18 წლის ახალგაზრდა სპორტსმენი, ოზურგეთის მუნიციპალიტტის სოფელ ჭანიეთის მკვიდრი სოსო ჩახვაძე ძალისმიერ სამჭიდში მსოფლიო ჩემპიონი გახდა.
ამ არაოლიმპიური, თუმცა ძალზე საინტერესო ძალისმიერი სპორტის სახეობაში მსოფლიო ჩემპიონატი 10-13 ოქტომბერს სლოვაკეთში ჩატარდა.
_მე გამოვედი 110 კგ წონით კატეგორიაში, ამოწევასა და წოლჭიმში. ამოწევაში გავხდი მსოფლიო ჩემპიონი, ხოლო წოლჭიმში ჩემპიონატის პრიზიორი. უდიდეს მადლობას ვუხდი ჩემს მწვრთნელს, დავით მჟავანაძეს. ამ გამარჯვებას ვუძღვნი ჩემ სამშობლოს, მშობლიურ ჭანიეთს, ოჯახს და ბაბუს ხსოვნას, რომლის სახელმოზიარეც ვარ, – გვითხრა სოსომ.
იგი დაგვპირდა, რომ 16 ოქტომბერს ბრუნდება საქართველოში და შეგვხვდება.
აღნიშნულ ჩემპიონატზე მეორე ადგილი პოლონეთის, ხოლო მესამე _ სლოვაკეთის წარმომადგენლებმა დაიკავეს.
_ჭიდაობის სექციაში დიდხანს დადიოდა, ძალიან ძლიერია და მინდოდა, ჭიდაობაშივე დარჩენილიყო. საუკეთესო, ძლიერი ახალგაზრდაა. მერე თვითონ აირჩია ძალოსნობის ეს სახეობა. შინ ჰქონდა სხვადასხვა შტანგები. თავის თავზე ძალიან ბევრს მუშაობდა და რაც უყვარდა და მოსწონდა, იმ სახეობაში მიაღწია ასეთ შედეგს და ვულოცავ, _ გვეუბნება ცნობილი ოზურგეთელი მწვრთნელი გურამ მაჭარაშვილი.
მკითხველს შევახსენებთ, რომ სპორტის ეს სახეობა სოსო ჩახვაძის გატაცება პატარაობიდანვე იყო. ყველა ხედავდა, წლების მანძილზე, სოფლის გზაზე დილაადრიან მორბენალ ბიჭს, რომელიც თავდაუზოგავად, საკუთარი ძალებით და შთაგონებით ვარჯიშობდა. მიზანდასახულობა იმდენად ძლიერი იყო, რომ მან თანმიმევრულად მოიპოვა მრავალი გამარჯვება და დათქმისამებრ, მსოფლიო ჩემპიონატი მოიგო დ გახდა ჩემპიონი ძალისმიერ სამჭიდში.
ჩვენ მალე ვრცლად შემოგთავაზებთ სტატიას სოსო ჩახვაძის შესახებ.
„გურია ნიუსი“ ულოცავს მოტივირებულ ახალგაზრდას ამ დიდ გამარჯვებას და კვლავ წარმატებებს ვუსურვებთ.
ავტორი
