იაშვილის სახელობის ბავშვთა ცენტრალური საავადმყოფოს სამედიცინო დირექტორის, ივანე ჩხაიძის განცხადებით, ქვეყანაში გრიპის ვირუსის დადასტურებული შემთხვევა არ არის, ახლა კი ცირკულირებს რინოვირუსი, ძველი კორონავირუსი და ახალი კორონავირუსი. ამის შესახებ ჩხაიძემ მედიაცენტრ “მთავარში” გამართულ პრესკონფერენციაზე ისაუბრა.
„საბედნიეროდ, გრიპის ვირუსის შემთხვევა დადასტურებული არ არის. გრიპი ჯერ საქართველოში არ არის, თუ გავითვალისწინებთ მრავალწლიან სტატისტიკას, ამ თვეში, უკვე გვექნება გრიპის პირველი შემთხვევა. ალბათ, შემდეგ შეგვეძლება ვთქვათ, რომ დაიწყო გრიპის სეზონური მატების პერიოდი. მოლოდინი გვაქვს, რომ ნოემბრიდან აპრილის პერიოდში იქნება ქვეყანაში გრიპი. მოლოდინია, რომ გრიპის გავრცელების პიკი დეკემბერ-თებერვლის თვეზე მოვა. პიკური მაჩვენებელი ყოველ წელს განსხვავებულია, გასულ წლეს თებერვლის პირველ ნახევარზე მოვიდა, ალბათ, წელსაც ამავე პერიოდს დეკემბრამდე თებერვალ პერიოდს დაემთხვევა“, – აღნიშნა ჩხაიძემ.
მისივე თქმით, ძველი კორონავირუსი და ახალი კორონავირუსი მეტად მსუბუქად მიმდინარე დაავადებების ჯგუფშია და პირველადი ჯანდაცვის რგოლის ექიმის მეთვალყურეობის ქვეშ იმართება.
გარდა ამისა, ივანე ჩხაიძემ ისაუბრა იმ ნიშნების შესახებ, რაც გამოარჩევს გრიპს სხვა ვირუსებისგან.
„გრიპის ნიშნები არის მკვეთრად გამორჩეული იმ ნიშნებისგან, რომლებიც ახასიათებს რინოვირუსს ან ძველ კორონავირუსს, რაც ახლა ყველაზე მეტად არის გავრცელებული მოსახლეობაში. ეს ნიშნებია: მაღალი ტემპერატურა – 38 და მეტი, ძლიერი თავის ტკივილი, ყელის ტკივილი, მუხლებისა და სახსრების ტკივილი, ხველა… აღსანიშნავია, რომ ცემინება და ცხვირიდან გამონადენი გრიპს არ ახასიაებს, ეს უფრო გაციების ან კორონავირუსის ნიშანია. გრიპს ასევე ახასიათებს ძლიერი საერთო სისუსტე, მადის დაქვეითება… ანუ ყველა ეს ნიშანი მიუთითებს იმაზე, რომ გრიპის ზემოქმედება ადამიანის ორგანზმზე საკმაოდ სერიოზულია. ამიტომ უმეტეს შემთხვევაში გრიპი მიმდინარეობს ან საშუალო სიმძიმის, ან მძიმე დაავადების ნიშნების ქვეშ. შესაბამისად, ამ ჩამონათვალიდან, როგორც წესი, ყველა აღინიშნება“, – განაცხადა ივანე ჩხაიძემ.
მან ასევე ისაუბრა გრიპის იმ გართულებებზე, რა დროსაც აუცილებელი ხდება პაციენტის კლინიკაში გადაყვანა.
„ჩვენ ყველაზე მეტად გვეშინია გართულებების, რომლებიც შეიძლება იყოს გულის მხრიდან, თავის ტვინის მხრიდან, მაგრამ ყველაზე უფრო მეტად გრიპის გართულებებზე საუბრისას მხედველობაში გვაქვს ფილტვის ანება. რაც შეეხება ფილტვის ანთების ნიშნებს, ბავშვებში ესენია: სუნთქვის უჩეულო გართულება, ტემპერატურის მატების, ხველის და სხვა ნიშნების ფონზე. ეს არის პირველი მიმანიშნებელი ფილტვის ანთების არსებობის. იმ შემთხვევაში თუ სუნთქვის გახშირებაში დამხმარე მუსკულატურაც მონაწილეობს, მაგალითად, იდრიკება გულმკერდი, ნეკთაშუა არეები, ეს კიდევ უფრო მძიმე მიმდინარეობის მიმანიშნებელია და ასეთ შემთხვევაში ბავშვი, განსაკუთრებით 7 წლამდე ასაკის ბავშვი, აუცილებლად უნდა იქნას გადაყვანილი კლინიკაში“, – თქვა „მედიაცენტრ მთავარში“ ივანე ჩხაიძემ.
