“ნებართვა არ გამიცია, თანხმობა არ მიმიცია და თუ უჩვენოდ ვინმე უკანონოდ რაიმეს მოიპოვებს, სასწრაფოდ გამოიძიეთ“, _ ეს განცხადება ქალაქ ოზურგეთის მერმა ბეგლარ სიორიძემ დღეს, საკრებულოს სხდომაზე, მას შემდეგ გააკეთა, რაც საკრებულოს ოპოზიციონერმა დეპუტატებმა მას და საკრებულოს სოციალურ საკითხთა კომისიას განცხადებით მიმართეს:
“ქალაქ ოზურგეთის მოქალაქეებიდან შემოსული ინფორმაციით ირკვევა, რომ ქალაქ ოზურგეთის მუნიციპალიტეტის ტერიტორიაზე მდინარე „ნატანების“ მიმდებარედ ხდება ინერტული საამშენებლო მასალის უკანონო მოპოვება (ნაკვეთის საკადასტრო კოდი 26.26.44.093 მესაკუთრე სახელმწიფო) ასევე ზემოდ ხსენებული უკანონო ქმედებები ხდება მუნიციპალიტეტის სხვა და სხვა ტერიტორიაზე. მოვითხოვთ დაუყონებლივ შეიქმნას დროებითი სამუშაო ჯგუფი, რათა შესწავლილი და აღკვეთილი იქნას მუნიციპალიტეტის ტერიტორიაზე ინერტული საამშენებლო მასალის უკანონო მოპოვება“.
ფრაქცია “ოზურგეთის მომავლისათვის“ თავმჯდომარემ თამარ ნადირიძემ და ამავე კომისიის წევრმა ლევან მგელაძემ საკრებულოს სხდომაზე აღნიშნეს, რომ მდინარე „ნატანებზე“ და მის მიმდებარე ტერიტორიაზე ხდება ინერტული სამშენებლო მასალების უკანონოდ მოპოვება და გატანა.
მათივე თქმით, აღნიშნულ ტერიტორიაზე მოსახლეობას საყანე ფართობები აქვთ, მდინარემ კი უკვე კალაპოტიც შეიცვალა, იქ მცხოვრებლებს კი სთხოვენ, რომ ეს მიწები გაყიდონ.
აღნიშნულთან დაკავშირებით ქალაქ ოზურგეთის მერმა ბეგლარ სიორიძემ განმარტა, რომ მისთვის ამის შესახებ ინფორმაცია ცნობილი არ არის და თუ ვინმე ქალაქის ტერიტორიაზე უკანონოდ მოიპოვებს ინერტულ სამშენებლო მასალებს, პასუხს აგებს.
“სწორედ ამ საკითხთან დაკავშირებით შემოვედი საკრებულოს სხდომაზე, იცით რა მაინტერესებს? ქალაქის ტერიტორიაზე არ არის არცერთი კარიერი დარეგისტირებული და თქვენ საიდან ფლობთ ამ ინფორმაციას?“ _ მიმართა სიორიძემ დამოუკიდებელ დეპუტატს ლევან მგელაძეს, რაზეც მგელაძემ უპასუხა, რომ მისი ინფორმაციით, სამ კომპანიაზე გაცემულია ლიცენზია, რომელიც ქალაქის ტერიტორიაზე უკანონოდ მოიპოვებ. ამავე კომპანიებს გააქვთ ინერტული მასალაც.
აღნიშნულის დამადასტურებელი დოკუმენტი დღეს მგელაძემ სიორიძესაც აჩვენა. ამის შემდეგ კი სიორიძემ, მერიის ინფრასტრუქტურის სამსახურის უფროსს მერაბ წივწივაძეს მიმართა:
“მერაბ, ქალაქის ტერიტორიაზე კარიერია სადმე? მე ნებართვა არ გამიცია, არც თანხმობა და თუ უჩვენოდ ვინმე ხრეშს მოიპოვებს, სასწრაფოდ გამოიძიეთ, გთხოვთ!“ მართლა მაინტერესებს, არის კარიერი სადმე? _ აბა, ეს რა მომიტანა ლევანმა ეს რა არის!
მაშინ უკანონოდ ხდება აღნიშნული ფაქტი და თუ ვინმე უკანონოდ ითვისებს , ეს არ შეიძლება ქალაქის ტერიტორიაზე ხდებოდეს, მე ვიცი რომ არ არის არცერთი კარიერი, თუ ვინმე იპოვებს უნდა დაისაჯოს, შეისწავლოს სპეციალურმა კომისიამ, მე ნამდვილადა არ ვიცი რა ხდება მდინარე “ნატანებზე“, მაგალითად მდინარე “ბჟუჟზე“ ახლაც მაქვს შემოსული წერილი და უარს ვეუბნები, ადრეც ვინც მომმართა უარი ვუთხარი და ეს საინტერესოა, თუ ეს ეჭვის დონეზეა, ამას არც დროებითი სამუშაო ჯგუფი და არც კომისია სჭირდება, სასწრაფოდ დაევალება შესაბამის სამსახურს და კვირის ბოლომდე შესასწავლი იქნება თუ კი სადმე რაიმე უკანონო ხდება, სასწრაფოდ ახლავე დავავალებ“,_ აღნიშნა სიორიძემ.
