“ვერცერთი გზა ვერ გაუძლებს კარიერებიდან მომავალი ტვირთმზიდების ასეთ დაწოლას”

ოზურგეთის მუნიციპალიტეტის სოფელ მელექედურში, ოთხკილომეტრიანი გზის მონაკვეთი, რომელზეც დიდი ხანია, დადის ძიმითის, ნაგომრის, ჩოხატაურის კარიერებიან მომავალი მძიმე ტვირთმზიდი მანქანები, გამუდმებული დაზიანების, უფრო ნგრევის მდგომარეობაშია. ამის გამო სერიოზულად წუხს ადგილობრივი მოსახლეობა.

ახლახან, უკანონო სამეწარმეო საქმიანობის და ასევე, უკანონო შემოსავლების ლეგალიზაციის ფაქტზე, გურიაში, ორი პირი დააკავეს: “საქართველოს ფინანსთა სამინისტროს საგამოძიებო სამსახურის თანამშრომლებმა, სამეგრელო–ზემო სვანეთის საქალაქო პროკურატურასთან ერთად ჩატარებული ოპერატიული სამძებრო ღონისძიებისა და საგამოძიებო მოქმედებების შედეგად, უკანონო სამეწარმეო საქმიანობისა და საგამოძიებო მოქმედებების ფარგლებში ორი პირი დააკავეს. როგორც გამოძიებამ დაადგინა, ბრალდებულები გურიაში, მდინარე სუფსის ნაპირებთან, აუცილებელი ნებართვის გარეშე, სისტემატურად მოიპოვებდნენ ინერტულ მასალას, შემდეგ კი მის რეალიზებას სხვადასხვა სამეწარმეო საქმით დაკავებულ სუბიექტებთან ახდენდნენ. ჩატარებული ღონისძიების შედეგად, გარკვეულია, რომ 38 0804 ლარის ღირებულების ინერტული მასალაა მოპოვებული“.

საგამოძიებო სამსახურის განცხადებაში ნათქვამია, რომ “ამჟამად საქმეზე გამოძიება მიმდინარეობს სისხლის სამართლის კოდექსის 192-ე მუხლის მეორე ნაწილის “ა” ქვეპუნქტით და 194-ე მუხლის მეორე ნაწილის “ა” “ქვეპუნქტით და 194-ე მუხლის მეორე ნაწილის “გ” ქვეპუნქტით, რაც სასჯელის სახით ექვსიდან ცხრა წლამდე თავისუფლების აღკვეთას ითვალისწინებს“.

აღნიშნულ თემას მუდმივად მიბმულია სწორედ ინერტული მასალით დატვირთული მძიმე ტვირთმზიდი მანქანების მიერ ახლად დაგებული გზის (და არაერთგზის!) დაზიანება.

აქაური მოსახლეობის თქმით, ეს ყველაფერი იმის ბრალია, რომ ტვირთმზიდების ძარაზე ბევრად მეტ ქვიშა-ხრეშის ათავსებენ, ვიდრე ეს წესით არის განსაზღვრული. არაერთი საპროტესტო გამოსვლის შემდეგ, ასევე, რა თქმა უნდა, მედიის, მათ შორის, “გურია ნიუსის” უწყვეტი აქტივობის და პრობლემის გაშუქების შედეგად, წესები უკეთესობისკენ შეიცვალა _ ნაკლებ ტვირთს ყრიან, სატვირთოს ძარის გადახურვა ხდება, თუმცა, დღემდე არ იწონება ტვირთი და სასწორი საერთოდ არ გამოიყენება. როცა ჩვენ გვარწმუნებდნენ, რომ კარიერებიდან გამომავალი მანქანები, თითქოს, სასწორზე გაივლიდნენ და შემდეგ მიდიოდნენ კონკრეტული მეწარმის ქვის დამამუშავებელ ქარხანაში, სიცრუე აღმოჩნდა. ეს იყო წლების წინ და ჩვენ ამ ინფორმაციას უწყვეტად ვაწოდებდით საზოგადოებას.

