18 სექტემბერს, ოზურგეთში, პირველ საჯარო სკოლაში, ღია სივრცეში უმნიშვნელოვანესი შეხვედრა გაიმართა.
ოზურგეთელ პედაგოგებს ეწვია გაეროს ბავშვთა ფონდის წარმომადგენელი საქართველოში და საქართველოს ჯანდაცვის ცნობილი ექსპერტების ახალი ჯგუფი.
გაეროს ბავშვთა ფონდის და საქართველოს მთავრობის ერთობლივი კამპანიის ფარგლებში, პედაგოგები ჩაერთვნენ კოვიდ 19-ის საწინააღმდეგო ვაქცინაციის პროგრამაში.
სესიის მსვლელობისას ცნობილმა მედიკოსებმა ისაუბრეს კოვიდ 19-ის საწინააღმდეგო ვაქცინაციის სარგებლობისა და მნიშვნელობის შესახებ.
სესიაზე, სადაც ოზურგეთის მუნიციპალიტეტის სოფლების სკოლების პედაგოგები იყვნენ წარმოდგენილი, სიტყვით წარდგა იუნისეფის წარმომადგენელი ემი ქლენსი. მან ხაზი გაუსვა, თუ რაოდენ მნიშვნელოვანია სკოლების უსაფრთხოდ გახსნა, რისთვისაც პედაგოგთა ვაქცინაცია აუცილებელია.
_ გაეროს ბავშვთა ფონდისთვის მნიშვნელოვანია მასწავლებელთა ვაქცინაცია სკოლების უსაფრთხო გახსნისთვის. ეს მნიშვნელოვანია, რათა ბავშვები დაუბრუნდნენ საკლასო ოთახებს. ამიტომ დღეს ჩვენ აქ ვიმყოფებით დაავადებათა ეროვნული ცენტრის წარმომადგენლებთან ერთად, რათა ხელი შევუწყოთ, დავეხმაროთ პედაგოგებს. გავმართოთ მათთვის საინფორმაციო სესია, რომელიც დაეხმარება მასწავლებლებს, აიცრან… მე საგანგებო მადლობას ვუხდი ქართველ ექიმებს, რომლებიც გადატვირთულ რეჟიმში ახერხებენ, თუნდაც აქ იყვნენ დღეს და ყველა პედაგოგს გასცენ დასმულ კითხვებზე პასუხი, _ განაცხადა ემი ქლენსმა.
ოზურგეთის რესურსცენტრის ხელმძღვანელმა ლელა იმედაშვილმა მოიშველია მნიშვნელოვანი სტატისტიკა, რომ ოზურგეთელი 1438 მასწავლებლიდან უკვე აცრილია 1140.
_ ეს არის ძალიან საამაყო მოვლენა. კიდევ ერთხელ მადლობას ვუხდი მათ და ჩვენ აქტიურად მოვემზადებით, ოთხ ოქტომბერს კონტაქტური სწავლისთვის! თუმცა, მარტო მასწავლებლები ვერ შექმნიან ამ მხრივ სრულფასოვან გარემოს და აუცილებელია მშობელთა ჩართულობა. ვიმედოვნებ, ამ მხრივაც ვიქნებით მოწინავენი, _ თქვა მან.
ალერგიის და იმუნოლოგიის ცენტრი გენერალური დირექტორი, მედიცინის დოქტორი მაია გოთუა, მედიცინის დოქტორი, პროფესორი მამუკა ბოკუჩავა, კლინიკა რეიმანის კლინიკური სერვისების დირექტორი, მედიცინის დოქტორი ნინო კიკნაძე, ბოხუას სახელობის კარდიოვასკულური ცენტრის და „ნიუს ჰოსპიტალის“ ანესთეზიის დეპარტამენტის ხელმძღვანელი, მედიცინის დოქტორი ლევან ვაშაკიძე თანმიმდევრულად და დაკონკრეტებით ესაუბრნენ მასწავლებლებს მათთვის საინტერესო ყველა საკითხზე. ისაუბრეს საქართველოში კოვიდ 19-თან დაკავშირებულ იმუნიზაციის ტენდენციებსა და მიმდინარე ეპიდემიოლოგიურ ვითარებაზე.
