ბორჯღალოსნების მთავარმა მწვრთნელმა ლევან მაისაშვილმა, „შემოდგომის ერთა თასის“ პირველი მატჩისთვის შემადგენლობა დაასახელა.
„რვა ერის“ პირველ რაუნდში საქართველო 14 ნოემბერს, ჩვენი დროით 19 საათზე ლეგენდარულ „თვიქენჰემზე“ ექვსი ერის მოქმედ ჩემპიონსა და 2019 წლის მსოფლიო თასის ფინალისტ ინგლისს ეთამაშება. ესაა პირველი შემთხვევა, როდესაც რაგბის სამშობლოს უმთავრეს გუნდს მსოფლიო თასს მიღმა ვერკინებით.
აქამდე ინგლისთან ორჯერ გვითამაშია. 2003 წლის მსოფლიო თასზე, ავსტრალიაში, საქართველოსთვის მსოფლიო თასზე სადებიუტო მატჩში, მომავალმა ჩემპიონმა 84:6 იმარჯვა. 2011 წელს, ახალ ზელანდიაში, ინგლისს ერთი საათი ტოლ-სწორად ვერაგბეთ, თუმცა გამოცდილმა მეტოქემ დასკვნით მეოთხედში სამი ლელოს გატანა მოახერხა და 41:10 იმარჯვა.
„მარიფილდზე“ სამი კვირის წინ გამართული მატჩის შემდეგ, შერკინების ხაზში ოთხი ცვლილებაა.
პირველ ხაზში ძირითად შემადგენლობაში ადგილი შეინარჩუნა მიხეილ ნარიაშვილმა, კვაჭის პოზიციაზე ძირითადში დაწინაურდა შალვა მამუკაშვილი, ხოლო მეორე ბურჯი ბექა გიგაშვილია, რომელმაც შოტლანდიაში ტრავმის გამო ვერ ითამაშა.
მეორე ხაზში გრიგორ ქერდიყოშვილს ლაშა ჯაიანი შეუწყვილდება. ქერდიყოშვილმა წინა თამაშიც ძირითადში დაიწყო, ჯაიანი კი განაცხადში არ იყო. ორივე მეორეხაზელს აქამდე ნაკრებში ორ-ორი თამაში აქვთ ჩატარებული.
მესამე ხაზში ადგილი შეინარჩუნეს ბექა გორგაძემ და ბექა საღინაძემ, მეორე ფლანკერად კი მარქაფიდან გიორგი (კოკი) თხილაიშვილი დაწინაურდა.
ინგლისთან მატჩში სასტარტო შემადგენლობაში მყოფი მორკინალებნის კეპების ჯამი 254-ია.ოთხი ცვლილებაა ხაზშიც, რომელთა კეპების ჯამი, ექვს მორაგბეზე 220-ს შეადგენს. ექვსი ერის მოქმედ ჩემპიონთან, ბორჯღალოსნების რიგებში დებიუტი ექნება სანდრო სვანიძეს, რომელიც თამაშს ფრთაზე იწყებს, მეორე ფრთა კი აკაკი ტაბუცაძე იქნება, რომელმაც შოტლანდიას ლელო გაუტანა და სამ შეხვედრაში 6 ლელო მოაგროვა. მას აქამდე მოედანი ლელოს გარეშე ჯერ არ დაუტოვებია.
ცენტრში გუნდის კაპიტან მერაბ შარიქაძეს გიორგი კვესელაძე შეუწყვილდება, რომელის შოტლანდიასთან მარქაფაში იყო. ტრავმა მოიშუშა და ინგლისთან თამაშს იწყებს ფულბეკი ლაშა ხმალაძე.
ცვლილებაა ღერძშიც, სადაც 9 ნომრის პოზიციაზე ძირითადში გელა აფრასიძე დაწინაურდა, მგეზავი კი თედო აბჟანდაძე იქნება.
პირველი ხაზის მარქაფაში გადაინაცვლეს კვაჭმა ჯაბა ბრეგვაძემ და ბურჯმა ლექსო ყაულაშვილმა. ისინი შოტლანდიასთან სასტარტო შემადგენლობაში იყვნენ. ამჯერადაც მარქაფაშია ბურჯი გურამ გოგიჩაშვილი. მეორე ხაზში შეცვლაზე ოთარ გიორგაძეა, რომელსაც მესამე ხაზშიც შეუძლია თამაში, ხოლო მესამე ხაზში თორნიკე ჯალაღონიას ვიხილავთ, რომელსაც ბორჯღალოსნებში დებიუტი წელს, პორტუგალიასთან ჰქონდა და ახლა მეორე კეპს მოიხვეჭს. შეცვლაზე ვიხილავთ 9 ნომერ ვასილ ლობჟანიძეს და უკანახაზელებს – დემე თაფლაძეს და სანდრო თოდუას. სამივე მორაგბე შოტლანდიასთან ძირითად შემადგენლობაში იყო.