2026 წლის 19 ივნისს “გურია ნიუსი” მდინარე ნატანების, “მელექედურის კარიერად” წოდებულ მონაკვეთს ეწვია. მდინარის ნაპირის სიახლოვეს, ერთი ტვირთმზიდი იდგა, ძარაზე კი “ბრეზენტი” ჰქონდა გადაფარებული. კონკრეტულად ამ ადგილზე, მრავალი წელია ქვიშა-ხრეშის გადამამუშავებელი ქარხანა მოქმედებს _ ეს არის შპს “გურია”. იქ მისვლისას პასუხისმგებელ პირად მოქალაქე გოჩა გოგრიჭიანი გაგვეცნო. თავად ჯერ გვითხრა, დადეშქელიანი (?) ვარო, შემდეგ “აღიარა” ნამდვილი ვინაობა:

_ ამბობთ, ამ ხეობებში სულ დავდივართო და მეგონა, მიცნობდით, _ გვითხრა მან და ისიც გაგვიმხილა, რომ საწარმოს დირექტორი გვარად მახათაძეა.

_ ნამდვილად არ მოვიპოვებთ ნატანების ხეობაში ინერტულ მასალას. დავდივართ სხვადასხვა ოფიციალურ კარიერზე. ვყიდულობთ და მერე აქ ვამუშავებთ, შემდეგ კი სხვადასხვა საწარმოს ვაწვდით, _ გვითხრა გოგრიჭიანმა, რომელსაც აშკარად არ სურდა საუბარი და მოკლე პასუხების შემდეგ, ჩვენ, მელექედურის ტერიტორიაზე, მდინარე ნატანების ხეობაში კიდევ ერთ კარიერს ვეწვიეთ, სადაც მძიმე ტვირთმზიდი და ექსკავატორი, ერთმანეთისგან მოშორებით იდგნენ. აქ ქვა-ღორღს შპს “კავკასუსცემენტი ჯორჯია” მოიპოვებს. ადგილზე მალე მისი ხელმძღვანელი გია დუმბაძე მოვიდა. ის მშვიდად გვესაუბრა, რომ ინერტული მასალების მოპოვებას კანონის დაცვით ახდენს:

_ წესიერად, ყოველგვარი დარღვევის გარეშე ვმუშაობთ. ეს დაგროვებული ინერტული მასალა სოფელ ნატანებში მდებარე ქვიშა–ხრეშის გადამამუშავებელ საწარმოში გადაგვაქვს. ჩვენი მომხმარებლები ადგილობრივი მშენებლები არიან, ასევე, ის კომპანიები, რომლებმაც საგზაო ტენდერებში გაიმარჯვეს.

არ ვიქცევით კანონის დარღვევით. მდინარის კალაპოტში, სიღრმეში არ ჩავდივართ და მაქსიმალურად ვცდილობთ, არ დავაზიანოთ მდინარის სივრცე ისე, რომ საფრთხის შემცველი იყოს. ასევე, სოფელს ხშირად ვეხმარებით. ღმერთმა ყველა დაიფაროს და როცა გარდაცვლილია, იმ დროს განსაკუთრებით ვუდგავართ გვერდში, ცუდის მთქმელი აქ არავინ გვყავს, _ გვითხრა გია დუმბაძემ,.

მართლაც აქ მცხოვრებმა რამდენიმე პირმა აღნიშნა, რომ დუმბაძის საწარმო უხეშად არ მუშაობს. კარიერიც, შედარებით მაქსიმალურად უკეთ გამოიყურება, არაა მიმობნეული ღრმა ჭები და ქვაბულები, როგორც ეს სუფსის ხეობაშია.

გზების დაზიანების შესახებ გია დუმბაძემ გვითხრა, რომ ყველაზე ნაკლებად მისი დაქვემდებარების ქვეშ მყოფი მანქანები მოძრაობს მელექედურის გზაზე. ამ სოფელში გაივლის ყველა კარიერიდან მომავალი მძიმე ტვირთმზიდი მანქანა და ძირითადად, ამიტომ ხდება ასეთი დაზიანებაო.

ეს სიმართლეცაა, რადგან მელექედურის მცხოვრებთა დიდი ნაწილი, სწორედ იმას აპროტესტებს, რომ სხვადასხვა საწარმოს მრავალი მანქანა დადის ამ გზაზე და არც აკონკრეტებენ ვინმეს სახელობითად. ისინი საუბრობენ იმაზე, რომ გზის ეს მონაკვეთი, რომელიც საგანგებოდ კარგად გაკეთდა, მაინც ყოველ წელს თავიდან გასაკეთებელია.

