2008 წლის 8 აგვისტოს რუსეთ-საქართველოს ომიდან 18 წელი შესრულდა. ეს ტრაგიკული და ამავდროულად გმირული თარიღი გურიის სამივე მუნიციპალიტეტში დაღუპული მებრძოლების პატივისმიგებითა და სულის მოსახსენიებელი პარაკლისებით აღინიშნა. თუმცა, ოფიციალური ცერემონიალების პარალელურად, ქვეყანაში კვლავ მწვავედ დგას ომის ვეტერანთა და გმირების ოჯახთა მხარდაჭერის საკითხი, ხოლო თბილისსა და საზღვარგარეთ ომის დაწყების თარიღსა და პასუხისმგებლობაზე მორიგი პოლიტიკური დაპირისპირება გაჩაღდა.
ოზურგეთში, ლანჩხუთსა და ჩოხატაურში ადგილობრივი თვითმმართველობისა და მხარის ხელისუფლების წარმომადგენლებმა ომში დაღუპული გურული მებრძოლების საფლავები და მემორიალები ყვავილებით შეამკეს.
ოზურგეთის მუნიციპალიტეტში მერმა პაატა კუნჭულიამ, საკრებულოს თავმჯდომარე დავით დარჩიამ, გურიის მხარისა და ადგილობრივი ხელისუფლების წარმომადგენლებთან ერთად, პატივი მიაგეს 8 აგვისტოს ომში დაღუპული გმირების _ თეიმურაზ ჭიტაძის, თამაზ ნიკიტინისა და ზაურ თენიეშვილის ხსოვნას. მათ ყვავილებით შეამკეს საქართველოს დამოუკიდებლობისა და ტერიტორიული მთლიანობისთვის დაღუპულთა მემორიალი და ეროვნული გმირის, ზაზა დამენიას საფლავი.
“მათ ყველაზე ძვირფასი, საკუთარი სიცოცხლე გაწირეს სამშობლოს თავისუფლების, დამოუკიდებლობისა და ტერიტორიული მთლიანობისთვის. მათი თავდადება და გმირობა სამუდამოდ დარჩება ჩვენი ქვეყნის ისტორიაში”, _ აღნიშნა პაატა კუნჭულიამ.
ჩოხატაურის მუნიციპალიტეტის მერმა მინდია ჟღერიამ, საკრებულოს თავმჯდომარე ჯუმბერ ბერძენიშვილთან და სახელმწიფო რწმუნებულის მოადგილეებთან ერთად, ყვავილებით შეამკო ჩოხატაურელი გმირების _ მერაბ ახობაძის, ფილიპე (ლერი) მგალობლიშვილისა და მურთაზ ირემაძის საფლავები. წმინდა იოაკიმესა და ანას სახელობის საკათედრო ტაძარში საქართველოს ტერიტორიული მთლიანობისთვის დაღუპულ მებრძოლთა სულის მოსახსენიებელი პანაშვიდი აღევლინა.
ლანჩხუთის მუნიციპალიტეტის მერმა ალექსანდრე სარიშვილმა, საკრებულოს თავმჯდომარე ბესიკ ტაბიძესთან და სახელმწიფო რწმუნებულის მოადგილე ზაზა შოშიტაიშვილთან ერთად, 2008 წლის აგვისტოს ომში დაღუპულთა ხსოვნას პატივი მიაგო. მათ ყვავილებით შეამკეს გმირების _ ემზარ წილოსანის, რუსლან წულაძის, ვასილ სმირნოვისა და გიორგი ლომაძის საფლავები. აგარაკის ივერიის ღვთისმშობლის ხატის სახელობის ტაძარში დაღუპული გმირების სულთა მოსახსენებელი პანაშვიდი აღევლინა.
“2008 წლის აგვისტოს ომიდან 18 წელი გავიდა. ვიხსენებთ ჩვენს ბიჭებს, რომლებმაც სიცოცხლე ჩვენს ქვეყანას, თავისუფლებას და ღირსებას შესწირეს. არასოდეს დავივიწყებთ მათ სახელებს. ქედს ვიხრით დაღუპულთა ხსოვნის წინაშე”, _ თქვა ლანჩხუთის მერმა ალექსანდრე სარიშვილმა.
ოფიციალური ცერემონიალებისა და საფლავების ყვავილებით შემკობის მიღმა, თუ რამდენად საკმარისად ზრუნავს ადგილობრივი და ცენტრალური ხელისუფლება ომის ვეტერანებსა და დაღუპული გმირების ოჯახებზე, ამის შესახებ პარტია “ახალის” ჩოხატაურის ორგანიზაციის ლიდერი, ბაჩო ახალაძე გვესაუბრა:
“ოფიციალური ცერემონიები, გვირგვინები და საფლავებზე ყვავილების მიტანა პატივისცემის გამოხატულებაა, მაგრამ ვეტერანისა და დაღუპული გმირის ოჯახის მხარდაჭერა მხოლოდ სამახსოვრო თარიღებზე გამოჩენით არ უნდა შემოიფარგლებოდეს.
