ქიბარ ხალვაში, რომელსაც უზენაესმა სასამართლომ რუსთავი 2-ის წილის 60% მიაკუთვნა აცხადებს, რომ სამაუწყებლო კომპანიაში უახლოეს მომავალში შევა, თუმცა ეს არ მოხდება ძალდატანებით. სამომავლო გეგმებზე ხალვაშმა ტელეკომპანია იმედის ეთერში ისაუბრა. მისი თქმით, რუსთავი 2 არ იქნება პარტიული ტელევიზია, ის იქნება კრიტიკული და მთელი საქართველოს ტელევიზია.
„რუსთავი2-ში ალბათ უახლოეს მომავალში შევალთ, ეს არ შეიძლება გაგრძელდეს წლობით, მაგრამ ეს არ იქნება რაღაც ძალდატანებით დღეს და ხვალ. ის შეიცვლება, რომ ეს არ იქნება ერთი პარტიის ტელევიზია, არამედ იქნება მთელი საქართველოს ტელევიზია და იქნება კრიტიკული, არ იქნება პარტიული,“-განაცხადა ქიბარ ხალვაშმა.
ხალვაში რუსთავი 2-ის გენერალური დირექტორის განცხადებასაც გამოეხმაურა და განაცხადა, რომ ადამიანები რომლებიც ამბობენ, რომ არ დათმობენ რუსთავი 2-ს და დგანან ბარიკადებზე, ისინი არა თავისუფალ სიტყვას, არამედ მიხეილ სააკაშვილის ინტერესებს იცავენ.
„ძალის გამოყენება ამ შემთხვევაში, ის უპირისპირდება სახელმწიფოს და არა მე, ძალის გამოყენება ფიქრობს, რომ სახელმწიფოს ძალით დაუპირისპირდება. ეგეთი რამე საქართველოში პრაქტიკაში არ არსებობს. არ ვიცი ეს ხელისუფლება მოახერხებს თუ არა. ჩვენ თვითონ ჩვენს თავზე გვაქვს განცდილი უკანონობა, დაგვიწვეს, წაგვართვეს, ხალხი უმუშევარი დატოვეს და შემდეგ აღსრულების ფურცლის გარეშე შემოვიდნენ და ქონება გაზიდეს და ვერაფერი ვერ გავაკეთეთ, იმიტომ, რომ სახელმწიფო იყო უკანონო. ეს ყველაფერი ჩვენს წინააღმდეგ არის ინსპირირებული სააკაშვილის მიერ და ის ხალხი ბარიკადებზე, მხოლოდ სააკაშვილის ინტერესების დასაცავად დგას,“-აცხადებს ხალვაში.
ქიბარ ხალვაშმა ტელეკომპანია იმედს კიდევ ერთხელ დაუდასტურა, რომ თუკი რუსთავი 2 წამგებიანი ბიზნესი იქნება, ის ტელეკომპანიას გაყიდის.
„მე არ მითქვამს რომ მაგას ვიყიდი მეთქი, მე არ ვაპირებ უახლოეს მომავალში და ვთქვი, რომ მე ვერ შეგპირდებით, რომ მთელი ცხოვრება რუსთავი 2-ის მფლობელი ვიქნები მეთქი, იმიტომ, რომ ჯერ უნდა შევაფასო, თუ ბიზნესი მომგებიანია, წარმატებული იქნება იქნება, თუ არა და უკეთესი ადამიანი ვინც უკეთესად გააკეთებს იმას მივყიდი და იქნება ეს ჩვეულებრივი კომერციაა.
“ვისაც უნდა წასვლა ყველა წავა, ვისაც დარჩენა დარჩება. კომერცია არის საწინდარი წარმატების თუ გვინდა რომ ვიყოთ წარმატებული და კომერციულად გამართული ორგანიზაცია, არხს უნდა ჰქოდეს პირველ რიგში რეიტინგი, რეიტინგს სჭირდება პროფესიონალი ადამიანები. ეს გუნდი პროფესიონალია რა თქმა უნდა,“-განაცხადა ხალვაშმა.
ქიბარ ხალვაშს საკუთარი გეგმების შესახებ ჯერაც არ უსაუბრია თავად რუსთავი2-ის ჟურნალისტებთან. ხალვაშისთვის კითხვების დასმას კურიერი ამ დრომდე უშედეგოდ ცდილობს.
rustavi2.com
