„ერთიანი ნაციონალური მოძრაობის“ ყრილობაზე მიღებული გადაწყვეტილების მიუხედავად, სადაც პარტიაში 6-თვიანი დროებითი მმართველობითი საბჭო შეიქმნა, გურიის ადგილობრივ ორგანიზაციებში საკადრო ცვლილებები არ განხორციელებულა.
როგორც ლანჩხუთის რაიონული ორგანიზაციის თავმჯდომარემ, კახა ასკურავამ “გურია ნიუსს” განუცხადა, რაიონული ორგანიზაციის ხელმძღვანელები საკუთარ პოსტებს ჩვეულებრივად ინარჩუნებენ.
„რაიონული ორგანიზაციის თავმჯდომარედ ვინც ვიყავით, ვრჩებით… არაფერი არ იცვლება. ეს არის გარდამავალი ხელმძღვანელობა, რომელიც პარტიას 6 თვის განმავლობაში მოამზადებს“, — აღნიშნავს ასკურავა ჩვენთან საუბრისას.
ამრიგად, პარტიის ცენტრალურ დონეზე დროებითი საბჭოს შექმნისა და პოლიტსაბჭოდან ცალკეული წევრების წასვლის მიუხედავად, გურიის რეგიონულ სტრუქტურებში ადგილობრივი ლიდერები მუშაობას ძველი შემადგენლობით აგრძელებენ.
ძირითადი რეფორმები და მასშტაბური ცვლილებები, ასკურავას თქმით, 6-თვიანი გარდამავალი პერიოდის ამოწურვის შემდეგ, სავარაუდოდ, იანვარ-თებერვალში დაგეგმილ დიდ ყრილობაზე გამოცხადდება.
“დროებითი მმართველობითი საბჭო შეიქმნა ექვი თვით, რომელიც პარტიას მოამზადებს იმ ცვლილებებისთვის, რაც 6 თვის შემდეგ განხორციელდება. სავარაუდოდ, დიდი ყრილობა/მსვლელობა იანვრის ბოლოს ან თებერვლის დასაწყისში გაიმართება“,_ თქვა ასკურავამ.
შეგახსენებთ, „ერთიანი ნაციონალური მოძრაობის“ მმართველობითი საბჭოს ხელმძღვანელი, ირაკლი ფავლენიშვილი გახდა. ასევე, მმართველობითი საბჭოს შემადგენლობაში შედიან – პეტრე ცისკარიშვილი, ანი წითლიძე, გიორგი ჩალაძე, ლაშა ფარულავა, გიორგი ბოტკოველი, ლევან ბეჟაშვილი და პატიმრობაში მყოფი ირაკლი ნადირაძე.
