„ნაპოლი“ იტალიის პატარა დასახლება დიმაროში იმყოფება და ახალი სეზონისათვის მზადების საწყის სტადიაშია. რასაკვირველია გუნდთან ერთადაა ხვიჩა კვარაცხელიაც, რომელიც საერთო ჯგუფთან ერთად ვარჯიშობს და დამატებით ტრენაჟორებზეც.
22 ივლისს გუნდის საზეიმო პრეზენტაცია გაიმართა, სადაც უამრავი გულშემატკივარი შეიკრიბა. პირველი სცენაზე გუნდის ახალი მწვრთნელი რუდი გარსია გავიდა, რომელმაც განაცხადა, რომ ტიფოზებმა თავიდანვე გააოგნეს, ეს ბედნიერებაა, მადლობელია ასეთი გულთბილი მიღებისთვის და იმედების გამართლებას შეეცდება.
შემდეგ ქომაგების წინაშე ტექნიკური პერსონალი და ფეხბურთელები წარსდგნენ. ხვიჩას გამოჩენამ პუბლიკის დიდი აჟიოტაჟი გამოიწვია, მას ოვაციებით და გამაყრუებელი ყიჟინით მიესალმენ, ისევე როგორც ვიქტორ ოსიმენსა და კაპიტან ჯოვანი დი ლორენცოს.
ამის შემდეგ სცენაზე სიტყვით გამოვიდა აურელიო დე ლაურენტისი:
„მადლობას ვუხდი ჩვენს გულშემატკივრებს, რომლებიც მოვიდნენ, რათა პატივის სცენ კლუბს. მინდა, რამდენიმე სიახლის შესახებ გითხრათ. არ მოუსმინოთ მედიას, ჩვენ თქვენთვის ვმუშაობთ. დღეს, ჩვენმა კაპიტანმა ჯოვანი დი ლორენცომ კონტრაქტი 2029 წლამდე გაახანგრძლივა, მაგრამ ეს დასასრული არ არის, 24 ივლისიდან სხვა მოთამაშეების კონტრაქტების განახლებები გაგრძელდება, ვნახავთ ვის უყვარს „ნაპოლი“ და ვინ ისწრაფვის სხვა ნაპირებისკენ. შარშან დაგპირდით სკუდეტოს მოგებას და მოვიგეთ,“ – განაცხადა დე ლაურენტისმა.
„ნაპოლის“ კაპიტანმა ჯოვანი დი ლორენცომ კლუბთან კონტრაქტი 2029 წლის ზაფხულამდე გაახანგრძლივა. ინფორმაცია „ნაპოლის“ პრეზიდენტმა აურელიო დე ლაურენტისმა მოულოდნელად, დიმაროში გულშემატკივრებთან შეხვედრისას გაავრცელა.
ჯოვანი დი ლორენცომ „ნაპოლის“ მაისურით 2019 წლიდან 184 შეხვედრაში 13 გოლის გატანა მოახერხა. მანამდე ჯოვანი „რეჯინას“, „კუნეოს“, „მატერას“ და „ემპოლის“ ღირსებას იცავდა, იტალიის ნაკრებში კი 28 თამაშში 3 გოლი აქვს გატანილი.
ცნობილი გახდა, რომ „ნაპოლი“ ვიქტორ ოსიმენს ახალ კონტრაქტს სთავაზობს და ფეხბურთის აგენტ რობერტ კალენდასთან მოლაპარაკებებს დაიწყებს.
ნეაპოლელები მზად არიან ნიგერიელს ხელშეკრულება 2027 წლამდე გაუხანგრძლივონ, ხოლო სეზონში 7 მილიონი ევრო და პლუს ბონუსები გადაუხადონ. აღსანიშნავია, რომ ვიქტორსაც სურს იტალიურ კლუბში დარჩენა, რაც შეიძლება გადამწყვეტი ფაქტორი გახდეს.
საინტერესოა, რომ „ნაპოლიში“ 7 მილიონი ევროს ხელფასი არავის აქვს და ბიუჯეტში ბალანსის დასაცავად შეიძლება კლუბს ორი ფეხბურთელის გაყიდვა მოუწიოს. გასხვისების მთავარი კანდიდატები პიოტრ ჟელინსკი და ირვინგ ლოზანო არიან.
საქართველოს ნაკრების ნახევარმცველი გიორგი ჩაკვეტაძე კი ინგლისურ „უოტფორდში“ ითამაშებს. 24 წლის ჩაკვეტაძე უკვე ლონდონშია, სადაც ახალ კლუბთან ხელშეკრულებას გააფორმებს.
„გენტსა“ და „უოტფორდს“ შორის შეთანხმება უკვე არსებობს. გიორგი ინგლისში იჯარით და გამოსყიდვის უფლებით გადავა. თუ ტრანსფერი ოფიციალურად დადასტურდა, ქართველი უოტფორდელთა მესამე შენაძენი იქნება მიმდინარე სატრანსფერო პერიოდში ტომ ინსისა და რის ჰილის შემდეგ.
„უოტფორდი“ ჩემპიონშიფში გამოდის, სადაც სეზონს 5 აგვისტოს, „ქუინზ პარკ რეინჯერსთან“ მატჩით გახსნის. „უოტფორდის“ მთავარი მწვრთნელი მიუნხენის „ბაიერნის“ ყოფილი ფეხბურთელი ვალერიან ისმაელია.
იტალიური „ფროზინონე“ საქართველოს ნაკრების მცველის, საბა საზონოვის შეძენითაა დაინტერესებული.
თუმცა, ჯერჯერობით, იტალიელებს მოსკოვის „დინამოსთვის“ ოფიციალური შეთავაზება არ გაუკეთებიათ. 21 წლის ფეხბურთელის შეძენით „ფროზინონეს“ სპორტული დირექტორი გვიდო ანჯელოცი პირადადაა დაინტერესებული.
საზონოვი „Transfermakrt“-ს 3 მილიონ ევროდ ჰყავს შეფასებული. მას მოსკოვის „დინამოსთან“ კონტრაქტი 2024 წლის ზაფხულამდე აკავშირებს.
საინტერესოა, რომ საბას მიმართ ინტერესს „სასუოლო“ და „უდინეზეც“ იჩენენ, მაგრამ კონკრეტულ მოლაპარაკებებზე საუბარი ჯერ არ ყოფილა.
ავტორი
