სოფელი მეწიეთი ჩოხატაურის მუნიციპალიტეტში მდებარეობს. სოფლის მოსახლეობა 43 კომლისგან შედგება. მათ ყოველდღიურად აუცილებელი პროდუქტების შესაძენად ხიდისთავში ან ჩოხატაურში უწევთ ჩასვლა, კვირაობით კი ჩოხატაურის აგრარულ ბაზარში დადიან. გადაადგილება მოსახლეობის იმ ნაწილს, ვისაც საკუთარი ავტომობილი არ ჰყავს, უჭირს.
სოფლის მცხოვრებლების ნაწილი ამბობს, რომ თუ ადგილობრივი ხელისუფლება ყურადღებას არ მიაქცევს, სოფელი დაცარიელდება.
ამ დროისთვის სოფელში წმინდა გიორგის სახელობის ტაძრის მშენებლობა მიმდინარეობს.
აქ ეკლესია აშენდება
როგორც დეკანოზი ილია (ლომთათიძე) გვეუბნება, ტაძრის აშენების იდეა მას ეკუთვნის, რადგან სურდა, მის სოფელშიც ყოფილიყო ეკლესია, სადაც ღვთისმსახურება ჩატარდებოდა.
გადმოცემის მიხედვით, ადგილი, სადაც ტაძარი შენდება, ძველი ნაეკლესიარია და როგორც მამა ილია ჩვენთან საუბრისას ამბობს, ძველი სკოლის შენობის დაშლისას, მოჩუქურთმებული ხის ნაწილები იპოვეს.
ეკლესიის მშენებლობა, სავარაუდოდ, აგვისტოს ბოლოს დასრულდება.
“2020 წლის აგვისტოში დავიწყეთ მშენებლობა. იდეა ჩემი იყო. ბავშვობა იქ მაქვს გატარებული და რაც სასულიერო პირი გავხდი, მინდოდა, რომ ჩემს სოფელშიც ყოფილიყო ტაძარი და ქრისტესმსახურება ჩატარებულიყო. სამტრედიაში შენობა დაიშალა და ტუფის ქვები მაჩუქეს, იქედან ამოვიტანე. შემდეგ ჩემი მოგვარე გავიცანი, თამაზ ლომთათიძე, რომელმაც გამოთქვა სურვილი დაგვხმარებოდა და გვერდში მიდგას.
ეს ადგილი, სადაც ტაძარს ვაშენებთ, ძველი ნაეკლესიარია და გვინდოდა, თანხის დაზოგვის მიზნით, შეგვესყიდა. თხოვნით მივმართეთ ნინო წილოსანს, რომ იქნებ სიმბოლურ ფასად, 1 ლარად გადმოგვცემოდა ტერიტორია, მაგრამ ვერ მოხერხდა და შევისყიდეთ. ვცდილობთ, დავადგინოთ, რა დროს იყო აქ ეკლესია. სავარაუდოდ, ტაძარი კომუნისტების პერიოდში სკოლად გადააკეთეს, შემდეგ კი სკოლასაც არავინ მიაქცია ყურადღება. ის ძველი შენობა დავშალეთ და რაღაც-რაღაცები ვნახეთ, ნაეკლესიარი. გადმოცემით ვიცით, რომ ხის ეკლესია იყო და ხის ჩუქურთმები ვიპოვეთ.
თბილი ამინდები რომ გამოვა, მუშაობას გავაგრძელებთ და სექტემბრის ბოლომდე ვფიქრობთ გახსნას”, _ ამბობს მამა ილია.
ჟუჟუნა კალანდაძე სოფელში მცხოვრები ასაკოვანი ქალბატონია. შვილი 3 წლის წინ ავტოსაგზაო შემთხვევის შედეგად დაეღუპა და მას შემდეგ მარტო დარჩა.
73 წლის ქალბატონი გვეუბნება, რომ მარტო ცხოვრება უჭირს. არსებული არასათანადო საცხოვრებელი პირობების გამო, სოფელი თითქმის დაცარიელდა:
“პური რომ გინდოდეს, თუ არ გამოაცხვე, საყიდლად ხიდისთავში უნდა წახვიდე. მარტოხელა ქალი ვარ და მიჭირს. დაახლოებით, 100 ლარის ღირებულების წამლები მჭირდება, მაგრამ რა ვქნა? ზოგჯერ ექიმთანაც ვერ მივდივარ. ხან უწამლობას ვითმენ და ხან _ საჭმელი არ მაქვს.
