ქუცნაშვილი აცხადებს, რომ მომავალი წელი საკმაოდ სერიოზული და ნაყოფიერი იქნება. დაგეგმილია სიახლეები განათლების სისტემაში, რათა შეიქმნას პროფესიული განათლების ერთიანი ქსელი. აშენდება ახალი სკოლები და მოხდება ძველების რეაბილიტაცია. პირველად შეიქმნება მიგრაციის სამსახური იმისათვის, რომ გამოვლინდეს ვინ იმყოფება ჩვენ ქვეყანაში კანონიერად და ვინ უკანონოდ, მომავალ წელს მოხდება საქართველოს მოსახლეობის საყოველთაო აღწერა.
“კიდევ ერთი სიახლე, რაც მომავალ წელს გველოდება, საქართველოს მოსახლეობის საყოველთაო აღწერაა, რაც ბოლო 12 წლის განმავლობაში არ ჩატარებულა. ჩვენი მიზანია შევისწავლოთ – რა მდგომარეობაშია ჩვენი ხალხი, თითოეულ ოჯახში მისვლით და გამოკითხვის მეთოდით. მომავალ წელს განხორციელდება ასევე მნიშვნელოვანი ინფრასტრუქტურული პროექტები ენერგეტიკის სფეროში. აშენდება დასავლეთ საქართველოს დამაკავშირებელი ახალი გაზსადენი. ზესტაფონი-ქუთაისის, ქუთაისი-სენაკის და გორი-ქარელის მიმართულებით. 2014-2015 წლებში დავასრულებთ საქართველოს მოსახლეობის ინდივიდუალურ გამრიცხველიანებას. 20%-ით შევაცმირეთ ელენერგიის, ხოლო 10%-ით გაზის ტარიფი. მოსახლეობა ვერ ირძნობს ამ შეღავათს, თუ მას ექნება კომუნალური მრიცხველები”.
უმრავლესობის წევრის განცხადებით, მომავალ წელს მთავრობა დაიწყებს საპენსიო რეფორმას და მოხდება გადასვლა დაგროვებით საპენსიო სისტემაზე.
“დავიწყებ საპენსიო რეფორმით. იცით, რომ ვაპირებთ მომავალ წელს გადავიდეთ დაგროვებით საპენსიო სისტემაზე. ეს იქნება მრავალწლიანი პროცესი, რომელიც დაეფუძნება შრომის სტაჟს და შენატანის ოდენობას. ის მოქალაქები, რომლებიც სხვადასხვა მიზეზების გამო ნაკლებს შრომობენ, ან ეწევიან საოჯახო საქმიანობებს, მიიღებენ სოციალურ პენსიანს, რომელიც იქნება არანაკლები, საარსებო მინიმუმზე”.
ქუცნაშვილმა განაცხადა, რომ ისევ გაგრძელდება მუშაობა ბიზნესის მიმართულებით და მომავალ წელს წინსწრებით გადახდილი თანხები ისევ დაუბრუნდებათ ბიზნესმენებს. ასევე მნიშვნელოვან სიახლედ დაასახელა მე-13 ხელფასის შემოტანა.
“მოსახლეობასთან მიმართებაში სიახლე იქნება იმაშიც, რომ დაბალხელფასიან მოქალაქეებს, მხედველობაში მაქვს 150 ლარამდე ხელფასის მქონე პირებს, იანვარ-თებერვლის თვეებში დაუბრუნდებათ 200 მილიონი ლარი მე-13 ხელფასის სახით. 150 ლარის ხელფასის მქონე მოქალაქები აიღებენ 360 ლარს ე.წ. 13 ხელფასს, ხოლო 100-ლარიანი ხელფასის მქონე პირები – 240 ლარს”.
ზაქარია ქუცნაშვილმა ყურადღება გაამახვილა სახელმწიფო ენაზე და აღნიშნა, რომ მომავალ წელს შემუშავდება კანონპროექტი სახელმწიფო ენის სტატუსის შესახებ. დეპუტატი შეეხო თვითმმართველობის რეფორმასაც და განაცხადა, რომ მთავრობას სამოქალაქო საზოგაოდებასთან ერთად, კიდევ ერთხელ მოუწევს ჩააბაროს სამართლიანი, არაძალადობრივი არჩევნების ტესტი. მან იმედი გამოთქვა, რომ ეს არჩევნები იქნება საკმაოდ კონკურენტული და დემოკრატიული.
“ადგილობრივი არჩევნები თავისი სპეციფიკით ყოველთვის უფრო აქტიურია და ეხება ყველა დასახლებას. ორგანზიებულად ჩატარებისათვის კი ძალიან მნიშვნელოვანი იქნება თვითმმართველობის რეფორმის გატარება. იმედი მაქვს, ეს არჩევნები იქნება ყველაზე კონკურენტული”.
ქუცნაშვილმა განაცხადა, რომ მოსახლეობის მოლოდინი სამართლიანობის აღდგენის კუხით აუცილებლად გამართლდება და ამ მხრივ პროკურატურას აქვს სერიოზული გამოწვევა, უპასუხოს ამ მოლოდინს. მისი თქმით, პირველი ოქტომბრის დაპირებებიდან ერთ-ერთი მთავარი დაპირება იყო სწორედ სამართლაინობის აღდგენა და ეს საქმე საჭიროებს პროცესის ბოლომდე მიყვანას.
უმრავლესობის წევრი აცხადებს, რომ “ქართული ოცნების” ნომერ მეორე მთავრობა შეძლებს ბევრად ეფექტურად და სწრაფად მიაღწიოს დასახულ ამოცანებს, ვიდრე მიმდინარე წელს.
