ორი დღის წინ გერმანულმა გამოცემამ „Bild“ საინტერესო ინფორმაცია გაავრცელა. აღმოჩნდა რომ საქართველოს ეროვნული გუნდისა და გერმანული „ჰამბურგის“ მოთამაშე გიორგი ჩაკვეტაძე მიმდინარე სეზონის დასრულების შემდეგ ბელგიურ „გენტს“ დაუბრუნდება.
„მიუხედავად „პადერბორნთან“ გატანილი გოლისა (1:2), ჩაკვეტაძემ ბოლო 5 მატჩში მხოლოდ 52 წუთი ითამაშა. „გენტიდან“ იჯარით ზამთარში დამატებულმა ფეხბურთელმა თავდაპირველად კარგი ნიშნები აჩვენა, მაგრამ უკვე ნათელია, რომ „ჰამბურგი“ მასთან თანამშრომლობას არ გააგრძელებს“.
გიორგი ჩაკვეტაძემ მიმდინარე სეზონში „ჰამბურგის“ რიგებში 12 მატჩი ჩაატარა, 1 გოლი გაიტანა და ერთხელ საგოლე პასი მიითვალა. მას „გენტთან“ ხელშეკრულება 2023 წლის ზაფხულამდე აკავშირებს.
ხვიჩა კვარაცხელიას „ნაპოლიში“ შეიძლება ახალი მთავარი მწვრთნელი დახვდეს. ნეაპოლელები იტალიის საფეხბურთო ჩემპიონობის მოსაპოვებლად უკვე ვეღარ იბრძოლებენ და ლუჩანო სპალეტის პოზიციები გარკვეულწილად შესუსტდა.
გამოცემა „კორიერე დელო სპორტის“ მტკიცებით, კლუბის ხელმძღვანელობამ უკვე დაიწყო მისი მემკვიდრეების ძიება და დასახელდა ორი ვარიანტი – ვინჩენცო იტალიანო და რობერტო დე ძერბი.
იტალიანო „ფიორენტინას“ მწვრთნელია და კონტრაქტი 2023 წლამდე აქვს გაფორმებული, მაგრამ მასში ვადაზე ადრე გათავისუფლების პუნქტიც დევს. დე ძერბი დონეცკის „შახტარის“ თავკაცია, თუმცა „ნაპოლის“ წინადადება შესაძლოა მანაც მიიღოს. აღსანიშნავია, რომ ორივე სპეციალისტი შემტევი ფეხბურთის მიმდევარია და თუ ხვიჩა კვარაცხელიას ტრანსფერი ნაპოლიში ოფიციალურად დადასტურდება, წესით, არც იტალიანოსა და არც დე ძერბის სათამაშო სქემასთან მორგება არ უნდა გაუჭირდეს.
ესპანურმა გამოცემამ „Mediatirmpo” გიორგი მამარდაშვილს ახალი წერილი მიუძღვნა.
„როცა „ვალენსიამ“ გიორგი მამარდაშვილი გადაიბირა, მეორე გუნდის მეკარედ მიიჩნევდნენ, თუმცა აღმოჩნდა, რომ შეიძინეს ფეხბურთელი, რომელიც ძირითადი კიპერი გახდა. მამარდაშვილს დასაწყისში ბედმა გაუღიმა – გუნდის ორი მეკარე ტრავმირებული იყო. თუმცა, მთავარია ისაა, რომ მთავარ მწვრთნელ ბორდალასზე კარგი შთაბეჭდილება მოახდინა და მანაც „ხეტაფესთან“ ქართელი სასტარტოში უყოყმანოდ დააყენა. პირველივე მატჩში, ახალბედა მეკარე მშვენიერი იყო, 4 კარგი სეივი ჰქონდა და ტურის კიპერადაც დასახელდა.
