ოტია იოსელიანის დაკრძალვა
ქართველი მწერალი და საზოგადო მოღვაწე ოტია იოსელიანი 19 ივლისს, საკუთარ ეზოში დაკრძალეს. ის ჯერ გელათის ტაძარში გადაასვენეს, სადაც დილიდანვე მიმდინარეობდა პანაშვიდი. მწერალი გელათიდან 15:00 საათზე გამოასვენეს.
ოტია იოსელიანი 81 წლის ასაკში, 14 ივლისს გარდაიცვალა. ეზოში დაკრძალვის გადაწყვეტილება ოჯახმა მწერლის ანდერძის საფუძველზე მიიღო.
პოეტმა ერეკლე საღლიანმა "გურია ნიუსთან" საუბარში თქვა, რომ "თავის დროზე დავით კლდიაშვილმა მოიტანა საქართველოს ეს საოცარი კუთხე _ იმერეთი ქართულ მწერლობაში და ოტია იოსელიანი პირდაპირ არის მისი სულიერი მემკვიდრე: _ ოტიას შეეძლო მიწის გულის ყუნწში ამოეკითხა მთელი საიდუმლოებანი. ამ კაცისთვის ბუნება იყო დიდი წიგნი, კითხულობდა ამ წიგნს და შემდგომ სიბრძნეს, რომელსაც ამ ბუნებასთან ურთიერთობაში იღებდა, გადაჰქონდა თავის მოთხრობებში, იმ ნაწარმოებებში, რომელთაც დავიწყება არ უწერია.
გივი ბერიკაშვილი, მსახიობი: _ კიდევ ერთი შეუდარებელი კაცი დავკარგეთ, სულითა და ხორცით ქართველი. ოტია ყველა თაობის მწერალი იყო, ემსახურებოდა დრამატურგიასაც, მის ზღაპრებზე გაიზარდა თაობები. ოტია იოსელიანი სამუდამოდ დარჩება, როგორც ერის დიდი კაცი.
დათო ტურაშვილი, მწერალი: _ ბატონი ოტია არ იყო მარტივი ადამიანი, ჰქონდა, განსხვავებული ცხოვრების წესი, თუმცა, ვინც უყვარდა, მათთვის ადვილი ადამიანი იყო. მე მქონდა ბედნიერება. ურთიერთობა მქონოდა მასთან _ პირველი პიესა მის სახლში დავწერე და ჩემთვის ეს ფაქტი ძალიან ძვირფასია. დიდი დანაკლისია მისი გარდაცვალება ქართული თანამედროვე ლიტერატურისთვის.
პოეტის დაკრძალვაზე ოზურგეთიდან რამდენიმე ათეული ადამიანი ჩავიდა. მისი მეგობარი, ოზურგეთელი ბადრი ინგოროყვა იმ წლებს იხსენებს, რომელიც ოტია იოსელიანთან აკავშირებდა:
_ 2002 წელს ბატონი ოტია იოსელიანი ოზურგეთში იმყოფებოდა. ძალიან კარგი და გულთბილი შეხვედრები ჰქონდა. ამავე წელს ჩემი დაბადების დღეს მასთან გადავიხადე, ძალიან მეგობრული, განათლებული და კეთილშობილი ადამიანი დავკარგეთ, _ გვითხრა ბადრი ინგოროყვამ.
ოზურგეთელმა გია თავბერიძემ ჩვენთან საუბრისას თქვა: _ ბატონ ოტია იოსელიანთან ერთხელ სუფრასთან მოვხვდი და მშვიდობის სადღეგრძელო არ დალია _ ვიცი, გურულებისთვის ეს სადღეგრძელო რასაც ნიშნავს, მაგრამ სანამ აფხაზეთს და სამაჩაბლოს არ დავიბრუნებთ, მანამდე მშვიდობის სადღეგრძელოს ვერ დავლევო.
დაკრძალვაზე დღეს უამრავი ხალხი მივიდა, ისინი ჩვენთან საუბრისას ამბობდნენ, რომ ოტია იოსელიანი მათ სათქმელს თავად ამბობდა და ამის გამო ხალხის სიყვარული დაიმსახურა.