ხაზი: 15. ლაშა ხმალაძე (83 კეპი, 53 ქულა) 14. აკაკი ტაბუცაძე (3 კეპი, 30 ქულა), 13. გიორგი კვესელაძე (25 კეპი, 20 ქულა) 12. მერაბ შარიქაძე (67 კეპი, 60 ქულა, კაპ.) 11. სანდრო სვანიძე (*) 10. თედო აბჟანდაძე (16 კეპი, 53 ქულა) 9. გელა აფრასიძე (26 კეპი, 24 ქულა);
შერკინება: 1. მიხეილ ნარიაშვილი (62 კეპი, 10 ქულა) 2. შალვა მამუკაშვილი (75 კეპი, 50 ქულა) 3. ბექა გიგაშვილი (14 კეპი, 5 ქულა) 4. ლაშა ჯაიანი (2 კეპი) 5. გრიგორ ქერდიყოშვილი (2 კეპი) 6. ბექა საღინაძე (13 კეპი, 5 ქულა) 7. გიორგი თხილაიშვილი (58 კეპი, 60 ქულა) 8. ბექა გორგაძე (28 კეპი, 40 ქულა);
მარქაფა: 16. ჯაბა ბრეგვაძე (59 კეპი, 15 ქულა) 17. გურამ გოგიჩაშვილი (15 კეპი, 5 ქულა) 18. ლექსო ყაულაშვილი (1 კეპი) 19. ოთარ გიორგაძე (26 კეპი, 25 ქულა) 20. თორნიკე ჯალაღონია (1 კეპი) 21. ვასილ ლობჟანიძე (52 კეპი, 40 ქულა) 22. დემე თაფლაძე (3 კეპი, 5 ქულა) 23. სანდრო თოდუა (86 კეპი, 65 ქულა).
ინგლისიელები, თავის მხრივ, ოპტიმალურთან მიახლოებული შემადგენლობით დაგვიპირისპირდებიან. ედი ჯოუნსის შემადგენლობაში ორი დებიუტანტია, მათ შორის მესამეხაზელი ჯეკ ვილისი ძირითად შემადგენლობაში იქნება, ხოლო მაქს მეილინზი მარქაფადან გააძლიერებს გუნდს. საერთო ჯამში ედი ჯოუნსის რაზმში იტალიასთან თამაშის შემდეგ 7 ცვლილებაა.
ინგლისელები გამოცდილი და ნაცადი უკანა ხაზით დაგვიპირისპირდებიან, ტრავმა მოირჩინა და ძირითად შემადგენლობაში დაბრუნდა ელიოტ დეილი. ერთადერთი ახალი სახე ცენტრში ვუსტერელი ოლი ლაურენსი იქნება, რომელიც გუნდში თავის მეორე შეხვედრას ჩაატარებს.
ედი ჯოუნსმა იტალიასთან მატჩთან შედარებით განსხვავებული პირველი ხაზი დააყენა. მაკო ვუნიპოლას ნაცვლად სასტარტო თხუთმეტეულში ელის გენჯი იქნება, ხოლო მასთან ერთად მარქაფაში კაილ სინკლერმაც გადაინაცვლა და მის ადგილას ვილ სტიუარტი იასპარეზებს. მესამე ხაზში გადაინაცვლა გუნდის ერთ-ერთმა ლიდერმა მარო იტოჟემ, მეორე ხაზში კი ერთმანეთს ჯო ლონჩბრი და ჩარლი იუელსი შეუწყვილდებიან.
უცვლელია „ვარდების“ გუნდის კაპიტანი – ოუენ ფარელი, ცხრა ნომერზე კი ბენ იანგსი ითამაშებს, რომლისთვისაც ეს შეხვედრა ინგლისის ნაკრებში 101-ე .
ხაზი: 15. ელიოტ დეილი 14. ჯონათან ჯოზეფი 13. ოლი ლაურენსი 12. ჰენრი სლეიდი 11. ჯონი მეი 10. ოუენ ფარელი (კაპ) 9. ბენ იანგის
შერკინება: 1. ელის გენჯი 2. ჯეიმი ჯორჯი 3. ვილ სტიუარტი 4. ჩარლი იუელსი 5. ჯო ლონჩბრი 6. მარო იტოჟე 7. ჯეკ ვილისი 8. ბილი ვუნიპოლა.
მარქაფა: 16. ტომ დანი 17. მაკო ვუნიპოლა 18. კაილ სინკლერი 19. ბენ ერლი 20. ტომ ქარი 21. დენ რობსონი 22. მაქს მეილინზი 23. ჯო მარშანი.
წყარო: rugby.ge
