პრემიერ-მინისტრის ინიციატივით დაწყებული ახალი სახელმწიფო პროგრამის _ “განახლებული რეგიონები”, ფარგლებში შექმნილმა სპეციალურმა კომისიამ, ოზურგეთში გამართულ სხდომაზე რეგიონის 3 მუნიციპალიტეტის ურბანული განახლების მდებარეობები შეარჩია _ ამის შესახებ ინფორმაცია გურიის მაჟორიტარმა დეპუტატმა, ვასილ ჩიგოგიძემ გაავრცელა.
ვასილ ჩიგოგიძის ინფორმაციით, პროგრამის ფარგლებში ოზურგეთში _ კულტურისა და დასვენების პარკი და მისი მიმდებარე ტერიტორია, ჩოხატაურში _ ცენტრალური მოედნის მოწყობა და დუმბაძის ქუჩის მოწესრიგება, ხოლო ლანჩხუთში _ ცენტრალური მოედნის, ცენტრალური პარკის და საავტომობილო მაგისტრალიდან ლანჩხუთში შესასვლელი კვანძის მიმდებარე ტერიტორიის განახლება იგეგმება.
ოზურგეთის მუნიციპალიტეტის მერი, კონსტანტინე შარაშენიძე ჩვენთან საუბრისას ამბობს, რომ პროგრამა მარტო პარკის განახლებას არ ითვალისწინებს:
“ძალიან დადებითად ვაფასებ ამ პროგრამას. მარტო კულტურისა და დასვენების პარკი არ კეთდება _ კეთილმოეწყობა კოსტავას ქუჩის კილომეტრნახევრიანი მონაკვეთი, ტროტუარებით, მრავალბინიანი საცხოვრებელი სახლების ფასადებით, გამწვანებით და განათებით”, _ გვითხრა კონსტანტინე შარაშენიძემ.
ჩოხატაურის მუნიციპალიტეტის მერი, ირაკლი კუჭავა ამბობს, რომ პროექტი მთლიანად შეუცვლის იერსახეს ჩოხატაურს. უფრო მეტიც, ირაკლი კუჭავა სპეციალურად “გურია ნიუსის” მკითხველისთვის ამბობს, რომ მუნიციპალიტეტის თვითმმართველობა დაბაში, ორპირას ბულვარის პროექტის გაგრძელებისთვის დაფინანსების მოსაპოვებლად მუშაობს:
“რეგიონული განვითარებისა და ინფრასტრუქტურის სამინისტრომ უკვე გამოაცხადა პროექტირება-მშენებლობის ტენდერი. გამარჯვებული კომპანიის არქიტექტორები და ურბანისტები ადგილზე გაეცნობიან ჩვენ მიერ სახელმწიფო კომისიისთვის შეთავაზებულ და დამტკიცებულ სივრცეს. პროექტის ღირებულებაც ამ სამუშაოების დასრულების შემდეგ გახდება ცნობილი. სამუშაოები წელს დაიწყება.
ეს პროექტი მთლიანად შეუცვლის იერსახეს ჩოხატაურს და ჩვენ მიერ დაბის კეთილმოწყობის დაწყებული სამუშაოების ლოგიკური გაგრძელება იქნება.
ასევე, თქვენს მკითხველებს ვეტყვით, რომ მუნიციპალიტეტის თვითმმართველობა, აქტიურად მუშაობს სამთავრობო სტრუქტურებთან და ევროკავშირის წარმომადგენლობასთან “ორპირას ბულვარის” პროექტის გაგრძელების დაფინანსების მოპოვებისთვის. ამ საკითხზე უფრო კონკრეტულ ინფორმაციას მოგვიანებით მოგაწვდით, როცა უფრო მკაფიოდ გამოიკვეთება ამ პროექტის გახორციელების პერსპექტივა”, _ გვითხრა მერმა.
