოცემამ „AS“ საქართველოს ეროვნული გუნდისა და „ვალენსიას“ კარის დარაჯ გიორგი მამარდაშვილს სპეციალური წერილი მიუძღვნა:

„მამარდაშვილმა „ალმერიასთან“ თავისი ერთ-ერთი საუკეთესო შეხვედრა ჩაატარა მას შემდეგ, რაც „ვალენსიას“ მეკარე გახდა. ამაზე ციფრები მეტყველებს. ქართველმა მეკარემ 8 სეივი შეასრულა. ეს მისი, როგორც მეკარის პირადი რეკორდია იმ მატჩებში, რომლებშიც „ვალენსია“ გატანას ახერხებდა. სხვა სიტყვებით რომ ვთქვათ, ყოფილა თამაშებიც, რომლებშიც მას უფრო მეტჯერაც გადაურჩენია კარი, მაგრამ იმ დუელებში „ვალენსია“ მარცხდებოდა. დასანანი ის არის, რომ გიორგის ამ რვა სეივიდან ორის შემდეგ ბურთი არიბასის ფეხებთან აღმოჩნდა, რომელმაც ორივეჯერ გაუტანა.

შეიძლება ითქვას, ეს სეზონი მამარდაშვილის მომავლისთვის გადამწყვეტია. გასულ ზაფხულს პიტერ ლიმს („ვალენსიას“ პრეზიდენტი) მეკარის ტრანსფერზე დამაკმაყოფილებელი შეთავაზება არ მიუღია, მაგრამ გიორგი თუ ასე გამოსვლას გააგრძელებს, მომავალ წელს ლიმი აუცილებლად მიიღებს საკადრის წინადადებას.

„ვალენსიას“ ბოლო მატჩები, რომლებშიც მამარდაშვილი „ვალენსიას“ სასტარტო შემადგენლობაში არ იყო, 2021-22 წლების სეზონის მიწურულს გაიმართა. მაშინ ბორდალასმა ბოლო ორ თამაშში ნდობა ხაუმეს გამოუცხადა, რამდენადაც გუნდი გავარდნას გადარჩენილი იყო და თასის ფინალიც უკვე ჩავლილი იყო. 

მას შემდეგ ქართველმა მეკარემ ითამაშა 2022-23 წლების ჩემპიონატის 38-ივე შეხვედრაში, ესპანეთის სუპერთასის 1/2-ფინალში „რეალთან“ და სამი მატჩში თასზე. ის გატუზომ მხოლოდ ბოლო 12 წუთით შეცვალა „ლა ნუსიასთან“ სათასო მატჩში, რითაც თამაშის საშუალება აიგო ერენინს მისცა.

მამარდაშვილი შეუცვლელია ამ სეზონშიც (6 მატჩი) და ჯამში, მეკარეს „ვალენსიას“ სასტარტო შემადგენლობაში უკვე ზედიზედ 48 შეხვედრა აქვს დაწყებული და თუკი დღეს „რეალ სოსიედადთანაც“ ითამაშებს, კვირას, „ბეტისთან“ დაპირისპირებაში ამ მაჩვენებლის 50-მდე დამრგვალების შანსი მიეცემა“, – დაწერა გამოცემამ.

გუშინ, გამოცემამ „ფუტბოლ იტალია“ გაავრცელა ცნობა, რომ „ნაპოლის“ მეპატრონე აურელიო დე ლაურენტისმა ოთხი მატჩი მისცა რუდი გარსიას, მდგომარეობის გამოსასწორებლად.

ნეაპოლური კლუბი უახლოეს მატჩებს “უდინეზეს”, “ლეჩეს”, “ფიორენტინასა” და “რეალის” წინააღმდეგ გამართავს.

გარდა იმისა, რომ “ნაპოლი” ვერ იგებს, არ უვარგა თამაშის ხარისხიც. აქედან გამომდინარე, დე ლაურენტისი ეცდება, ბევრი აღარ დააყოვნოს და ფრანგს მანამდე მიუთითოს კარისკენ, ვიდრე მდგომარეობის გამოსწორება შესაძლებელი იქნება.

დე ლაურენტისისთვის ერთ-ერთი ყველაზე სასურველი კანდიდატი ანტონიო კონტეა, თუმცა ეჭვობენ, “იუვენტუსის”, “ჩელსისა” და “ტოტენჰემის” ყოფილი მწვრთნელი დათანხმდეს ნეაპოლში მუშაობას ლაურენტისის ფაქტორის გამო.

სიაში არიან ფრანგი კრისტოფ გალტიე, რომელიც ამ ზაფხულს უკვე იყო “ნაპოლიში” დანიშვნის სერიოზული კანდიდატი, მაგრამ დე ლაურენტისმა ბოლოს არჩევანი მაინც გარსიაზე შეაჩერა.

ლაპარაკია ასევე ხორვატ იგორ ტუდორზე, რომელიც კარგად იცნობს იტალიურ ფეხბურთს და უპირატესობას ანიჭებს დე ლაურენტისისთვის მისაღებ 4-3-3 სისტემას. თან ამ მომენტისთვის ტუდორი უმუშევარია “მარსელიდან” გათავისუფლების შემდეგ…

გუშინ, ახლო წარსულში ცნობილმა იტალიელმა ფეხბურთელმა ჯანფრანკო ძოლამ „Sky Italia“-სთან ინტერვიუში “ნაპოლისა” და ხვიჩა კვარაცხელიას შესახებ ისაუბრა.

„რა თქმა უნდა, “ნაპოლის” სტარტს იდეალურს ვერ ვუწოდებთ, თუმცა ამას თავისი მიზეზები აქვს, გუნდში მოვიდა ახალი მწვრთნელი, რომელსაც საკუთარი იდეების განსახორციელებლად დრო სჭირდება.

რაც შეეხება ხვიჩას, გამიხარდა, რომ “ნაპოლიში” დარჩა. ვიცოდი, რომ ეს წელი მისთვის ყველაზე რთული იქნებოდა, რადგან საკუთარი კლასი სწორედ ახლა უნდა დაამტკიცოს. რატომ ვეღარ ბრწყინავს ძველებურად? მეტოქეებმა შეისწავლეს, ყველაფერს სწორედ ეს ართულებს. დარწმუნებული ვარ, რომ შესანიშნავ სეზონს ჩაატარებს”, – განაცხადა ძოლამ.