ოზურგეთის ალექსანდრე წუწუნავას სახელობის დრამატულ თეატრში, პრემიერისთვის მზადება დაიწყო. წელს _ ოქტომბრის ბოლოს, ვასილ ჩიგოგიძე ნოდარ დუმბაძის “მე, ბებია, ილიკო და ილარიონის” მიხედვით “გამარჯობა, ხალხო!”-ს დადგამს.
“გურია ნიუსი” მომავალ პრემიერასთან დაკავშირებით, ოზურგეთის სახელმწიფო თეატრს ესტუმრა. ვასილ ჩიგოგიძე, რომელიც ერთ დროს ამავე თეატრის მმართველი და არა ერთი სპექტაკლის დამდგმელი რეჟისორი იყო, ახლა ზაზა ჯინჭარაძის თხოვნით, მაყურებელს კიდევ ერთხელ გაახსენებს ყველა დროის პოპულარულ სპექტაკლს. სპექტაკლში არა ერთი ცვლილებაა შეტანილი და შემოდგომაზე მაყურებელი ახალ ვარიანტს იხილავს.
ვასილ ჩიგოგიძე ხალისიანი და საქმიანი განწყობით დაგვიხვდა და უცხოეთიდან დაბრუნების მიზეზებზე გვესაუბრა:
_ აქ სპექტაკლის დასადგმელად მოვედი. არსად არ წავსულვარ, ყოველთვის ოზურგეთში ვიყავი და ვარ. დრომ მოიტანა, შემოქმედებითმა გზამ თუ ცხოვრებამ, ლიტვაში ვმოღვაწეობ. ესპანეთში და კიდევ რამდენიმე ქვეყანაში ფესტივალებზე დავდივართ. რაც შეეხება ოზურგეთის თეატრში სპექტაკლის დადგმას, ეს ზაზა ჯინჭარაძის დაჟინებული თხოვნით მოხდა. ზაზა მე მოვიყვანე თეატრში და არ შეიძლებოდა, მისთვის უარი მეთქვა. მეორე მიზეზი კი ჩემი შვილის და შვილიშვილების დაბრუნებაა ოზურგეთში. შვილმა ოზურგეთში დაიწყო მუშაობა და გააცოცხლა ამდენი ხნის დაკეტილი ოჯახი. შვილიშვილების გვერდით ყოფნას არაფერი სჯობს. მესამე და უმთავრესი _ ჩვენ ოქტომბერში გურიას და ოზურგეთს ვუმზადებთ იმას, რასაც გურია და ოზურგეთი იმსახურებს _ ეს არის “ოზურგეთობის” დაწესება, რაზეც დიდი ხანია ვოცნებობდი. ოზურგეთი გამოცხადდება ფოლკლორის ქალაქად ისე, როგორც სიღნაღია სიყვარულის ქალაქი. ეს ქალაქი და გურია მთლიანად, მართლაც სიმღერის და ფოლკლორის მხარეა _ “არსად ისე არ მღერიან, როგორც აქ, ამ ქვეყანაში!” ოქტომბერში იგეგმება გიორგი სალუქვაძის მეორე საერთაშორისო ფესტივალის ჩატარება და რაც ყველაზე დიდი დღესასწაული იქნება, ესაა “ექვთიმეობის” აღდგენა. საოცარი ძალისხმევით აშენდა მუზეუმი, დაიდგა ექვთიმეს ბრწყინვალე გორელიეფი, შემოქმედების ერთ-ერთი უბრწყინვალესი ნიმუში. და კიდევ, ბოლოს და ბოლოს, 16 ოქტომბერს უნდა აღდგეს “ალეგრობა” ოზურგეთში.
_ ბატონო ვასილ, სპექტაკლის პრემიერა როდის იგეგმება?
_ ალბათ, 26 ოქტომბრისთვის. ძალიან მადლობელი ვარ იმ ადამიანების, რომლებიც გვეხმარებიან. დასი შვებულებიდან ძალიან ადრე გამოვიდა. 10 სექტემბერს მივდივარ ესპანეთში, 5 ოქტომბერს დავბრუნდები და ინტენსიურად შევუდგებით მუშაობას. 13-18 ოქტომბრის ჩათვლით “ოზურგეთობა” ჩატარდება, ამ დღეების გვირგვინი კი იქნება 16 ოქტომბერი, როდესაც ველოდებით მის უწმინდესობას, საქართველოს პრეზიდენტს… მოკლედ, იქნება დიდი სტუმრიანობა.
_ როგორც ცნობილია, სპექტაკლში “გამარჯობა, ხალხო!” ყველა ოზურგეთელი მსახიობი დაკავდება, მათ შორის, ამირან ქადეიშვილი.
_ პიესა დუმბაძის “მე, ბებია, ილიკო და ილარიონის” მიხედვით დაიდგა. მასში ცოტა ცვლილებაა. ამ სპექტაკლით თავის დროზე მოვიარეთ მსოფლიოს სხვადასხვა ქალაქები.
