აიკრძალოს 25-წლამდე ასაკის საქართველოს მოქალაქის შესვლა აზარტულ სათამაშო დაწესებულებებში, მონაწილეობა და რეგისტრაცია, პრობლემის სიმწვავიდან გამომდინარე, მთავრობამ უზრუნველყოს ლუდომანიით დაავადებულთათვის პროგრამების დაფინანსება, მათ შორის ცხელი ხაზის შექმნა, აზარტული თამაშების რეკლამა აიკრძალოს ყველა ტიპის მედიასაშუალებაში და ასევე გარე რეკლამების განთავსება ბილბორდებზე, ავტობუსებზე და ა.შ. მთავრობამ წარმოადგინოს ტურიზმის ზრდასთან დაკავშირებული დასაბუთებული გრძელვადიანი გეგმა, რომლის მიხედვითაც, კაზინოები განთავსდება ტურისტულ ზონებში, პირველი ნოემბერი გამოცხადდეს აზარტული თამაშების წინააღმდეგ ბრძოლის დღედ_ ეს ის შეზღუდვებია, რის დაწესებასაც კამპანია „აზარტული თამაშების წინააღმდეგ“ მოითხოვს.
ამ მოთხოვნებით აქცია გაიმართა მთავრობის ადმინისტრაციასთან.
იუსტიციის უმაღლესი საბჭოს არამოსამართლე წევრის, აქციის ორგანიზატორის, ანა დოლიძის განცხადებით, ამ მოთხოვნებით მოხდება პეტიციის რეგისტრირება და ხელმოწერები შეგროვდება.
„ყოველი დღე თითო სიცოცხლედ გვიჯდება. თითოეულ იმ კომპანიასთან მივალთ და გავაპროტესტებთ, რომლებიც უარს აზარტული თამაშებს რეკლამირებაზე არ იტყვიან“,_ამბობს დოლიძე.
აზარტული თამაშების რეგულაციის კანონპროექტის ერთ-ერთი ავტორი, ლევან გოგიჩაიშვილი ამბობს, რომ აზარტული თამაშების სფერო არ არის ბოლომდე თეთრი და თამაშისგან გამომდინარე საფრთხეების შესახებ საუბრობს.
“ეს არის მაფია, რომელიც არის შეზრდილი სახელისუფლებო სტრუქტურებში, განსაკუთრებით, მმართველ ელიტაში. მას ჰყავს ძალიან სერიოზული მხარდამჭერები. მხარდაჭერა გამოიხატება ინიციატივების დაბლოკვაში და არაფრის გაკეთებაში. ბოლო 7 წლის განმავლობაში 60 მილიონიდან 13 მილიარდამდე გაიზარდა აღნიშნული ინდუსტრიის ბრუნვა. ეს ინდუსტრია არ არის ბოლომდე თეთრი და არის სხვადასვა რისკების მატარებელი. პირველი რისკი არის ის, რომ არასრულწლოვნების ჩართულობა არის ძალიან დიდი, მეორე რისკია ის, რომ ფულის გათეთრების დიდ საშუალებას იძლევა და სოციალური პრობლემები მრავალწახნაგოვანი. ამ პრობლემების გამო ძალიან ბევრი ადამიანის სიცოცხლე დაიკარგა. გასულ წელს საპარლამენტო უმრავლესობამ ჩააგდო ძალიან მნიშვნელოვანი კანონპროექტი, რომელიც ითვალისწინებდა რეკლამის აკრძალვას და იყო ნაწილი დიდი კომპლექსური პროექტის, რომელიც გულისხმობს ამ სფეროს დარეგულირებას”,_ ამბობს გოგიჩაიშვილი.
აზარტული თამაშების კვლევის და ლუდომანიის პრევენციის ცენტრის ხელმძღვანელი, გუგა ბესელია კი ცენტრის მიერ ჩატარებული კვლევის მძიმე შედეგებზე საუბრობს.
მისი თქმით, თბილისში მოზარდების 48%-ს აქვს შეხება აზარტულ თამაშებთან და ამას ყოველგვარი სირცხვილის და დამალვის გარეშე აფიქსირებენ, იმიტომ რომ თამაში არის ტრენდული. ტრენდული კი სათამაშო ბიზნესის მიერ რეკლამირებაში უდიდესი თანხების ხარჯვამ გამოიწვია.
გუგა ბესელია ასევე ამბობს, რომ მსოფლიო ჯანდაცვის ორგანიზაციამ ლუდომანია ფსიქკური დაავადებების რიცხვში შეიყვანა, საქართველოში კი მას დააავადების სტატუსი მინიჭებული არ აქვს.
ლუდომანიის, როგორც ქვეყნის უმძიმეს სენად აღიარებას ითხოვს „დედები აზარტული თამაშების წინააღმდეგ“ ხელმძღვანელი, თამარ ჯაფარიძე.
“შავმა ბიზნესმა ყველა ჯანსაღი ბიზნესი შეისრუტა საქართველოში. ბიზნესი, რომელიც ორიენტირებული იყო ქართულ ეკონომიკაზე სიბინძურეში გახვია. ვალდებულები ვართ გავერთიანდეთ. ადამიანები ითხოვენ შველას. მივმართავ ჯანდაცვის სამინისტროს, აკაკი ზოიძეს, აღიარეთ ლუდომანია ჩვენი ქვეყნის უმძიმეს სენად“,_ განაცხადა ჯაფარიძემ.
