ოზურგეთის დემოკრატიული ჩართულობის ცენტრში „საქართველოს დემოკრატიული განვითარების კავშირის“, ლანჩხუთის ახალგაზრდული მოძრაობის და გურიის მედიატორთა ასოციაციის წარმომადგენელმა დამსწრე სტუმრებს კვლევის შედეგები გააცნეს.
კვლევის დროს გამოიკითხა 240 ადამიანი, რომლებიც დაზარალდნენ გურიაში 8 სექტემბერს მომხდარი სტიქიის დროს.
„სამოქალაქო სექტორის წარმომადგენლებმა მოვახერხეთ და მცირე კვლევა ჩავატარეთ ოზურგეთის და ლანჩხუთის იმ სოფლებში, სადაც 8 სექტემბერს წყალდიდობამ და მეწყერმა დააზარალა ადამიანები. სამწუხაროდ, სტიქიას სამი ადამიანი ემსხვერპლა. რა რეალობის წინაშე ვართ დღეს? _ ზუსტად ამ კუთხით დავინტერესდით და ეს ანგარიში გვაძლევს იმ რეალობის დანახვის შესაძლებლობას, რაც ხდება სტიქიის შემდეგ. 240 ადამიანი გამოიკითხა პროექტის ფარგლებში“, _ თქვა შეხვედრის დასაწყისში „საქართველოს დემოკრატიული განვითარების კავშირის“ აღმასრულებელმა დირექტორმა ლევან ხინთიბიძემ.
ლანჩხუთის ახალგაზრდული მოძრაობის დამფუძნებელმა ქეთი წილოსანმა შეხვედრაზე აღნიშნა, რომ ის მძიმე დღეები კიდევ ერთხელ მიგვანიშნებს ადამიანებს, რომ ბუნებას და გარემოს სჭირდება მოფრთხილება:
„ძალიან მძიმე ვითარება დაგხვდა იმ ადგილებში, სადაც სტიქია მძვინვარებდა. ძალიან ძნელია დაივიწყო იმ ადამიანების სახეები, რომლებიც სტიქიის ზონაში ცხოვრობენ. სტიქიის შემდეგ გასახლებაში არის 350 ოჯახი ლანჩხუთში, ოზურგეთში კი _ 306.
ლანჩხუთის ახალგაზრდული მოძრაობის წარმომადგენელმა ანანო მოქიამ ვრცლად ისაუბრა გამოკითხვის შედეგებზე.
„მინდა, რამდენიმე კომენტარი გაგაცნოთ, რომელიც ჩვენ მიერ გამოკითხული რესპონდენტებიდან ჩავიწერეთ.
ჯუმათსა და სილაურში დაზარალებული ოჯახებიდან უმეტესობა ითხოვს შესაღობ მასალას, ნაკვეთებთან (საყანე) ფართობებთან მისასვლელ გზას, ბუნებრივი აირის მილების შეკეთებას, სასმელი წყლის მიწოდებას.
ლანჩხუთში (სუფსის თემი) დაზარალებულთა 90%-ს დაეტბორა საცხოვრებელი სახლის პირველი სართული და ნათესები (ბოსტანი).
დაიტბორა საუბნო გზები და საუბნო ხიდები მამათის, კოკათისა და ჩოჩხათის თემში. 300-ზე მეტი ოჯახი ექვემდებარება გასახლებას, დაზარალებულთა უმრავლესობას დაუზიანდა მოსავალი (ციტრუსის და თხილის ბაღები).
აუცილებელია, შეიქმნას სტიქიური მოვლენების შედეგების შემსწავლელი და შეფასების კომისია, რომელიც უზრუნველყოფს დაზარალებული ოჯახებისთვის დახმარების განსაზღვრას”, _ თქვა ანანო მოქიამ.
კითხვაზე _ რომელმა სტიქიურმა მოვლენამ მოგაყენათ ზიანი 8 სექტემბერს? ლანჩხუთში გამოკითხულთა 52%-მა უპასუხა, რომ მეწყერმა და 48% _ კი წყალდიდობამ. ოზურგეთში გამოკითხულიდან 100% კი ამბობს, რომ მეწყერმა. გამოკითხული არის 240 ადამიანი. გამოკითხვიდან ჩანს, რომ ადამიანები ითხოვენ შიდა საუბნო ხიდების და მილხიდების, შიდა საუბნო გზების, სანიაღვრე არხების მოწესრიგებას; ასევე, წყლის სისტემის მოგვარებას.
