ხანძარი იყო ბორჯომ-ხარაგაულის ეროვნულ პარკში.
როგორც დაცული ტერიტორიების სააგენტო იუწყება, ხანძარი ამ დროისთვის ლიკვიდირებულია.
გავრცელებული ინფორმაციით, 5 სექტემბერს, ღამით, ბორჯომ-ხარაგაულის ეროვნული პარკის აწყურის უბანზე, ციხისძირის მთის ტერიტორიაზე, ხეზე მეხის დაცემის შედეგად გაჩნდა ხანძარი. შემთხვევის შესახებ ინფორმაცია ადმინისტრაციას მწყემსებმა მიაწოდეს.
“ადგილზე ოპერატიულად მივიდა ეროვნული პარკის 8 რეინჯერი, რომლებიც შესაბამისი აღჭურვილობით იყვნენ უზრუნველყოფილნი. ხანძარი გავრცელებული იყო დაახლოებით 500 კვადრატულ მეტრ ფართობზე და მოიცავდა ბალახს, ბუჩქნარსა და ნამეხარ ხეს. რამდენიმესაათიანი მუშაობის შედეგად, რეინჯერებმა ცეცხლი სრულად ჩააქრეს. ამ ეტაპზე მიმდინარეობს ხანძრის კერების დამუშავება.
აღსანიშნავია, რომ ბორჯომ-ხარაგაულის ეროვნული პარკი, როგორც ერთ-ერთი ხანძარსაშიში ტერიტორია, აღჭურვილია ხანძარსაწინააღმდეგო აღჭურვილობით, რაც შესაძლებლობას იძლევა ხანძრის აღმოჩენის შემთხვევაში, სპეციალური სამსახურების ჩართულობამდე, რეინჯერებმა მყისიერი რეაგირება მოახდინონ ხანძრის გავრცელების თავიდან არიდების მიზნით”,_ აცხადებს დაცული ტერიტორიების სააგენტო.