გაზის მილები გააკეთეს, მაგრამ ჯერ მოსახლეობას გაზი არ გვაქვს. ხიდისთავში საქუჩო განათება გააკეთეს, გაღმა სოფელშიც… ეს სოფელი და ეს კუთხე მთლად სატურეთია. ღამით, როგორ ბნელდება ყველაფერი, ვერ წარმოიდგენთ.
ახალგაზრდებს აქ არ უნდათ გაჩერება და სადაც უკეთესი მდგომარეობაა, იქ ყოფნა ურჩევნიათ. სოფელი თითქმის დაცარიელდა”, _ გვითხრა ჟუჟუნა კალანდაძემ.
სოფლის დაცარიელების საფრთხის შესახებ საუბრობენ მეწიეთის სხვა მცხოვრებლებიც. ისინი მიიჩნევენ, რომ თუ სოფელი არ გახდება ადგილობრივი ხელისუფლების პრიორიტეტი და სათანადო ყურადღება არ მიექცევა, მაშინ ისინიც, ვინც დღეს ცხოვრობენ, იძულებულები გახდებიან, საცხოვრებლად სხვაგან წავიდნენ.
ერთ-ერთი ქალბატონი გვეუბნება, რომ გზის და საქუჩო განათების გაკეთება აუცილებელია:
“გაზი არ გვაქვს. გზა არ გვაქვს, საქუჩო განათება არაა. ჩვენს სოფელში არაფერი არაა. ბავშვები სკოლასა და ბაღში ხიდისთავში დადიან. ვინც ვართ დარჩენილები, ჩვენ მაინც ხომ უნდა მოგვაქციონ ყურადღება, რომ არ გავიქცეთ? ამინდი რომ ფუჭდება, სახლიდან ძლივს გამოვდივარ გზაზე, ისეთი ამბავია”, _ გვითხრა მან.
გზა მეწიეთში
კიდევ ერთი მოსახლე ამბობს, რომ საქუჩო განათების გაკეთება აუცილებელია. ის გვეუბნება, რომ გზა თუ მალე არ გაკეთდა, ისედაც ცუდ მდგომარეობაში მყოფი გზა კიდევ უფრო მეტად გაფუჭდება:
“მეწიეთი რუკაზე არაა _ არავინ ყურადღებას არ გვაქცევს. გაზის მილები გამოიყვანეს, მაგრამ ჯერ არ რთავენ. სოფელს პრიორიტეტი თუ არ მიანიჭა ხელისუფლებამ, ყველა გაიქცევა აქედან. 2 კილომეტრი გზის გაკეთება რთული იყო?! ახლა გააკეთებენ წყალს. “ბასეინი” აქ არის, დაიწყებენ მუშაობას და მოისპობა ეს გზა კიდევ უფრო მეტად”, _ ამბობს ერთ-ერთი მეწიეთელი.
როდის მოგვარდება სოფელში მოსახლეობის მიერ დასახელებული პრობლემები _ ამ საკითხების გასარკვევად მერიის პრესსამსახურს დავუკავშირდით, სადაც გვითხრეს, რომ “სოფელ მეწიეთის მოსახლეობის საერთო კრების გადაწყვეტილების შესაბამისად, სოფლის მხარდაჭერის პროგრამის ფარგლებში, სოფლის ცენტრში გაკეთდა გარე განათება, გაგრძელება შესაძლებელი იქნება მიმდინარე წლის სოფლის მხარდაჭერის პროგრამის ფარგლებში გამართულ კრებაზე მოსახლეობის გადაწყვეტილების შესაბამისად.
გაზიფიცირების ქსელის მოწყობის სამუშაოები დასრულებულია და გადაცემულია კომპანია “სოკარ ჯორჯია გაზისთვის”.
რაც შეეხება გზას, ორი რთული მონაკვეთის ბეტონის საფარით მოწყობისთვის საპროექტო – სახარჯთაღრიცხვო დოკუმენტაცია მომზადებულია”, _ გვითხრეს ჩოხატაურის მერიის პრესსამსახურში.