განსაკუთრებით გურიაში, სადაც არაერთი ვეტერანისა და გმირის ოჯახი დღესაც მძიმე სოციალურ-ეკონომიკური პირობების წინაშე დგას, სახელმწიფოსგან გაცილებით მეტი გვჭირდება, ვიდრე სიტყვები და ცერემონიები. ოჯახებს სჭირდებათ რეალური, ხელშესახები ფინანსური მხარდაჭერა, ღირსეული სოციალური დახმარება, ჯანმრთელობისა და მედიკამენტების ხარჯების დაფინანსება, საცხოვრებელი პირობების გაუმჯობესება, განათლებისა და დასაქმების შესაძლებლობები ოჯახის წევრებისთვის.
გმირის ოჯახს მხოლოდ მაშინ არ უნდა ვახსენდებოდეთ, როცა კამერებია ჩართული და გვირგვინია მისატანი. სახელმწიფოს პასუხისმგებლობა ყოველდღიურ ცხოვრებაში უნდა იგრძნობოდეს, იმ დროს, როცა ოჯახს კომუნალური გადასახადის, მკურნალობის, სწავლის ან ელემენტარული საარსებო ხარჯის დაფარვა უჭირს. ყვავილი საფლავზე პატივისცემაა, მაგრამ ცოცხალი ოჯახის ფინანსური და სოციალური მხარდაჭერა _ სახელმწიფოს ვალდებულება”, _ ამბობს ახალაძე.
ცნობისთვის: საქართველოში ვეტერანები სარგებლობენ სახელმწიფო სოციალური დახმარებებით, ყოველთვიური საკომპენსაციო თანხებით, ჯანმრთელობის დაზღვევის პაკეტებითა და სხვადასხვა შეღავათით. გარდა ამისა, ადგილობრივი მუნიციპალიტეტების დაფინანსებით, ვეტერანებსა და დაღუპულთა ოჯახებს სხვადასხვა მნიშვნელოვან თარიღთან (8 აგვისტო, 27 სექტემბერი, 9 მაისი) დაკავშირებით ერთჯერადი ფინანსური დახმარება ერიცხებათ.
სანამ რეგიონებში დაღუპულ მებრძოლებს იხსენებდნენ, თბილისში მორიგი მწვავე პოლიტიკური სკანდალი აგორდა. პრემიერ-მინისტრმა ირაკლი კობახიძემ მუხათგვერდის ძმათა სასაფლაოზე ჟურნალისტებს განუცხადა, რომ ომი 8 აგვისტოს რუსეთის ჯარის შემოყვანით დაიწყო, თუმცა მანამდე “სააკაშვილის რეჟიმმა ცხინვალი დაბომბა”:
“რუსეთ-საქართველოს ომი დაიწყო 8 აგვისტოს. 8 აგვისტოს შემოვიდა რუსეთის ჯარი, როდესაც შესაბამისი განცხადება გააკეთა რუსეთის მაშინდელმა პრეზიდენტმა. 7 აგვისტოს რაც მოხდა, ეს იყო ის, რომ სააკაშვილის რეჟიმმა დაბომბა ცხინვალი და მერე ხელი მოაწერა რეზოლუციას, სადაც მითითებულია, რომ ფართომასშტაბიანი საომარი მოქმედებების ფაზაში კონფლიქტი გადავიდა სწორედ ამ ფაქტის შემდეგ, როდესაც სააკაშვილის სისხლიანმა რეჟიმმა დაბომბა ცხინვალი”, _ განაცხადა ირაკლი კობახიძემ.
პრემიერ-მინისტრის ამ განცხადებას ოკუპირებული ცხინვალის ე.წ. საგარეო უწყება გამოეხმაურა. მათი მტკიცებით, საქართველოს პოლიტიკურმა ხელმძღვანელობამ, ირაკლი კობახიძის სახით, ოფიციალურად აღიარა მიხეილ სააკაშვილი სამხედრო აგრესიის დამნაშავედ, რის გამოც პასუხისმგებლობა მთლიანად საქართველოს სახელმწიფოს უნდა დაეკისროს:
“სააკაშვილს, როგორც სახელმწიფოს მეთაურს, ჰქონდა მანდატი, ემოქმედა საქართველოს სახელმწიფოს სახელით. ამიტომ, 2008 წლის აგვისტოს ომზე პასუხისმგებლობა უნდა დაეკისროს ქვეყანას, როგორც ამ პოლიტიკის სუბიექტს. მოვუწოდებთ ოფიციალურ თბილისს, თავი დაანებოს სხვა ქვეყნების საქმეებში ჩარევის მცდელობებს”, _ აღნიშნულია ოკუპირებული რეჟიმის განცხადებაში.