„გურიის მედიატორთა ასოციაციის“ თავმჯდომარემ, მაკა ჩხარტიშვილმა აღნიშნა, რომ გარდა იმ პრობლემებისა, რაც დასახელდა პრიორიტეტებად (გზა, სანიაღვრე არხები, ხიდები) მოსახლეობას აქვს ინდივიდუალური პრობლემებიც, დაზიანებულია ღობეები, საკარმიდამო ფართობები, საყანე ფართობებთან მისასვლელი გზები, ტრანსპორტი ვეღარ გადაადგილდება,
გართულებულია სამსახურამდე მისვლა და ზოგადად, ქალაქში არსებული სერვისებით სარგებლობა.
დარბაზში ასევე ითქვა, რომ მანდარინის და თხილის ბაღები განადგურებულია. შეხვედრაზე ისიც აღინიშნა, რომ ციტრუსის მოსავალი სადაც გადარჩა ახლა უგზოობის გამო ვერ გაქვთ სოფლებიდან და აქედან გამომდინარე ვერ ახერხებენ მის რეალიზაციას.
სოფელ ჯუმათში მცხოვრების ია ჩხარტიშვილის თქმით, სტიქიის შემდეგ სოფლის რამდენი უბანში აღარ არის გზა და აქედან გამომდინარე ბავშვებს სკოლში სიარული გაურთულდათ.
„პირადად ჩემს ოჯახსაც შეეხო 8 სექტემბრის სტიქია, მაგრამ ახლა ამ შეხვედრაზე მინდა ჩემი სოფლის შესახებ ვისაუბრო. აღარ ვიცი, ზუსტად რამდენ პრობლემაზე ვისაუბრო. სოფელ ჯუმათიდან ახალგაზრდები მიდიან და ახლა კიდევ ისეთი მდგომარეობა არის, ვინც იყვნენ დარჩენილი, ისინიც წავლენ.
აუცილებლად მოსაგვარებელია გზის საკითხი ჯუმათის უბნებში. იმედია, დროულად მოგვხედავენ და დაგვეხმარებიან“, _ თქვა ია ჩხარტიშვილმა.
სოფელ ჩოჩხათში მცხოვრებმა ირაკლი მარშანიშვილმა შეხვედრის დროს აღნიშნა, რომ ლანჩხუთის იმ სოფლებში, სადაც წყალდიდობა იყო,, ღელესთან და პატარა მდინარეებთან გასაკეთებელია ჯებირები.
„მთავარი არის, რომ აღწერა დროულად მოხდეს. ჩვენ, მოსახლეობა, მზად ვართ, დავეხმაროთ აღწერის დროს ხელისუფლებას. ჩვენი ძალით გავაკეთოთ ეს აღწერა და შედეგები წარვადგინოთ ლანჩხუთის მუნიციპალიტეტის საკრებულოს სხდომაზე“, _ თქვა ირაკლი მარშანიშვილმა.
შეხვედრაზე დამსწრე საზოგადოებისგან, ასევე, აღინიშნა, რომ სტიქიის დღეებში ადგილობრივი ხელისუფლების წარმომადგენლები მათ გვერდით იყვნენ.
შეხვედრას ესწრებოდა საქართველოს პრეზიდენტის მრჩეველი იაგო წიკლაური.
მთავრობის სხდომაზე საქართველოს პრემიერ-მინისტრმა, ირაკლი ღარიბაშვილმა თქვა, რომ ყველა მოქალაქეს, ვისი სახლიც დაინგრა, ან ვისი სახლიც გამოუსადეგარი გახდება, ყველა ამ ოჯახის განსახლება მოხდება და მიეცემათ ახალი სახლი.
ასევე, ცნობილი გახდა, რომ საქართველოს მთავრობა გურიაში მომხდარი სტიქიური მოვლენების გამო დაზარალებულების დასახმარებლად 15 მილიონ ლარს გამოყოფს.
პ.ს. გურია ნიუსი აღნიშნულ საკითხთან დაკავშირებით ადგილობრივი ხელისუფლების კომენტარებს დღესვე შემოგთავაზებთ.
ავტორი