სილესენი მომჯობინდა, თუმცა მაინც მამარდაშვილი თამაშობდა. მალევე, 20 წლის გიორგის სანაკრებო დებიუტი (ბულგარეთის წინააღმდეგ 1:4) შედგა…
მეორე შანსი იანვარში, ისევ ნიდერლანდელი მეკარის ტრავმის გამო გაჩნდა, თუმცა „ღამურების“ თავკაცი ხაუმე დომენეკს დაეყრდნო. „მამარდა“ მაინც დაბრუნდა, კონკურენტს აჯობა და თასის ფინალში გასვლაში დიდი როლი შეასრულა – ბილბაოს „ატლეტიკთან“ მშვენიერი იყო.
ქართველმა მეკარემ გულშემატკივრებისა და „ვალენსიას“ ლეგენდა სანტიაგო კანისარესის სიმპათიები მოიპოვა. მამარდაშვილს, რომელიც მხოლოდ 21 წლისაა, ბორდალასიც მხარს უჭერს და მომავალში უდავოდ დიდი მეკარე უნდა გახდეს“.
გამოცემა „WhoScored.com“-ის მიხედვით, ევროპის „TOP 5“ ლიგებში გიორგი მამარდაშვილი საუკეთესო ახალგაზრდა მეკარეა. 21 წლის ლეგიონერმა ესპანეთის „ლა ლიგაში“ 15 მატჩში დაიცვა „ვალენსიას“ კარი, მან თითქმის ნახევარში (7) გოლი არ გაუშვა (სულ 16 გოლი). ცნობილი ანალიტიკური საიტის შეფასებებით მამარდაშვილის საშუალო შეფასება 6.66-ია.
ეს შეფასება საუკეთესოა ახალგაზრდა მეკარეთა შორის, რომელთაც, სულ მცირე, 10 მატჩი გამართეს ამ სეზონში. თუ ყველა ფეხბურთელს ავიღებთ, გიორგი მეოთხეა, თუმცა ლუკა ჯემელომ („ტორინო“) 1 თამაში (7.71), დიანტ რამაიმ („აინტრახტი“) – 1 თამაში (7.11) და ხულიენ აგირეზაბალამ („ბილბაო“) – 4 თამაში (6.81) ძალიან ცოტა ითამაშეს. გიორგი უსწრებს მე-2 ადგილზე მყოფ თურქ დოგან ალემდარს, რომელიც „რენის“ ღირსებას იცავს (11 თამაში – 6.53) და მესამეზე მყოფ ინგლისელ ეტიენ გრინს („სენტ ეტიენი“) – 15 თამაში, 6.41.
გუშინ უკრაინის საკალათბურთო ნაკრების ყოფილმა წევრმა პეტრო პოდტიკანმა ისაუბრა იმაზე, თუ როგორ მოახერხა ომით განადგურებული მარიუპოლიდან თავის დაღწევა.
„ცოცხალი ვარ, მაგრამ ცოტათი დაშავებული. ახლა კი მჯერა სასწაულების. მეზობელი დიმა დამეხმარა, რომელსაც სულ ორი დღე იყო, რაც ვიცნობდი. მეორე მეზობელიც მოვიდა და მითხრა, სად შემეძლო მკურნალობა. სამი საავადმყოფო გავიარე და ყველაფერი დანგრეული იყო… 16 ნაკერი გამჭირდა და ღამე სადარბაზოში, ინვალიდის ეტლში გავატარე. საოცრებაა, რომ სისხლისგან არ დავიცალე.
სამი კვირა ვიწექი სარდაფში, ბინა დაინგრა, იქ ტემპერატურა კი ნულს ქვემოთ იყო. მე არ მინდოდა წასვლა, რადგან ჩემი და და დედა იქ დარჩნენ, მაგრამ როცა მთელი საკვები, წამალი და წყალი ამოიწურა, იძულებული გავხდი, იქაურობა დამეტოვებინა“, – განაცხადა პეტრო პოდტიკანმა.
ავტორი