შეგახსენებთ, რომ ამ ეტაპზე ჩოხატაურში, “ორპირას ბულვარის” პროექტის პირველი ნაწილი ხორციელდება, ჩოხატაურის ცენტრის კეთილმოწყობის პროექტის მნიშვნელოვან ნაწილზე კი მერმა დროებით უარი თქვა და ევროკავშირის დაფინანსებით მოპოვებული თანხით უდაბნოს მონასტრის მიმართულებით გზის გაკეთება არჩია.
ლანჩხუთის მუნიციპალიტეტის მერი, ალექსანდრე სარიშვილი ამბობს, რომ პროგრამა “განახლებული რეგიონები” უპრეცედენტოა და გარდა ქალაქის ვიზუალური მოწესრიგებისა, ეკონომიკური სარგებლის ნახვის საშუალებასაც იძლევა:
“პროგრამა არის უპრეცედენტო, რომლის მსგავსი არ ყოფილა ჩვენს ქვეყანაში. იგი მუნიციპალიტეტებს მოგვცემს განვითარების შესაძლებლობას. კონკრეტულად, ლანჩხუთში ცენტრალური მოედანი მოეწყობა, სადაც ნებისმიერ ადამიანს შეუძლია მივიდეს, დაისვენოს. ამას ეკონომიკური სარგებელიც ექნება _ ბიზნეს გარემო განვითარდება. ასევე, დამატებით არის საუბარი, რომ კვანძი, რომელიც ლანჩხუთთან აკავშირებს ცენტრალურ მოედანს, მოეწყობა პირველ რიგში იმისთვის, რომ ადამიანები დასაქმდნენ და ბიზნესგარემო შეიქმნას. გარდა იმისა, რომ ვიზუალურად გალამაზდება და მოწესრიგდება ქალაქის ცენტრი, ეკონომიკურადაც სარგებელი იქნება. მაისში ჩამოვლენ საპროექტო სამსახურების წარმომადგენლები, გაამზადებენ პროექტს, გამოცხადდება ტენდერი და მალევე დაიწყება სამუშაოები. ეს პროექტი დიდი საჩუქარია ვიზიტორისთვისაც, ტურიტისთვისაც, ადგილობრივი მცხოვრებლებისთვის, ბიზნესისითვისაც”, _ ამბობს მერი.
ალექსანდრე სარიშვილის თქმით, მოწყობილი სივრცე ზედამხედველობის ქვეშ იქნება, რომ არ დაზიანდეს.
ურბანული განახლების პროექტების/ესკიზების წარდგენა უკვე გამოცხადებულ ტენდერებში გამარჯვებულ კომპანიებს დაევალებათ.
პროგრამა “განახლებული რეგიონების” ფარგლებში, 160 მილიონი ლარის ღირებულების ტენდერები ინფრასტრუქტურის სამინისტროს მუნიციპალური განვითარების ფონდმა 28 აპრილს გამოაცხადა. ტენდერები მოიცავს დასავლეთ საქართველოს ოცდათოთხმეტივე მუნიციპალიტეტს. გამოცხადებული 8 ტენდერიდან, თითოეულის მოცულობა 20 მილიონი ლარია. ტენდერების შედეგად, გამოვლინდება საპროექტო და სამშენებლო კომპანიები, რომლებიც მოამზადებენ სპეციალური კომისიის მიერ შერჩეული ობიექტების ურბანული განახლების პროექტებს და შეასრულებენ ამავე დოკუმენტაციით განსაზღვრულ სამშენებლო-სარეაბილიტაციო სამუშაოებს.
4-წლიანი უპრეცედენტო პროგრამა, რომელიც საქართველოს 63 მუნიციპალიტეტს მოიცავს და მისი მხოლოდ პირველი ეტაპის საორიენტაციო ღირებულება 500 მილიონი ლარია, ითვალისწინებს რეგიონების ურბანულ განახლებას, რაც სახელმწიფოს, მუნიციპალიტეტისა და კერძო საკუთრებაში არსებული მნიშვნელოვანი ობიექტის განვითარებას გულისხმობს. პროექტები გახორციელდება როგორც სახელმწიფო ბიუჯეტის დაფინანსებით, ისე საერთაშორისო საფინანსო ინსტიტუტების მხარდაჭერით.