პრემიერ-მინისტრის რიტორიკას სოციალურ ქსელში მკაცრად უპასუხა საქართველოს მესამე პრეზიდენტმა მიხეილ სააკაშვილმა:
“ყოველი წლის 8 აგვისტოს (ეს რუსების თარიღია, ომი სინამდვილეში ბევრად ადრე დაიწყო) რუსეთზე საქართველოს გამხარებელ მოღალატეთა მახინჯი ბანდა გვიტარებს ღალატის და ერის და გმირების შეურაცხყოფის რიტუალს მუხათგვერდში. ყოველ ჯერზე, მათი იქ მისვლა და თავისი ბინძური ფეხებით გმირების საფლავის ატალახიანება გვახსენებს, რომ კიდევ ერთი წელი მოვითმინეთ მოღალატე ყაჩაღთა პარპაში. ეს ღალატი, ეს სირცხვილი, ეს რუსული ტალახი უნდა დავასრულოთ”.
პარალელურად, ფრაქცია “საქართველოსთვის” დეპუტატმა ვიკა ფილფანმა განაცხადა, რომ ირაკლი კობახიძის წინააღმდეგ გამოძიება უნდა დაიწყოს, რადგან მან ომის დაწყება ქართულ მხარეს დააბრალა, რაც ოკუპანტმა მხარემ საქართველოს წინააღმდეგ გამოიყენა:
“ეს არის ეროვნული ინტერესების დაზიანება. გამოძიება ირაკლი კობახიძის და ყველა იმ მაღალჩინოსნის მიმართ უნდა დაიწყოს, რომელიც საქართველოს ადანაშაულებს”, _ აღნიშნა ფილფანმა.
ამავდროულად, დეპუტატმა ყურადღება გაამახვილა “ნაციონალური მოძრაობის” ერთ-ერთი ლიდერის, გიორგი ბარამიძის სკანდალურ განცხადებაზეც, რომელმაც იაგო ხვიჩიასთან ინტერვიუში თქვა, რომ აფხაზეთის ომის დროს “ტყვეები არ გვყავდა, რადგან ჩვენებს ტყვეები არ აჰყავდათ _ ჩვენები ხვრეტდნენ”.
“მათ ბოდიში უნდა მოიხადონ, რადგან ცოტა ხანში ამას არც ბოდიში და არც ეს პოლიტიკური შურისძიების გამოძიებაც არ უშველის. ამ ყველაფრით საქართველოს სახელმწიფოს ინტერესები ზიანდება და საქართველოს ეროვნულ ინტერესებს როგორც ერთი, ასევე მეორე მხარე აზიანებს”, _ განაცხადა ვიკა ფილფანმა.
“ლელო _ ძლიერი საქართველოს” ერთ-ერთი ლიდერი, სალომე სამადაშვილი აგვისტოს ომთან დაკავშირებით “ქართული ოცნების” წარმომადგენლების განცხადებებს ეხმაურება და აღნიშნავს, რომ მმართველი გუნდის რიტორიკა ქვეყნის სახელმწიფო ინტერესებს აზიანებს:
“როდესაც კობახიძე, ივანიშვილი თუ სხვა ადანაშაულებენ 2008 წლის ხელისუფლებას ომის დაწყებაში და იმეორებს რუსულ ნარატივს, თითქოს რუსეთს “მშვიდობის იძულების ოპერაციის” ჩატარება მოუწია, ამით ლეგიტიმურობას უქმნიან მომავალში რუსეთის პრეტენზიას, რომ ჩვენი ოკუპირებული ტერიტორიების დამოუკიდებლობის აღიარება აუცილებელი ნაბიჯი იყო. ეს პირდაპირ დარტყმას აყენებს ჩვენი ქვეყნის სახელმწიფო ინტერესებს.
ფაქტობრივად, დღეს მხოლოდ ორი ხმა ისმის, რომელიც საქართველოს 2008 წლის ომში ადანაშაულებს _ ეს არის პუტინისა და ბიძინა ივანიშვილის ხმა”, _ ამბობს სამადაშვილი.
საქართველოს თავდაცვის სამინისტროს მონაცემებით, 2008 წლის რუსეთ-საქართველოს ომში, სულ, დაღუპულად 169 სამხედრო მიიჩნევა, აქედან ხუთი_ დღემდე უგზო-უკვლოდ დაკარგულად ითვლება. 2008 წელს, რუსული ინტერვენციის შედეგად, საქართველოს 228 მშვიდობიანი მოქალაქე და 14 პოლიციელი დაიღუპა, ხოლო 1 747 დაიჭრა. სახლები, იძულებით, თითქმის 150 000-მა ადამიანმა დატოვა, მათგან 30 000-მდე დღემდე დევნილობაში რჩება.
ავტორი