_ პედაგოგები, ექიმების შემდეგ არიან მაგალითის მიმცემი, რომ სასწავლო პროცესი უხიფათოდ წარიმართოს. მასწავლებლები არიან რეგიონში განათლების შემომტანი და უპასუხო კითხვა მათთვის არ უნდა დარჩეს. ადამიანი არა მარტო მაგალითის მიმცემი, არამედ სიმშვიდის მომტანი და ჯანმრთელობის გარანტი უნდა იყოს. ის ინფექციები, რომლებიც იყო ადრე ზიანის მომტანი, ახლა უკუგდებულია. თუმცა, გაჩნდა ახალი. გურიის რეგიონში ახლა დიდია პრობლემა, ისევე როგორც სხვა რეგიონებში. მაღალია ეპიდმაჩვენებელი. ასევე დიდია ლეტალობა. ჩვენ მოვედით იმიტომ, რომ გადმოგცეთ ინფორმაცია. მოგეხსენებათ, ინფორმაცია და ცოდნა არის ბრძოლის იარაღი. ჩვენი აქ მოსვლაც ცოდნის მოტანას გულისხმობს, რაც არსებობს თანამედროვე მედიცინაში. უნდა დავეხმაროთ მოსახლეობას. უნდა მოვიგოთ დრო, რომელიც არ გვიცდის და ამ შემთხვევაში, არჩევანი აცრის სასარგებლოდ უნდა გაკეთდეს, _ განაცხადა მედიცინის დოქტორმა მაია გოთუამ.
გურიაში სახელმწიფო რწმუნებულის მოადგილემ, ქეთი მოისწრაფეშვილმა მოკლედ მომოიხილა ადგილზე არსებული ვითარება და თქვა, რომ ოზურგეთში 1428 მასწავლებლიდან უკვე 1140 აცრილია. ასევე, ვაქცინირებულია თავად და როგორც კი ბავშვთა ასაკობრივი ჯგუფების მიხედვით ვაქცინაცია დაიწყება, ის მზად არის, თავისი 7 წლის ტყუპს აცრა პირველმა ჩაუტაროს.
_ ჩვენ ოზურგეთში ვაქცინაციის სამი ცენტრი გვაქვს: კლინიკა „მედალფაში“, გრიბოედოვის ქუჩაზე და შეკვეთილში. უკვე გვყავს მობილური ჯგუფები სოფლებში. დავდივართ და ვცდილობთ, თოთოეულ სოფელში მეტი ადამიანი აიცრას, რათა ადრე დავუბრუნდეთ ნორმალურ ცხოვრებას, _ თქვა მოისწრაფიშვილმა.
სესიაზე მედიკოსებმა დეტალურად ისაუბრეს კოვიდი 19-ის შესახებ. რომ შეიძლება აცრა ჩატარებული ჰქონდეს ადამიანს და გადატანილიც ჰქონდეს დაავადება, თუმცა მაინც დაემართოს. როგორც მათ აღნიშნეს, მსოფლიოში წარმოშობილია ახალი, საშიში შტამები.
_ როგორც ომის დროს, ახლაც ჩვენ შეზღუდული ვართ დროში. ამიტომ ეს დრო არ ითმენს. ლეტალობა არის მაღალი. ქვეყანა რომ ავაშენოთ, ჩვენ უნდა ვიყოთ ჯანმრთელი. საერთაშორისო მტკიცებულებებით, 500 აცრილი ადამიანი ერთ გადარჩენილ სიცოცხლეს ნიშნავს. არ გეგონოთ, რომ ეს ცოტაა. განათლება არის ის, რის იმედადაც ქვეყანა უნდა გვექნეს? რატომ უნდა ავიცრათ? _ იმიტომ, რომ გადავარჩინოთ ერთმანეთი! 21-ე საუკუნეში ვართ, ანუ ინფორმაციის ზღვაში ვიმყოფებით. განათლების მეშვეობით შევძლებთ, ვიცოდეთ, რომელია სწორი ინფორმაცია და რომელი არა. ორი წლის წინ არ ვიცოდით რა იყო კოვიდი. დღეს უკვე გვაქვს ვაქცინა. მედიცინა დღეს სხვა ტემპით ვითარდება. როცა ისმის ასეთი კითხვა, რომ გავიკეთო დღეს, რა მოხდება ხუთი წლის შემდეგ? გეტყვით, რომ დღეს გაკეთებული ვაქცინა, დღეს გვიცავს. ხუთი წლის შემდეგ კი მედიცინა სულ სხვა დონეზე იქნება, ისე სწრაფად ვითარდება! _ თქვა თავის გამოსვლაში მედიცინის დოქტორმა ნინო კიკნაძემ.
