“გურია ნიუსს” კოვიდინფიცირებული პაციენტები უკავშირდებიან და ეუბნებიან, რომ ინფიცირების დადასტურებიდან ერთ კვირაზე მეტი გავიდა და ექიმი არ დაკავშირებიათ.
“დაახლოებით, 27 იანვარს დაგვიდასტურდა კორონავირუსი. სახლში ორნი ვართ. მაშინვე დავრეკე 112-ში, რომ აღრიცხვაზე ავეყვანეთ. თუმცა, 112-თან დაკავშირება ძალიან რთული აღმოჩნდა. რამდენიმესაათიანი ლოდინის და ოპერატორის მიერ მოთმინებისთვის უამრავჯერ მადლობის გადახდის შემდეგ, როგორც იქნა, მოვხვდი დანიშნულების ადგილას. ვუთხარი, რომ დაგვიდასტურდა კორონავირუსი. როგორც მითხრეს, ჩაინიშნეს მონაცემები და დაგვიკავშირდებოდნენ ონლაინკლინიკიდან.
ასევე, შევავსე ონლაინკლინიკის აპლიკაციის ფორმაც, მაგრამ არავინ დაგვკავშირებია. კარგი, ჩვენ, ღმერთმა გადმოგვხედა და არ ვართ მძიმე პაციენტები. რამდენიმედღიანი ცხელებითა და სურდო-ხველებით შემოიფარგლა ჩვენი ავადმყოფობა (ნუ, ჯერჯერობით, ასეა), მაგრამ რა ქნან იმ პაციენტებმა, რომლებსაც აუცილებლად სჭირდებათ ექიმის დახმარება. თუნდაც ჩვენ, ან გამოკვლევები არ არის საჭირო, ან ე. წ. სატურაციის დათვლა. არ ვიცი, რა ვთქვა. სისტემა ასე უპატრონოდ როგორაა”, _ ამბობს “გურია ნიუსთან” საუბრისას ბ. მ.
კიდევ ერთი ვირუსდადასტურებული, რომელიც “გურია ნიუსს” დაუკავშირდა, ლანჩხუთიდანაა:
“როდესაც 112-ში დავრეკე, მითხრეს, რომ მიმემართა 1522-სთვის. ჯერ ისედაც 3 დღე ვიყავით სიმპტომებით. 2 დღე დაგვჭირდა ონლაინკლინიკასთან დასაკავშირებლად. ვინაიდან საკუთარი ავტომანქანა არ გვყავს, ტესტის გასაკეთებლადაც ვერ მივდიოდით. 1522-ზე გვითხრეს, რომ მოვიდოდნენ და გადაგვიყვანდნენ გასატესტად. 2 დღე ველოდეთ. მდგომარეობა, ვატყობდით, რომ მძიმდებოდა. ხანდაზმული გვყავს სახლში, უჰაერობა დაეწყო. გამოვიძახეთ სასწრაფო დახმარების ბრიგადა, მაგრამ სულ ტყუილად _ უნდა დაგიდასტურდეთ, ჩვენ უფლება არ გვაქვს გაგსინჯოთო, გვითხრეს. მერე თვით მედიცინის მუშაკებმა გვირჩიეს, “მარშრუტკით” მივსულიყავით ტესტის ჩასატარებელ უბნამდე.
ბოლოს, ლანჩხუთის ჯანდაცვის ცენტრში დავრეკეთ და ქალბატონი ნატო მენაღარიშვილის დახმარებით, შევძელით კლინიკამდე მისვლა, დაგვიკავშირდა ექიმიც, მაგრამ უკვე იზოლაციის ვადა გასული გვაქვს”, _ გვეუბნება ლანჩხუთში მცხოვრები ქალბატონი.
რამდენიმე დღის წინ, განცხადება გაავრცელა შსს-ს საზოგადოებრივი უსაფრთხოების მართვის ცენტრმა 112-მა.
როგორც განცხადებაშია აღნიშნული, კოვიდის შემთხვევების მატებასთან ერთად, მათთან მიმართვიანობა გაზრდილია, თუმცა 24 საათის განმავლობაში, 35%-მდე არამიზნობრივი და საინფორმაციო ტიპის ზარი ფიქსირდება, რაც აფერხებს მუშაობის პროცესს.
“გთხოვთ, გამოიჩინეთ მაღალი მოქალაქეობრივი პასუხისმგებლობა და არამიზნობრივად არ დარეკოთ 112-ზე.
გადაუდებელი შემთხვევისას, შეუფერხებლად დაკავშირებისთვის 112 დაიყო სამ არხად:
112 _ სასწრაფო სამედიცინო გადაუდებელი დახმარება;
112 1 _ პოლიცია და სახანძრო სამაშველო სამსახური;
112-2 _ Covid -19.
Covid-19-ის ვირუსის ლაბორატორიულად დადასტურების შემთხვევაში, მოქალაქეს შეუძლია დარეკოს 112-2-ზე ან დარეგისტრირდეს პორტალზე: er.moh.gov.ge.
112-ის მიერ, Covid-19 დადასტურებული შემთხვევები შემდგომი მონიტორინგისთვის გადაეცემა ოჯახის ექიმებს.
თუ 48 საათის განმავლობაში არ დაგიკავშირდათ ოჯახის ექიმი, შეგიძლიათ, დარეკოთ ცენტრალური ონლაინ კლინიკის ცხელ ხაზზე _ 1522, ხოლო კერძო დაზღვევის შემთხვევაში, თქვენი სადაზღვევო კომპანიის ცხელ ხაზზე”, _ ნათქვამია განცხადებაში.
როგორც ჩვენი რესპონდენტი ამბობს, ყველა მითითებული საფეხური გაიარა, თუმცა, უშედეგოდ, მას არავინ დაკავშირებია:
“დადასტურებიდან მე-12 დღეა. მივიკითხ-მოვიკითხე და მითხრეს, რომ იზოლაციის ვადა 8-9 დღეა. რადგან ინფიცირების თარიღი ჩემ გარდა არავის ჩაუნიშნავს, იზოლაციიდან გასვლის გადაწყვეტილებაც მე მივიღე და დავბრუნდი სამსახურში”, _ გვითხრა რესპონდენტმა.
მისი თქმით, არც ხელმეორედ გატესტილა და არც რაიმე გამოკვლევა ჩაუტარებია.
კითხვაზე _ რატომ ვერ ხერხდება ონლაინ კლინიკის ექიმის პაციენტთან დაკავშირება, ამომწურავი პასუხი მაინც ვერ მივიღეთ. ამბობენ იმას, რაც უკვე ვიცით და ჩვენმა რესპონდენტებმა გაიარეს.
ოზურგეთის კლინიკა “მედალფაში” “გურია ნიუსს” განუმარტეს, რომ პირველი სატელეფონო ზარი, ვისაც დაუდასტურდება კორონავირუსი, უნდა განახორციელოს112-ში ან დარეგისტრირდეს სპეციალურ საიტზე, რომელიც უკვე გაიხსნა. 112-თან დარეკვის შემდეგ ხდება კოვიდ-პაციენტის მონაცემების შეყვანა სპეციალური პროგრამაში და აწვდის ინფორმაციას ოჯახის ექიმი. ამის შემდეგ უკავშირდება პაციენტებს.
კლინიკაში ამბობენ, რომ გურიის რეგიონში ბოლო დროს ზარების რაოდენობა გაიზარდა. მაგალითად, ოზურგეთში დღეში, დაახლოებით, 300 ზარი შედის.
