რომ სასჯელაღსრულების სამინისტროს და მედიის მიერ გავრცელებული ინფორმაცია ციხეში მოშიმშილე მსჯავრდებულების არარსებობის შესახებ, არასწორია: “ქსანში ჯერ კიდევ რჩება ორი მოშიმშილე პატიმარი _ ხარძიანი და ინაშვილი, რომლებსაც ეკა ბესელიას დაპირების არ სჯერათ. პატიმრები მათი საქმეების გადახედვას მოითხოვენ, რაზედაც ადამიანის უფლებათა დაცვის კომიტეტის თავმჯდომარეებს განუმარტა, რომ ხარვეზების დამდგენი კომისიის შექმნამდე საქმეების გადახედვის მექანიზმი არ არსებობს. ამ დროისათვის პატიმარ ხარძიანს პროტესტის ნიშნად სახე და ტუჩები აქვს ამოკერილი”.
“ქსნის N15 და რუსთავის #17 სასჯელაღსრულების დაწესებულებებში მყოფმა მოშიმშილე მსჯავრდებულებმა შიმშილობა შეწყვიტეს,” _ აღნიშნული ინფორმაცია დღეს სასჯელაღრსრულების სამინისტრომ გაავრცელა.
“პროტესტის უკიდურეს ფორმაზე უარი მსჯავრდებულებმა მას შემდეგ თქვეს, რაც მათ საქართველოს პარლამენტის ადამიანის უფლებათა და სამოქალაქო ინტეგრაციის კომიტეტის თავმჯდომარე ეკა ბესელია, ამავე კომიტეტის წევრი გედევან ფოფხაძე და სასჯელაღსრულების, პრობაციისა და იურიდიული დახმარების საკითხთა მინისტრის პირველი მოადგილე გიგა გიორგაძე შეხვდნენ. ქსნის #15 სასჯელაღსრულების დაწესებულებაში დეპუტატებთან ერთად სახალხო დამცველი უჩა ნანუაშვილიც იმყოფებოდა.
ადამიანის უფლებათა და სამოქალაქო ინტეგრაციის კომიტეტის თავმჯდომარე ეკა ბესელია და მინისტრის პირველი მოადგილე გიგა გიორგაძე, რომელიც ამავდროულად ვადამდე გათავისუფლების მუდმივმოქმედი კომისიის თავმჯდომარეც გახლავთ, მსჯავრდებულებს ადგილობრივი საბჭოების გადაწყვეტილებების გადახედვას დაჰპირდნენ. რაც შეეხება შეკრებითობის წესის გაუქმების შემდეგ მიღებულ სასამართლო გადაწყვეტილებებს, მსჯავრდებულებმა ეკა ბესელიასგან საქმეების ინდივიდუალურად შესწავლის პირობა მიიღეს.
საქართველოს პარლამენტის წევრებთან და მინისტრის პირველ მოადგილესთან შეხვედრის შემდეგ ყველა მოშიმშილე მსჯავრდებულმა პროტესტის შეწყვეტის გადაწყვეტილება მიიღო. ამ დროისთვის სასჯელაღსრულების დაწესებულებებში არც ერთი მსჯავრდებული არ შიმშილობს,” _ ნათქვამია სამინისტროს ვებგვერდზე გავრცელებულ განცხადებაში.
დღესვე ეკა ბესელიამ ფეისბუქით გავრცელებულ განცხადებაში აღნიშნა, რომ შეძრულია ნაწამები პატიმრების ისტორიებით და ყველაფერს გააკეთებს მათთვის მდგომარეობის შესამსუბუქებლად: “გუშინ ქსნისა და რუსთავის ციხეში ასობით პატიმარს შევხვდი და ვესაუბრე. 15 წელია ციხე, პატიმარი, სასამართლო _ ჩემი ყოველდღიური საზრუნავი იყო და კარგად ვიცი რა ხდებოდა წლების განმავლობაში, მაგრამ არ შემიძლია იმის გადმოცემა რაც ხდებოდა 7 საათიანი შეხვედრების დროს გუშინ…. საშინლად ნაწამები პატიმრები და წლების განმავლობაში მიღებული ტრავმების აშკარა კვალი, საშინელი განცდა უსამართლობის, მოლოდინი და უმძიმესი ჯანმრთელობის მდგომარეობა… მშრალ შიმშილობაზე მყოფთ საუბრის თავიც არ ჰქონდათ, ვთხოვე და წყლის მიღება დაიწყეს… უმეტესობამ შეწყვიტა შიმშილობა რუსთავში, ქსანში სრულად. საოცრად მადლიერები იყვნენ ამნისტიის კანონით, მაგრამ ითხოვენ უკანონო განაჩენების გადახედვას… დიდი ხანი ვისაუბრეთ… ძალიან გამიჭირდა ემოციურად… ახალგაზრდა, ასაკოვანი, უხელო, ეტლით …. მძიმე მძიმეა მათი ემოცია… რა შედარებაა პირობების თვალსაზრისით, მაგრამ მათ გადატანილი უსამართლობა აწუხებთ…. უამრავი წერილი გამომატანეს, ვკითხულობ და ვფიქრობ, ვინმე არ დაგვრჩეს ყურადღების მიღმა… მათ ყველაზე მეტი გადაიტანეს… ძალიან მძიმე იყო ემოციურად ამ ისტორიების მოსმენა”.