ემოციური იყო რეანიმატოლოგის, მედიცინის დოქტორის ლევან ვაშაკიძის გამოსვლა. მან ისაუბრა რატომ არის აუცილებელი აცრა.
_ ჩემი დაკავებული მდგომარეობიდან გამომდინარე, მე მიხდება ავადმყოფის ბოლო გასაჭირში ყურება. უნდა ავიცრათ იმიტომ, რომ მე არ მინდა ადამიანი, რომელიც ჩემთან მოხვდება, ხელში ჩამაკვდეს, რადგან არც მე და არც მას ბრძოლის საშუალება არ გვაქვს! ჩვენს შვილებს, უნდა ექნეთ ისეთივე ლაღი ბავშვობა, როგორიც ჩვენ გვქონდა! მათ დღეს მოპარული ბავშვობა აქვთ. ამიტომ უნდა ავიცრათ. ჩვენი აცრა იქნება დახმარება, წვლილი იმ ექიმი გოგო-ბიჭების დასახმარებლად, რომლებიც სასწაულად შრომობენ, რომ გადაარჩინონ ადამიანები! დაინფიცირებულთა ტევა არ არის! დრო არ რის საიმისო, როგორც საჭიროა, ისე მოემსახურონ! ფაქტია, ვაქცინა გვიცავს და სანამ მედიკამენტი გაჩნდება, აცრა არის პირველი დამცავი საშუალება! ხაზს ვუსვამ -ჰოსპიტალური სექტორის ასე გადატვირთვა ნიშნავს იმას, რომ ყველაფერი ამოწურვადია! ამიტომ უნდა გავიკეთოთ ვაქცინა! ხომ გვიკვირდა, რა სჭირდა იტალიას, გერმანიას… ახლა ჩვენთან არის ასეთი მდგომარეობა! მარტო აგვისტოში იმდენი ადამიანი დაგვეღუპა კოვიდით, რამდენიც აგვისტოს ომში არ დაღუპულა! _ თქვა ლევან ვაშაკიძემ.
ვაქცინაციის თემაზე კითხვები დასვეს პედაგოგებმა. კონკრეტულად კი ეს იყო კითხვები _ შეიძლება თუ არა ონკოლოგიური ავადმყოფების, ასევე ფარისებრი ჯირკვლის პათოლოგიების, დიაბეტის და სხვა დაავადების მქონეთა აცრა. მათ პროფესორებმა სრული პასუხი გასცეს. ასევე, მიმართეს თხოვნითაც, თუ ვინმეს არ სურდა ღია სივრცეში დაესვა კითხვა, მათთვის კონფიდენციალურად მიემართათ!
სესიის დასრულების შემდეგ, ჯანდაცვის ექსპერტებმა მასწავლებლებს შესთავაზეს ვაქცინაცია, რაც უმეტესობამ ჩაიტარა.
სინოფარმით პირველები აიცრნენ ოზურგეთის მუნიციპალიტეტის სოფელ ჭანიეთის მასწავლებელი ირმა წიტაიშვილი, ნატანების საჯარო სკოლის მასწავლებელი მარინა ზოიძე.
საინფორმაციო შეხვედრაზე, რამაც ორ საათზე მეტხანს გასტანა, გაჟღერდა ძალიან საინტერესო საკითხები კოვიდ 19-ს საწინააღმდეგო ვაქცინაციის, ასევე, ამ მოვლენასთან დაკავშირებული ვითარების შესახებ, რითაც პედაგოგები ძალიან კმაყოფილი დარჩნენ.
[sexy_author_bio]