_ გგონიათ, გზა კარგად არ გაუკეთებიათ? სხვაგან არ ვიცით და ბოლო პერიოდში, აქ მართლაც საუკეთესო ასფალტი დაიგო. თუმცა, ნახევარი წელი არ გავა, რომ ყველა მონაკვეთი არ ჩაიქცეს. ამდენი ტვირთმზიდის დაწოლას, ვერც ერთი გზა ვერ გაუძლებს. სილაურიდან, ნაგომრიდან, ძიმითიდან, თვით მელექედურის კარიერებიდან, ჩოხატაურიდან წამოსული მძიმე ტვირთმზიდი მანქანები სპობენ ამ გზას. საკვირველი ის არის, რომ სახელმწიფოს ასე გამუდმებით ახალი გზის დაგება დიდ ზარალად რატომ არ მიაჩნია? ჩვენი ბიუჯეტიდან ხომ იყრება წყალში ეს ფული და გაცილებით უზარმაზარი ზარალია, ვიდრე ერთი სასწორის დადგმა და მისი რეგულარულად ამუშავების მოწესრიგება? _ ამბობენ ადგილობრივი მცხოვრებლები.

ზოგადად, ოზურგეთის მუნიციპალიტეტში ყველამ იცის, რომ ეს გზა _ სოფელ მელექედურის ოთხკილომეტრიანი მონაკვეთი, საგანგებოდ გაკეთდა, რომ მძიმე ტრანსპორტი არიდებოდა ქალაქ ოზურგეთის ცენტრს და კარიერებიდან წამოღებული ინერტული მასალა ამ გზით წაეღოთ ურეკის მიმართულებით მდებარე ქვიშა-ხრეშის გადამამუშავებელ საწარმოებში.

“გურია ნიუსი” ეწვია სოფელ მელექედურს, აქვე მდებარე კარიერებს. ადგილობრივებმა აღნიშნეს, რომ არის ზოგი სასიკეთო ცვლილებაც _ ის მძიმე ტვირთმზიდები, მთებივით რომ ედგათ ძარაზე ინერტული მასალა, ისე სავსე აღარ დადიან. შედარებით ნელაც მოძრაობენ, თუმცა, ეს საქმეს არ შველის. აუცილებელია, იდგეს სასწორები, ზედმეტი ტვირთი არ უნდა წაიღონ. ამით გადარჩება გზებიც და გურიის მდინარეთა კალაპოტები განადგურებასო, _ ამბობენ ისინი.

მუნიციპალიტეტის მერის წარმომადგენელი სოფელ მელექედურში, გაგა ცხომელიძე “გურია ნიუსს” ღიად ესაუბრა:

_ მძიმე ტვირთმზიდები, რომლებიც მდინარე სუფსის აუზებში მდებარე კარიერებიდან გამოდიან, ქალაქ ოზურგეთის ცენტრს უვლიან გვერდს და სწორედ ამიტომ, მელექედურის გავლით მიემართებიან ურეკის მიმართულებით. რა დასამალია, რომ ყველა კომპანია არ იცავს ტვირთის გადატანის ნორმებს. ამის აკრძალვა ჩემს კომპეტენციას აღემატება. როგორია, ხშირად ორასი მძიმე ტვირთმზიდი რომ გაივლის სახლის წინ, ამხელა მონაკვეთზე? ეს ხომ არავის სურს. გასაგებია, რომ საქმეს სჭირდება. წელს რეგიონში გასახორციელებელი პროექტების ფონდის და ოზურგეთის მერიის ფინანსური მხარდაჭერით, სოფელ ოზურგეთსა და სოფელ მელექედურს შორის დამაკავშირებელი გზის რეაბილიტაცია გახორციელდა. საგზაო პროექტის ღირებულება 2 483 895 ლარს შეადგენს, რომლის მიხედვით გაკეთდა რკინა–ბეტონის სანიაღვრე არხები და 3535 მეტრი სიგრძის გზის რეაბილიტაცია. ძალიან ვწუხვარ, რომ სოფლის ცენტრალური გზა გამუდმებით ზიანდება, _ თქვა გაგა ცხომელიძემ.

თითქმის იგივე განაცხადა ცხომელიძის თანამშრომელმა, ადგილობრივმა მკვიდრმა გელა ღლონტმა:

_ ინერტული მასალების მოპოვება მუდმივად საჭიროა აღმშენებლობისთვის, თუმცა, ჩვენ, სოფლის მკვიდრი მოსახლეობა, სერიოზულად ვწუხვართ და გაბრაზებული ვართ გზის ასე სასტიკი დაზიანების გამო, _ გვითხრა ღლონტმა.